2 Samuele 24 - Bibilia Buk na Ŋun nagon koti luŋu a

Dawidi a keŋdya ŋutu ti Yisaraele ko ti Yuda

¹ A woran na MATAT köti yuköki i ŋutu ti Yisaraele, a lepeŋ jujukiŋdye Dawidi i jakiŋdya na se kulya narok, kulya adi, Iti, kene ken ŋutu ti Yisaraele ko ti Yuda.

² A mor kulyani ko Yöaba ko dumalak ti kamörök logon gwon ko lepeŋ kulo adi, Iti ta i kötumitön liŋ ti Yisaraele, suluja Dan tojo Ber-seba, ko kene ta ken ŋutu anyen nan bubulö deŋdya ko se muda.

³ Ama a Yöaba kulyani ko mor adi, Pon mor duma liŋ, ti MATAT Ŋun ilot tupöŋe ŋutu kulo daŋin mia geleŋ lwölwöŋ gwon nase i na diŋit na gwoŋdi do nyuŋ memet se na; ama nyo nagon do ’de ’deggi kine ŋo pon mor duma liŋ?

⁴ Ama a kulyaesi ti mor iŋge te ’ya Yöaba ko dumalak ti kamörök. A kirut Yöaba ko dumalak ti kamörök iti kaŋo ko mor i komor i keŋdya na ŋutu ti Yisaraele.

⁵ A lepeŋat laŋaddi i nu pele na Yardene, a suluje Aroer i nu köji na gwon i kiden na pirit na ’dir, diraddu Gada tojo ko Yajer.

⁶ A se ’dure Gilada, tojo ko jur lo ŋutu ti Kiti tojo ko Kadesa; a se ’dure Dan, a suluje Dan a se girara teŋ ko Sidona,

⁷ a ’dure i köji na Turo nagon ko mariŋ, ko i köjinö liŋ ti ŋutu ti Kiwi, ko ti Kanana; a se iti tojo i jur lo loki na Yuda i Ber-seba.

⁸ A nagon lepeŋat aje wöröri jur liŋ nu, a se ’dure Yerusalema i mukök na yapala buŋwan ko perok merya murek.

⁹ A Yöaba tiŋdi mor momoret na kenet na ŋutu liŋ adi ŋutu aliŋan miajin budök kata i Yisaraele logon a iŋgo ko a kamörök, a ŋutu ti Yuda gwe a aliŋan miajin mukanat.

¹⁰ Ama a töili lo Dawidi iŋge lwö ’yu i mukök nagon nye aje keŋdya ŋutu nu. A Dawidi kulyani ko MATAT adi, Nan aje toroŋdya parik i na ŋo nagon nan a kon na. Ama nan momo ’yu do soŋinana pon MATAT, ’dumaddi na toron kaŋo köyö nan köliŋönit ilot, kogwon nan aje koŋdya ko tumökön duma parik.

¹¹ A nagon Dawidi aje ŋien ki i ko ’bure nu, a kulyaet lo MATAT poki ko nebi Gada ŋuto lo Dawidi logon a kametanit lo kulya na popo lo adi,

¹² Iti ko kulyani ko Dawidi adi, MATAT lo kulya sona adi, Nan a wulökin do ŋo musala; ti do wuluŋdye nene geleŋ nase, anyen nan böŋö konakin do lepeŋ.

¹³ A Gada poŋdi ko Dawidi ni a nyönyökökiŋdye lepeŋ kine kulya adi, Bia ti kiŋajin musala ti dyaŋ poki konut i jur le? Kode ti do wöwökine wöwöki ko merok kulök i komor ko yapala musala nagon se gwon i riggö na do nu? Kode ti twanti iŋgo poki konut i jur ko perok musala? Nyenagon yeyeji ko wuluŋdye ruket nagon nan toyitökin lepeŋ lo sunyuŋdyö nan lu.

¹⁴ A Dawidi waddi Gada adi, Nan gwon i nagusu; bia ti yi ’dorone ko MATAT i könin kogwon lepeŋ wowon konyen parik ko ŋutu; ama ti nan gwe ti ’doro ko ŋutu i könisi.

¹⁵ A kirut MATAT sunyukiŋdye Yisaraele twanti iŋgo suluja i ko ’bure tojo ko diŋit na wulwe nu; a ŋutu twatwane twatwa aliŋan merya buryo suluja Dan tojo Ber-seba.

¹⁶ A nagon malaika-tat riöddi könin lonyit tojo ko Yerusalema i tukaŋu na lepeŋ nu, a MATAT löpukuŋdye kaŋo i ŋinu riŋet, a kulyani ko malaikatat logon tutukaŋu ŋutu lo adi, Aje jo; teŋe könin ilot soŋinana. A malaikatat lo MATAT gwe nyona ko pirit gwutet na ’bolot na Arauna lo Yebusi lu.

¹⁷ A Dawidi jambi ko MATAT na meddi nye malaikatat logon tomöŋ ŋutu lu adi, Mete, nan logon a toroŋdya, nan aje koŋdya arabat; ama kine yidin a koŋdya nyo? Böŋö ti könin ilot möröni ko nan ko kötumit na baba.

¹⁸ A Gada poŋdi ko Dawidi ni i ŋilu lor, a kulyani ko lepeŋ adi, Iti ko dipakiŋdye MATAT pirit ’yuret na rubaŋgajin i pirit gwutet na ’bolot na Arauna lo Yebusi.

¹⁹ A Dawidi koŋdi gwoso na kulyari Gada, a iti tu gwoso nagon MATAT aje saŋi nu.

²⁰ A nagon Arauna ko boŋaddi kak, a lepeŋ metuŋdye mor ko köliŋönök kanyit poŋdya kanyit ni; a Arauna lupöni kaŋo, a dulakiŋdye komor nanyit kak ko mor i komor.

²¹ A Arauna pipije adi, Nyo nagon do a poŋdya ko ’dupiet ilot ni pon mor duma liŋ? A Dawidi nyobbi adi, Nan po konut ni i gwörö na na pirit gwutet na ’bolot, anyen dipakiŋdya MATAT pirit ’yuret na rubaŋgajin, anyen twanti lo böŋö totogwo ’da ko ŋutu kulo.

²² A kirut Arauna kulyani ko Dawidi adi, Joŋgi ko wukiŋdye ŋo nagon do ’de ’dekan kune pon mor duma liŋ. Makulo dwönin a ti rubaŋga lo ’yu ’yura ’buluŋ, ko tito gwutesi ti ’bolot ko gwolor ti dwönin a kaden na nanama.

²³ Sekine ŋo liŋ nagon nan Arauna a wukin do pon mor. A Arauna kulyani ko mor adi, Ti MATAT Ŋun ilot ruŋge do.

²⁴ Ama a mor kulyani ko Arauna adi, ’Bayin, ama nan de gwögworun se konut ko ropet nase. Nan ti bulö ’yurakiŋdya MATAT Ŋun liŋ rubaŋgajin kana ’bak ropet. A Dawidi kirut gwöruŋdye ŋinu pirit gwutet na ’bolot se ko dwönin, a ropakiŋdye pödöjin nagon temuŋdya a sekelejin merya mukanat.

²⁵ A Dawidi dipakiŋdye MATAT pirit ’yuret na rubaŋgajin nyu, a wukiŋdye rubaŋgajin lo ’yu ’yura ’buluŋ ko rubaŋgajin ti taliŋ. A kirut MATAT yiŋge momolesi ti Dawidi i kulya ti lu jur, a ŋilu twanti togwo ’dani to-gwo ’da i Yisaraele.