2 Samuele 23 - Bibilia Buk na Ŋun nagon koti luŋu a

Kulyaesi ti Dawidi ti ’dutet

¹ Nyena a kilo gwe a kulyaesi ti Dawidi ti ’dutet adi: Ŋilo a ’dolet lo Dawidi ŋuro lo Yisai, ŋilo a ’dolet lo ŋuto logon a todumala, logon Ŋun lo Yakobo a welakin a mor lo, ko a miri kayolonit lo saumajin ti Yisaraele.

² Mulökötyo lo MATAT a jambu köyö i kutuk, a kulyaet lonyit gwe köyö i ŋedeŋ.

³ Ŋun lo Yisaraele aje jambu, Lurutat lo Yisaraele aje jamakin nan adi, Ŋuto logon a kasaranit lo rigwo, logon a saŋu ko kujönö na Ŋun,

⁴ nye mo gwe gwoso seser na kolor i nyerun nanyit, gwoso diŋit na ko ’bure nagon ’dikolo ’bayin, gwoso kudu logon topunuŋdyö döru i kak.

⁵ ’Diri kötumit nio gwon sona ko Ŋun i swöt. Kogwon lepeŋ aje milyekiŋdyö nan tomoret na yeŋ nyin, nagon jojo i po liŋ ko a gwo ’dan ŋina a lwökit nio liŋ ko a ŋo nagon nan ’de ’dekan.

⁶ Ama ŋutu liŋ logon ti twöju Ŋun kulo gwon gwoso kikwa nagon korotoji mu ’diŋ; kogwon lepeŋat ti bulö ’du ’duma ko könin;

⁷ ama ŋutu logon korotoddu se kulo ködyö morga witiöt kode kito lo gor, a se iŋge totumö asut ko kimaŋ.

Ŋutu ti Dawidi logon a walan

⁸ A kine gwe a karin ti ŋutu walan lo gwon ko Dawidi kulo kweja adi, Yosepa-basebet ŋuto lo Takemon; lepeŋ a duma lo ŋutu walan musala; lepeŋ a lo wulek i rembu na ŋutu miajin budök, a rembi se i lor geleŋ.

⁹ A Elejara ŋuro lo Dodo, ŋuro lo Akoki, lo ’duki kanyit i mukök i kilo ŋutu walan musala. Lepeŋ köju gwon ko Dawidi i diŋit nagon se a lauŋdya ŋutu ti Pelesete logon a momora nyu i mörö kulu, a ŋutu ti Yisaraele iŋge kukutörö bot.

¹⁰ A lepeŋ ŋine ŋien a rembi ŋutu ti Pelesete tojo ko könin lonyit a rugugu a ’depakiŋdye i baŋdu. A MATAT tiŋdi telet a duma i ŋilu lor. A ŋutu kulu yitöni bot ko Elejara i mukök tuŋ i ryaggu na toro ’bo ti ŋutu lo tatua kulo.

¹¹ A gwe sona a Sama ŋuro lo Age Araratyo lo ’duki kanyit i mukök. A ŋutu ti Pelesete momori momora Leki nyu i melesen nagon ko logwu ’dik jore; a ŋutu kulu wöki wökön kapo ko ŋutu ti Pelesete i komor.

¹² Ama a nye gwo ’de go i kiden na ŋinu melesen, a gaji lepeŋ, a rembi ŋutu ti Pelesete; a MATAT tiŋdi telet a duma.

¹³ A ŋutu musala i kiden na ŋutu walan merya musala kulo lulurara kak, a ’dure ko Dawidi yu i diŋit na ’butun i kuggi na Adulam; a teŋ na ŋutu ti Pelesete aje ’beggu mera nase i pirit na ’dir na Repayim.

¹⁴ A i nu diŋit a Dawidi gwe i pirit ’danaet nago, a teŋ na ŋutu ti Pelesete logon a katiyuk kulo gwe Beteleme.

¹⁵ A Dawidi be ’yi be ’ya adi. A! Ko ködyö lele ŋuto kata a lepeŋ ködyö a jakin nan pioŋ na mamata i ŋilu kidi lo Beteleme logon nyona ko kötumit na mariŋ lu!

