2 Samuele 22 - Bibilia Buk na Ŋun nagon koti luŋu a

Dawidi yo ’yu köli adi Ŋun a lwökun lepeŋ

¹ A Dawidi jambi ko MATAT ko kulyaesi ti lo köli i lor logon MATAT lwökuŋdye nye i könisi ti merok kanyit liŋ ko i könin lo Saula lu.

² A nye yoloni adi, MATAT a lurutat liŋ ko a mariŋ nio nago, ko a kalwökönit liŋ,

³ lepeŋ a Ŋun liŋ, ko a lurutat lio logon nan a ’danari lo, nye a ’buku gayet nio, ko a riŋit lwökit nio, nye a pirit nio nago ko a ’danaet nio, ko a kalwökönit liŋ; do a lwöggu nan i konaki arabat.

⁴ Nan luŋgu MATAT logon jujukin i pupura lo, a nan iŋge lwökö i könisi ti merok kwe.

⁵ Kogwon yala lo twan a lorga nan, a nye laruuŋdye nan kaŋo i kiden na pioŋ na jore, a kulya na totolikiŋdyö a baraŋdu i tokujöŋdu na nan;

⁶ nekenejin ti pirit na mulökö a lopakiŋdya nan kiden, lokesi tatuesi a görökiŋdyö köyö.

⁷ Nan a luŋgu MATAT i delyaesi kwe, a nan gwine ko Ŋun liŋ. A nye yiŋge gworo liŋ kanyit kadi, a gwien nio iŋge ’durökin kanyit i swö.

⁸ I nu diŋit a kak yeyeti yeyeta ko a yoyoŋgi yoyoŋga; köti a mukökö ti ’dikolo mijörö mijörö, a se böböŋdi böböŋdu kogwon nye a woran.

⁹ A köpuröt puriörö ki kanyit i kumesikön, a kimaŋ na tototumbo lupene kaŋo kanyit i kutuk; a pisek ti kimaŋ iŋge tuleun kaŋo ko lepeŋ.

¹⁰ Nye a du ’ya ’dikolo, a poŋdi kak; a mudwe logon adi ’dii gwe kak kanyit i mokosi.

¹¹ A nye iti i keruba ki, a ’daji ’daju; lepeŋ a meta ’dayaddu ko köpukön ti köbuŋot.

¹² Nye a teteŋdya mudwe a mariŋ nanyit, ’dikolo dumalak a kemia nanyit, se a narwök lulurö ko pioŋ.

¹³ A ki meme ’dekti meme ’dekta kanyit i komor, a pisek ti kimaŋ tuleŋ kaŋo.

¹⁴ A MATAT peji peja ki yu ko kipya lo ki, iŋkoi Katoŋanit lo ki liŋ jajambu.

¹⁵ A nye ŋoroddi loya, a torekiŋdye se; iye, a nye meme ’deggi meme ’degga, a riköddi se.

¹⁶ A kirut wökiesi metani meta, a togwo ’diesi ti kölökine kana, i riŋet na MATAT, i yuket duma na kumesikön kanyit.

¹⁷ Nye a suuŋdyö könin ki yu, a morgi nan.

¹⁸ A nye riŋaddi nan kaŋo i könin lo miriku liŋ iŋgo, ko i kaŋisak kwe, kogwon se a iŋgo köyö.

¹⁹ Se a ’durukin köyö loki i lor körit liŋ; ama a MATAT gwe a katökönit liŋ.

²⁰ A nye tolupöddi nan kaŋo tojo i pirit nagalaŋ; a nye riŋaddi nan kaŋo kogwon nye a lyöŋön ko nan.

²¹ MATAT a ropakiŋdya nan gwoso i kulya kwe na rigwo; a nye ropakiŋdye nan gwoso i kelan na könisi kwe.

²² Kogwon nan a kebbu kikolin ti MATAT, köti nan a ko wusaddu kaŋo ko toron ko ŋun liŋ i komor.

²³ Kogwon ’duŋesi kanyit liŋ gwon köyö i komor, nan a ko girara kaŋo i saresi kanyit lo wurö.

²⁴ A nan gwe ’bak kulya kanyit i komor, a nan tiji mugun nio ’bak tukwölöŋ.

²⁵ Nyenagon MATAT a ropakiŋdya nan gwoso i kulya kwe na rigwo, ko i kelan nio kanyit i komor.

²⁶ 1 ŋuto lolik pele do kwekiŋdya mugun a lolik pele; i ŋuto lo gwon rigwo do kwekiŋdya mugun a lo rigwo.

