2 Samuele 3 - Bibilia Buk na Ŋun nagon koti luŋu a

¹ A mörö iŋge joŋga diŋit a najo i kiden na kötumit na Saula ko kötumit na Dawidi; a Dawidi puputuru ŋerot a iŋgo, ama a kötumit na Saula rorokaddi kak a namunyan.

Ŋwajik ti Dawidi logon a yuŋwe Keberon yu

² A Dawidi iŋge yuŋweki ŋwajik Keberon yu: a ŋuro lonyit kayu gwe a Amunon tore lo Akinoma na Yejerele;

³ a loponi gwe a Kilaba tore lo Abigaila nagon köju a karu ’be na Nabala lo Karmela na; a tomusala gwe a Abisa-loma tore lo Maka, ŋuro na Talemai, mor lo Gesur;

⁴ a toiŋwan gwe a Adoniya tore lo Kagita; a tomukanat gwe a Sepatia tore lo Abitala;

⁵ a tobuker gwe a Yiteriam tore lo Egala nagon a nene nakwan na Dawidi. Kilo Ŋwajik yuŋweki Dawidi Keberon yu.

Abiner ga ’yu teteŋdya tomoret ko Dawidi

⁶ A gwe sona a Abiner koŋdi mugun a duma i kötumit na Saula, i diŋit nagon mörö gwon kata i kiden na kötumit na Saula ko na Dawidi nu.

⁷ A nene köliŋönit nagon a narakwan na Saula karin kanyit a Risepa, ŋuro na Aya; a Isa-boset pipije Abiner adi, Nyo nagon do a tu ko köliŋönit nagon a narakwan na baba yu?

⁸ A kirut Abiner wore woran parik i kilo kulyaesi ti Isa-boset, a nyobbi adi, Nan ŋona a ’dioŋ lo kötumit na Yuda le? Nan a kwekiŋdya ’busan i kötumit na munyi ilot Saula, ko i luŋasirik kanyit, ko i julin kanyit, tojo ko na diŋit, nan a ko wukin do ko Dawidi i könisi; kölum i lo lor a do poki i lalaggu na nan kogwon kulya ti ŋuto nanakwan.

⁹ Ti Ŋun konakiŋdye nan Abiner sona ko lwölwöŋ kine, ko nan a ko konakin Dawidi ŋo nagon MATAT a milyekin lepeŋ nu,

¹⁰ anyen wusaddu tumatyan kaŋo i kötumit na Saula, a tosi ’dakiŋdye Dawidi i si ’daet na tumatyan i Yisaraele ko i Yuda, suluja Dan tojo Ber-seba.

¹¹ Ama a Isa-boset tine bulö waddu Abiner köti ma ’di ko kulyaet geleŋ to, kogwon nye kukujönö lepeŋ.

¹² A Abiner sonyoddi luyökie Keberon ko Dawidi yu, kulya adi, Lo jur a liŋ a? Ti yi teteŋdi tomoret nikaŋ ko do, mete, a nan de parakiŋdye do anyen jujuaddu ŋutu liŋ ti Yisaraele a kulök.

¹³ A Dawidi ruŋge adi, A na ’but; nan bubulö teteŋdya tomoret nikaŋ ko do; ama ŋo geleŋ kata nagon nan ’de ’deggi konut adi, do ti bulö meddya komor nio ko do a ko joŋdya Mikala ŋuro na Saula, a kokwe na pöri do i meddya na nan nu.

¹⁴ A Dawidi soŋdi luyökie ko Isa-boset ŋuro lo Saula yu kulya adi, Tiki nan Mikala narakwan nio nagon nan a yem ko ka ’bi ’binyalan mia geleŋ ti ŋutu ti Pelesete na.

¹⁵ A Isa-boset soŋdi ŋutu, a riŋuŋdye lepeŋ ko lalet lonyit Palatiele ŋuro lo Laisa.

¹⁶ A lalet lo Mikala kepoddi lepeŋ gwigwiörö kanyit i mukök teŋ ko Bakurim. A kirut Abiner kulyani ko lepeŋ adi, iŋgo, yitöni bot; a lepeŋ yitöni bot.

¹⁷ A Abiner nyönyökökiŋdye temejik ti Yisaraele kine kulya adi, I diŋit na lwöŋgu, ta a ga ’yu Dawidi i gwon a mor losu.

¹⁸ Nyenagon koŋdi ta; kogwon MATAT aje milyekin Dawidi adi, Nan mo tiŋdu köliŋönit lio Dawidi i lwö-kuŋdyö na ŋutu kwe Yisaraele i könisi ti ŋutu ti Pelesete ko ti merok kase liŋ.

¹⁹ A Abiner köti jambi ko ŋutu ti Benyamina; a kirut Abiner iti Keberon, a nyönyökökiŋdye Dawidi ŋo liŋ nagon ŋutu ti Yisaraele ko ti kötumit na Benyamina aje yiyiun a na ’but i kona kune.

²⁰ A Abiner ko ŋutu merya murek ’dure ko Dawidi Keberon yu, a Dawidi konakiŋdye Abiner se ko ŋutu kanyit kulo rorwe.

