2 Samuele 20 - Bibilia Buk na Ŋun nagon koti luŋu a

Seba a renya sara ko Dawidi

¹ A lele ŋuto mök gwe nyu karin kanyit a Seba, ŋuro lo Bikiri Benyaminatyo; a lepeŋ kuddye tore adi, Kulya kaŋ ’bayin ko Dawidi, yi ’bak lomore i ŋuro lo Yisai;ta ŋutu liŋ ti Yisaraele, yitöni ta kasu i midijik!

² A ŋutu liŋ ti Yisaraele kukute bot ko Dawidi, a kepoddi Seba ŋuro lo Bikiri; ama a ŋutu ti Yuda ’depakiŋdye go ko mor lose, suluja Yardene tojo ko Yerusalema.

³ A Dawidi ’dure kanyit mede Yerusalema; a mor joŋgi köliŋönök kanyit wate puök nagon nye a kölökin i tiju na mede kune, a tiŋdi lepeŋat i tiyu, a tunyeji se, ama a tine dotori se. A lepeŋat rerekani nyu tojo ko lor lose twaet, a se si ’dani gwoso karu ’bejin.

⁴ A mor kulyani ko Amasa adi, Tunaki nan ŋutu ti Yuda i pirit na geleŋ i ŋerot na perok musala, ti do ko mugun inot agu gwe kata.

⁵ A Amasa iti i tuŋdya na ŋutu ti Yuda; ama a lepeŋ karaki karakin i diŋit nagon a tuköki lepeŋ nu.

⁶ A Dawidi kulyani ko Abisai adi, Soŋinana Seba ŋuro lo Bikiri de kökonakin yi ŋo naron lwö-lwöŋ Abisaloma; bia ’dumuŋdye köliŋönök ti duma ilot ko kepoddi lepeŋ, an lepeŋ ko morga köjinö nago na titiyu i ’de ’ya na mugun.

⁷ A Abisai ko Yöaba, ko kamörök logon a Kereti ko Peleti, se ko ŋutu liŋ walan, iti kaŋo Yerusalema i kepöddu na Seba ŋuro lo Bikiri.

⁸ A nagon lepeŋat aje ’durökin i ŋurupit duma lo gwon Gibeon lu, a Amasa poŋdi i rum ko se. A Yöaba iŋge jupu boŋgwat ti gor, ko kamba na gwon ko baŋdu kanyit i soko ’bo a dukuki kanyit i mukök i loki nase, a na tiri lepeŋ ŋerot nu, a baŋdu lo ’dorone kak.

⁹ A Yöaba kulyani ko Amasa adi, Gwon da luŋaser liŋ, do a lo ’but? A Yöaba mokuŋdye Amasa ko könin lonyit lutaten kanyit i kupir ti nyekem, anyen ’biyuŋdya lepeŋ.

¹⁰ Ama a Amasa gwe a ko tiriku baŋdu lo gwon ko Yöaba i könin lu, a Yöaba soji lepeŋ kanyit i pele, a moyok wuki kak, ama lepeŋ a ko nyakakin nene daŋ tomurek, a nye twane twan. A Yöaba ko Abisai luŋaser lonyit kepoddi Seba ŋuro lo Bikiri.

¹¹ A lele ŋuto lo Yöaba gwo ’de gwo ’dan ko Amasa nyona, a kulyani adi, Ko ŋuto logon nyanyar Yöaba, kode ŋona a lo Dawidi, ti nye kepoddi Yöaba.

¹² A Amasa gwe kak i kiko duma röröktu i rima lukata. A ŋutu liŋ lo wöwörö ko a met lepeŋ kulo gwo ’de gwo ’dan; a lu ŋuto ko meddi adi ŋutu liŋ gwogwo ’di, a nye ’dokoddi mugun na Amasa mu ’diŋ i kiko yu, a rapakiŋdye boŋgo kanyit loki.

¹³ a nagon mugun na Amasa aje ’doko kaŋo i kiko nu, a ŋutu liŋ lwöŋöddi ko Yöaba i mukök anyen kepöddu Seba ŋuro lo Bikiri.

¹⁴ A Seba lwöŋöddi lwöpöddu i kötumitön liŋ ti Yisaraele tojo Abele na Bete-maka; a ŋutu liŋ ti Bikiri mo-mori momora a kepoddi lepeŋ lukata.

¹⁵ A ŋutu liŋ logon gwon ko Yöaba kulo ko ’dure, a tumakiŋdye lepeŋ Abele na Bete-maka lukata; a lepeŋat ’du ’yi ’dome duma lo liŋo i lorga na köji anyen mörörikin lepeŋ, a ’dome gwe nyona ko mariŋ na kaŋo na köji; a se gwe i jogga na gorom nu anyen dukakiŋdya lepeŋ kak.

¹⁶ A nene ŋuto nakoŋ maraŋgi maraŋgu köji lukata adi, Yakulo, yiŋge ta, yiŋge ta! Tamaki ta Yöaba adi ti lepeŋ po ni, anyen nan bubulö jambu ko lepeŋ.

¹⁷ A lepeŋ miju nyona kanyit ni; a ŋuto na pipije adi, Do a Yöaba le? A lepeŋ nyobbi adi, Nan a nye. A ŋuto na kulyani ko lepeŋ adi, Yiŋge kulyaesi kwe nan köliŋönit inot. A nye nyobbi adi, Nan lo yiyiŋga.

¹⁸ A lepeŋ kulyani adi, A jama ’beron adi ŋo nagon a piya Abele kune aje tema-kiŋdya.

¹⁹ Nan a nene nase nagon sisi ’da ko taliŋ ko a katwöyönit i Yisaraele; do ga ’yu köŋu köji nagon a nene ŋote na Yisaraele; nyo nagon do yöŋö tutuŋgö lomore na MATAT?

²⁰ A Yöaba waddi adi, A ’a, ’bayin sona, nan pajo i kine kulya, nan a ko po i tutuŋgö kode i köŋu na köji.

²¹ Kine kulya ti gwon sona. Ama ŋuto lele lo merya ti Epuraima luŋu a Seba ŋuro lo Bikiri, a ŋikin i mörö ko mor Dawidi; ka ’de wukiŋdye ta nan lepeŋ geleŋ, a nan de iti tu i na köji. A ŋuto na kulyani ko Yöaba adi, Mete, yi de gugubakin do kwe nanyit i gorom loki.

²² A nu ŋuto ko koŋon nanyit iti ko ŋutu liŋ ti köji. A lepeŋat ’duŋuŋdye kaŋo kwe na Seba ŋuro lo Bikiri, a gubaddi ko Yöaba yu. A kirut lepeŋ kuddye tore a se reki rekin i ŋinu köji, ŋutu liŋ geleŋ geleŋ kase i midijik. A Yöaba yitöni Yerusalema ko mor yu.

Ŋutu ti miri na Dawidi

²³ A Yöaba gwe a duma lo kamörök liŋ ti Yisaraele; a Benaya ŋuro lo Yoyada gwe a duma lo kamörök logon a Kereti ko Peleti;

²⁴ A Adoram gwe a duma lo ŋutu lo ri ’diki i kita; a Yosa-pata ŋuro lo Akiluda gwe a katoyeye-onit;

²⁵ A Sewa gwe a kawurönit; a Sadok ko Abyatar gwe a koanejin;

²⁶ a Ira ŋuto lo Yair köti lo gwe a koane lo Dawidi.