²⁷ I ŋuto loke do kwekiŋdya mugun a loke; i ŋuto lupalien a do kwekiŋdye mugun a lupalien.

²⁸ Do lwölwöggu ŋutu lo sasanya; ama konyen kulok gwon i meddya na kabulak ti ’borik anyen nyökuŋdyö se kak.

²⁹ Iye, do a lombo liŋ pon MATAT, do Ŋun liŋ loloja mudwe liŋ.

³⁰ lye, kogwon kulya kunök nan bubulö muddya teŋ na kamörök, koti kogwon kulya kunok ti Ŋun liŋ nan bubulö labara i lu swöt lo mariŋ.

³¹ Lo Ŋun, kiko lonyit a lo ’but liŋ; kulyaet lo MATAT a tema a iŋge rye a gwak; nye gaju ŋutu liŋ logon a wökön ko lepeŋ yu i ’dana kulo.

³² Kogwon ŋa logon a Ŋun, ti gwon a MATAT tuŋ le? Köti ŋa logon a lurutat, ti gwon a Ŋun likaŋ?

³³ Lo Ŋun a ’danaet liŋ iŋgo, ko a teten kiko liŋ a lo ’but ’bak ŋo naron.

³⁴ Nye a tiŋdu mokosi kwe gwoso ti ka ’bu, a nye tosi ’dakiŋdye nan ’bura i kusik ti merya.

³⁵ Nye a tojumukiŋdya könisi kwe i gor, anyen könisi kwe bubulö rokuŋdya daŋ nagon a mölwö.

³⁶ Do a tiŋdu nan ’buku gayet inot nagon do lwölwöggi na, a tokoyok inot tiŋdi nan i töduma.

³⁷ Do a tiŋdu nan pirit wöriet nagalaŋ, a mokosi kwe gwe a ko jeleta.

³⁸ Nan a kebbu merok kwe a tukaŋi se, a nan tine yitwe bot tojo se a tukara liŋ.

³⁹ Nan a tukar se; nan a reremoju se, nyena a se gwe a ko ŋien ki; a se ’do ’done kak köyö i mokosi.

⁴⁰ Kogwon do a pitakiŋdya riŋit möriet köyö i mukök; a do toduluŋdye kaŋisak kwe kak köyö i mokosi.

⁴¹ Do a tiŋdu merok kwe i löpukö-kiŋdyö na nan ki ’dirinö kase, a nan tukaŋi kaŋisak kwe.

⁴² Se a ga ’yu, ama lele ŋuto ’bayin lo lwöggu se; se a gwikin ko MATAT, ama lepeŋ a ko nyoŋ se.

⁴³ Nan a jikin se adi minyit, gwoso ŋutu ti kak; nan a muyugga se, a ryoggi se gwoso wo ’do ’do ti kikolin.

⁴⁴ Do aje lwökuŋdyö nan i rerenye-si ti ŋutu kwe; do aje tiŋdu nan a kwe lo jurön; gweya na ŋutu logon nan ti den kulo a kitakiŋdya nan.

⁴⁵ A lwaka poŋdi köyö ni i ’bu ’bud-dya na nan; ’de ’de kijek ko se a yiŋ kulya kwe a se iŋge twö nan.

⁴⁶ Lwaka gwe ’bak yenet i töilyet; a se lupene kaŋo i piritön ’danaesi kase böböpuŋdyö.

⁴⁷ MATAT gwon jörun; ti lurutat liŋ purani pura, ti Ŋun logon a lurutat liŋ ko a kalwökönit liŋ ti ’dulukine ki,

⁴⁸ ma ’di Ŋun logon a ropakiŋdya nan merok kwe ko a duluŋdya gweyajin ti ŋutu kak köyö i mukök.

⁴⁹ A nye lwöggi nan i könisi ti merok kwe; do aje ’dulukiŋdya nan ki totoŋun ŋutu kaŋisak kwe, do aje ripuŋdya nan kapo i könisi ti ŋutu katukarak.

⁵⁰ Nyenagon pon MATAT, a nan yuöggi do i kiden na jurön, a nan de yulukiŋdye do puresi ’diŋdya karin kunök.

⁵¹ Ŋun titiŋdu lwökit duma ko ŋuto logon nye a welakin a mor lo, a nye kwekiŋdye Dawidi ko nya-kwariat kanyit ŋupi ŋupi nyaŋu nanyit nagon ti ’duddyö kwöŋ.