²¹ A Abiner kulyani ko Dawidi adi, Nan de ŋiŋien anyen momo-ruŋdya Yisaraele lio konut ni pon mor duma liŋ, anyen se bubulö nyesu milye ko do, anyen do böŋö gwon a kasaranit lo ŋutu lio logon töili ilot a ’deggi kilo. A Dawidi kölöddi Abiner; a nye iti tu ko taliŋ.

Yöaba tatuja Abiner

²² A köliŋönök ti Dawidi se ko Yöaba pete yitwe i ryaggu, joŋdya tito jore lo ryakun se kulo. Ama a Abiner gwe ’bayin Keberon ko Dawidi yu, kogwon lepeŋ aje kölöddu nye, aje tu ko taliŋ.

²³ A nagon Yöaba ko kamö-rök lio logon gwon ko nye kulo ko ’dure, a kine kulya iŋge nyönyököki Yöaba adi, Abiner ŋuro lo Ner a poŋdya ko mor ni, a mor aje kölöddu lepeŋ, a lepeŋ aje tu ko taliŋ.

²⁴ A Yöaba iti ko mor yu a pipije adi, Do a koŋdya nyo? Meddi, Abiner a poŋdya konut ni; nyo nagon do kokölörö lepeŋ i tu?

²⁵ Do a den adi Abiner ŋuro lo Ner a poŋdya i mumulugga na do, anyen ko denaddu tu inot kaŋo ko yitwe inot, ko i denaddu na ŋo liŋ nagon do kökon kune.

²⁶ A nagon Yöaba aje lupe kaŋo ko Dawidi i komor nu, a lepeŋ sonyoddi luyökie ko Abiner i mukök, a se nyö-kuŋdye lepeŋ bot i kidi lo Sira; ama Dawidi a ko den kine kulya.

²⁷ A nagon Abiner aje yitwe Keberon, a Yöaba joŋgi lepeŋ a swot i lukata na kötumit lupet anyen tu jambu ko lepeŋ a lwön, a nye iŋge rem lepeŋ nyu kanyit i pele, a lepeŋ twane twan, ropakiŋdya rima ti Asaele luŋaser lonyit.

²⁸ A i mukök nagon Dawidi aje yiŋ kine kulya nu, a lepeŋ kulyani adi, Nan ko tumatyan nio ŋupi a loke ko MATAT i komor kogwon rima ti Abiner ŋuro lo Ner.

²⁹ Ti toron na rima kanyit ’duki ko Yöaba i kwe, ko i kötumit liŋ na monye lonyit. Ti kötumit na Yöaba molu gwe ti jaran ko ŋutu logon piŋo wowon kase i mugunya, kode logon a moka ko rimajin, kode ko ŋutu logon a bata lo wörö ko turya, kode logon tatua ko wale, kode logon ’bak kinyo.

³⁰ Nyena Yöaba ko Abisai luŋaser lonyit lo tatuja Abiner, kogwon lepeŋ a tatuja luŋaser lose Asaele i mörö na gwon Gibeon yu nu.

³¹ A Dawidi kulyani ko Yöaba se ko ŋutu kanyit liŋ adi, Kekereŋdi ta boŋgwat kasu ko jupuni ta boŋgwat telekesi delyari Abiner. A mor Dawidi kepoddi par nu.

³² A se nuŋge Abiner Keberon yu; a mor luluöddi ki i gulöm na Abiner; a ŋutu liŋ gwine gwien.

³³ A mor delyani Abiner adi, Nyo Abiner a twan gwoso ŋuto lu ’böŋ lo twa?

³⁴ Könisi kulök a ko tora, Mokosi kulök a ko rereka; Do aje ’doro gwoso na ’doro ’i ŋuto ko kamönyök i könisi na. A ŋutu liŋ ’dorone i gwien köti ko lepeŋ.

³⁵ A ŋutu liŋ poŋdi i sugga na Dawidi anyen ko tiŋdu lepeŋ i nyesu na kinyo i diŋit na tuparan; ama a Dawidi milyeji adi, Ti ŋun konakiŋdye nan sona ko lwölwöŋ kine köti, ko nan de a ’de ’deŋdya ambata kode nene ŋo tojo ko sömukö.

³⁶ a ŋutu liŋ ko meddi kine kulya a iŋge tulyöŋgu se gwoso i ŋo liŋ nagon mor a kon a tulyöŋgi se liŋ kune.

³⁷ Nyena a ŋutu kanyit liŋ se ko Yisaraele liŋ kuruŋdye i ŋilu lor adi ’bayin a ’deket na mor i tiŋdu na Abiner ŋuro lo Ner i tatua.

³⁸ A mor kulyani ko köliŋönök kanyit adi, Ta a ko den le adi ŋilo a matat ko a ŋuto lokukwön logon aje twan Yisaraele i lo lor lo le?

³⁹ Nan i lo lor gwe a lomunyan, ma ’di agu nan a welaki a mor sona; kilo ŋutu logon a Ŋwajik ti Seruya kilo a iŋgo köyö. Ti MATAT ropakiŋdye katoronyanit gwoso i toron nanyit.