¹⁶ A kirut ŋutu walan musala kulo tulöddi i kiden na mera na ŋutu ti Pelesete, a ’dipuŋdye pioŋ i ŋilu kidi lo Beteleme logon nyona ko kotumit na mariŋ lu, a joŋdi ko Dawidi ni. Ama a nye tine ’bon möju kine pioŋ; a lepeŋ ’bukö-kiŋdye se kak ko MATAT i komor,

¹⁷ kulya adi, Ti nan gwe pajo i ŋo gwoso kine pon MATAT, i koŋdya nio sona. Ada lolor nagon nan bubulö möju rima ti kilo ŋutu logon a pakiŋdya ru nase sona? Nyenagon a lepeŋ tine ’bon möju kine pioŋ. Kine a ŋo nagon kilu ŋutu walan musala a kon.

¹⁸ A Abisai luŋaser Yöaba, ŋuro lo Seruya gwe a duma lo ŋutu walan merya musala kulu. A lepeŋ gwe a lo wulek i mörö ko ŋutu miajin musala ko gor nanyit, a rembi se, a lepeŋ köti kune kuön ko kilu ŋutu walan musala.

¹⁹ Lepeŋ a kono bia parik i kilu ŋutu walan merya musala, a iŋge tiki a duma lose; ama nye a ko ’dur gwoso ŋutu walan musala kulu.

²⁰ A Benaya ŋuro lo Yoyada gwe a wa, lepeŋ a ŋuto lo ŋo Kabasele; lepeŋ a kakonanit lo ŋo temejik; lepeŋ a tatuja ŋwajik murek ti Ariele Moaba yu. A nye köti iti kak a iŋge tatuja kömiru i dili i lor logon kak a muluwa ko luru duma lo lilik parik.

²¹ A nye iŋge rembu ŋuto lo Ejipeto, ŋuto lobot. Ŋilo ŋuto lo Ejipeto gwon ko gor kanyit i könin, ama a Benaya iti ko lepeŋ yu ko ture ka ’de, a nye riŋuŋdye gor nu kaŋo ko ŋuto lo Ejipeto lo i könin, a rembi lepeŋ ko gor nanyit nu.

²² Kine ŋo Benaya ŋuro lo Yoyada lo koŋdya, a lepeŋ köti iŋge kuön ko kilu ŋutu walan musala.

²³ Lepeŋ a kuön i kilu ŋutu walan musala, ama nye a ko ’dur gwoso ŋutu walan musala kulu. A Dawidi tiŋdi lepeŋ a duma lo katiyuk kanyit.

²⁴ A Asaele luŋaser Yöaba gwe a lele lo kilu ŋutu merya musala, se ko Elekanan ŋuro lo Dodo lo Beteleme,

²⁵ ko Sama lo Karoda, ko Elika lo Karoda,

²⁶ ko Kelese ŋuto lo Palati, ko Ira ŋuro lo Ikese lo Tekowa,

²⁷ ko Abiejer lo Anatot, ko Mebunai lo Kusa,

²⁸ ko Salamon lo Akoki, ko Marai lo Netopa,

²⁹ ko Kelebe ŋuro lo Bana lo Netopa, ko Ita i ŋuro lo Ribai lo Gibea na nyakwariat ti Benyamina,

³⁰ ko Benaya lo Piraton, ko Idai lo luruki ti Gasa,

³¹ ko Abi-alabon lo Arba, ko Ajemawet lo Bakurim,

³² ko Eliyakaba lo Salebon, ko ŋwajik ti Yasen, ko Yonatana,

³³ ko Sama lo Arara, ko Akiyam ŋuro lo Sarar lo Arara,

³⁴ ko Elipelet ŋuro lo Akasabai lo Maka, ko Eliam ŋuro lo Akitopele lo Gilö,

³⁵ ko Kesero lo Karmela, ko Parai lo Arba,

³⁶ ko Yiŋala ŋuro lo Natana lo Soba, ko Bani lo kötumit na Gada,

³⁷ ko Selek lo Amon, ko Nakarai lo po Berot ka ’dokonit lo tito möriesi ti Yöaba ŋuro lo Seruya,

³⁸ ko Ira lo kötumit na Yiter, ko Gareba lo kötumit na Yiter,

³⁹ ko Uriya ŋuto lo Kiti: lepeŋat liŋ a ŋutu merya musala wot buryo.