2 Samuele 21 - Bibilia Buk na Ŋun nagon koti luŋu a

Ŋulu ti Gibeon a ropakiŋdya ŋutu kase i kotumit na Saula

¹ A dyaŋ gwe kata ko kiŋajin A musala i perok logon Dawidi sasaŋi kulu; a Dawidi ga ’yi komor na MATAT. A MATAT kulyani adi, Toron kata ko Saula ko kötumit nanyit kogwon rima ti ŋutu ti Gibeon na ’bukörö lepeŋ kunu.

² A mor luŋgi ŋutu ti Gibeon. Ŋutu ti Gibeon ’bayin a ŋutu ti Yisaraele, ama lepeŋat a pitönö ti ŋutu ti Amori; agu ma ’di köju ŋutu ti Yisaraele a milyeju i kölökiŋdyö na se, ama Saula aje ga ’yu tatuja se kogwon pusök nanyit na ŋutu ti Yisaraele ko ti Yuda.

³ A Dawidi pipije ŋutu ti Gibeon kulo adi, Nan ködyö konakin ta nyo? Köti nan ködyö koŋdya nyo anyen toligga kine kulya, anyen ta böŋö ’boroja ŋutu lomoriot ti MATAT?

⁴ A ŋutu ti Gibeon kulo nyobbi lepeŋ adi, ’Bayin a kulya ti pödöjin kode ti dakap i kiden nikaŋ ko Saula kode ko kötumit nanyit; köti ’bayin a kulya kaŋ i tiŋdu na lele ŋuto i tatua i Yisaraele. A lepeŋ pipije adi, Yeyeet nasu a nyo nagon nan konakin ta?

⁵ A se nyobbi mor adi, Ŋuto logon a tutuŋgö yi ko ga ’yu köŋu yi anyen yi gwon ’bak pirit asut i koresi ti Yisaraele liŋ lo,

⁶ ti ŋwajik kulye buryo kanyit wukine yi anyen yi bubulö to ’yu se ko MATAT i komor i mere lo MATAT lo gwon Gibeon lu. A mor kulyani adi, Nan de wuwukin ta se.

⁷ A mor kö ’yi Mepiboset ŋuro lo Yonatana tore lo Saula, kogwon milye lo MATAT lo gwon i kiden nase Dawidi ko Yonatana ŋuro lo Saula lo.

⁸ a mor joŋgi ŋwajik murek ti Risepa ŋuro na Aya, logon lepeŋ a yuŋwekin Saula kulo, logon a ko Arumoni ko Mepiboset; ko köti ŋwajik mukanat ti Meraba ŋuro na Saula, logon nye a yuŋwekin Adriele ŋuro lo Barujilai Mekolatyo kulo;

⁹ a nye wukiŋdye se ko ŋutu ti Gibeon i könisi, a se to ’yi lepeŋat i mere ki ko MATAT i komor, a kilo buryo twatwane twatwa i pirit na geleŋ. Lepeŋat tatua i perok ti kokwe ti ’butun, i suluet na ŋera na ’bolot saora.

¹⁰ A Risepa ŋuro na Aya ’dumuŋdye boŋgwat terekesi a petakiŋdye a si ’daesi kanyit i lurutat loki suluja i suluki na ’butun tojo ko diŋit na kiser; a lepeŋ paggi kwen i diŋit na tuparan, ko gwuruŋin i diŋit na tukwaje an nyesu öpuö kune.

¹¹ A ŋutu takiŋdye Dawidi ŋo nagon Risepa ŋuro na Aya köliŋönit na Saula aje kon na,

¹² a Dawidi iti tu a ’dumaddi kuyu ti Saula, ko kuyu ti ŋuro lonyit Yonatana i ŋutu ti Yabesa-gilada, kilu ŋutu köju a kokoladdu öpuö kase i terere na Bete-san, i nu pirit nagon ŋutu ti Pelesete a leleji se ki nu, i lor logon Pelesete tatuje Saula Giliboa lu.

¹³ A Dawidi baruŋdye nyu kuyu ti Saula ko kuyu ti ŋuro lonyit Yonatana; a se momori i pirit na geleŋ kuyu ti kilu ŋutu logon a tolo kulu.

¹⁴ A se nuŋge kuyu ti Saula ko ti ŋuro lonyit Yonatana i jur lo Benyamina Sela yu, i gulöm na monye lonyit Kisi; a lepeŋat iŋge kon ŋo liŋ nagon mor a sarakin kune. A i mukök na kine kulya a Ŋun yiŋge momolesi ti lu jur.

Abisai a tatuja ŋuto lojo parik logon ga ’yu tatuja Dawidi

¹⁵ A ŋutu ti Pelesete köti möröni mörö ko ŋutu ti Yisaraele, a Dawidi iti tu ko köliŋönök kanyit kulo, a se möröni mörö ko ŋutu ti Pelesete; a Dawidi iŋge dara.

¹⁶ A Yisebibenoba ga ’yi tatuja Dawidi. Lepeŋ a lo nya-kwariat ti ŋutu lojo parik; ŋilu ŋuto gor nanyit temuŋdya a sekelejin miajin musala ti mölwö, ko a torakiŋdya baŋdu ludukotyo kanyit i mukök.

¹⁷ Ama a Abisai ŋuro lo Seruya ’dure i parakiŋdya na Dawidi, a möröni möro ko ŋuto lo Pelesete lo, a tatuje lepeŋ. A kirut ŋutu ti Dawidi milye-kiŋdye lepeŋ adi, ’Diri ’diri do ti bulö moraddu köti koyi i gor asut, an do logon a lombo lo Yisaraele lo ko peŋa.

Ŋutu ti Dawidi a tatuja ŋutu lojo parik

¹⁸ A ko gwe sona i mukök nanyit, a mörö köti gwe kata Gobo ko ŋutu ti Pelesete; a Sibekai ŋuto lo Kusa rembi Sapa, logon a lo nyakwariat ti kilu ŋutu lojo kulu.

¹⁹ A mörö na nyöggi köti Gobo ko ŋutu ti Pelesete; a Elekanan ŋuro lo Yare-oregim lo po Beteleme lo rembi Goloyota ŋuto lo Gata, logon kito lo gor nanyit gwon gwoso gwuluŋi lo kagweyanit lo boŋgwat.

²⁰ A mörö köti nyöggi nyöggu Gata, ama a lele ŋuto gwe nyu logon ko mugun a duma parik ko morin buker buker ti könisi ko ti mokosi kanyit, logon momora liŋ a merya murek wot iŋwan. Nye köti a lo nyakwariat ti kilu ŋutu lojo kulu.

²¹ A na lauŋdye nye ŋutu ti Yisaraele nu, a Yonatana ŋuro lo Simei luŋaser Dawidi rembi lepeŋ.

²² A kilu ŋutu iŋwan gwe a ti nyakwariat ti kilu ŋutu lojo ti Gata; a Dawidi ko köliŋönök kanyit kulo iŋge tatu se.