2 Samuele 17 - Bibilia Buk na Ŋun nagon koti luŋu a

Jujuwet na Kusai a te ’ya jujuwet na Akitopele

¹ A Akitopele kulyani ko Abisaloma adi, Ti nan wuluŋdye ŋutu aliŋan puök wot murek, a nan de ŋine ŋien anyen kepöddu Dawidi i lo tukwaje.

² Nan de ’du ’dur ko lepeŋ yu i diŋit nagon lepeŋ aje doddya ko gwe a lomunyan, a nan de tokujöŋdi lepeŋ; a ŋutu liŋ lo gwon ko lepeŋ kulu de wöki wökön. A nan mo rimikiŋdye mor kak ka ’de,

³ a nan mo nyökuŋdye ŋutu liŋ bot konut ni, gwoso na nyöm-we ’i ŋuro ’diet ko lalet lonyit mede na. Do ga ’yu ru na ŋuto geleŋ tuŋ, a ŋutu liŋ mo gwe ko taliŋ.

⁴ A kilo kulyaesi iŋge tulyöŋgu Abisaloma ko temejik liŋ ti Yisaraele.

⁵ A Abisaloma kulyani adi, Luŋi ta Kusai Arukatyo lo köti, anyen yi yiŋuŋdya ko lepeŋ de jambu ada.

⁶ A Kusai ko ’dure ko Abisaloma ni, a Abisaloma kulyani ko lepeŋ adi, Akitopele aje jambu sona; ti yi ŋona koŋdi gwoso na jujuje nye na le? Ko ’bayin sona a do jamuŋdye kunök.

⁷ A kirut Kusai waddi Abisaloma adi, Jujuwet nagon Akitopele a tukun i na diŋit na ’bayin a na ’but.

⁸ A Kusai kulyani adi, Do a den adi munyi ko ŋutu kanyit a ŋutu walan, soŋinana lepeŋat a woran parik gwoso gworoŋ nagon torela kanyit a ripaji mu ’diŋ yu. Köti munyi a ŋuto lokoŋ i gor; lepeŋ de ti doto i tukwaje ko ŋutu kulu i pirit na geleŋ.

⁹ Meddi, ma ’di i na diŋit lepeŋ aje ’delakiŋdya mugun i nene dili, kode i nene pirit. A ko lepeŋ a ’dukin i kulye kasu i mörö na kokwe, a nye logon a yiŋga lo de kulyani adi, Kulye ŋutu kakepok ti Abisaloma aje tatua.

¹⁰ A ma ’di ködyö ŋuto wa logon töili lonyit gwoso lo kömiru lo mo roponi roŋo asut; kogwon ŋutu liŋ ti Yisaraele a den adi munyi a ŋuto wa, ŋutu lo gwon ko lepeŋ kulu a ŋutu walan köti.

¹¹ Ama yeyeet nio adi ti ŋutu liŋ ti Yisaraele momoruŋdye konut ni suluja Dan tojo Ber-seba, gwoso sese na kijit na tör i tojore nase, a ti do ko mugun inot iti i gor.

¹² A kirut yi de ’bunyö-kiŋdye lepeŋ i nene pirit nagon lepeŋ gwon kata nu. A yi mo muluje lepeŋ gwoso na muluje puŋutut kak na; a lele ŋuto geleŋ de gwe ’bayin lo pituŋdyö, ma ’di lepeŋ ko ŋutu kanyit liŋ.

¹³ Ko lepeŋ a mijörö bot tojo ko nene köji a ŋutu liŋ ti Yisaraele de joŋdi patala i ŋinu köji, a yi de piköddi ŋurupö kanyit tojo ko loro lukata, teŋ ko nene ŋurupit geleŋ tine kölöki nyu.

¹⁴ A Abisaloma ko ŋutu liŋ ti Yisaraele kulyani adi, Jujuwet na Kusai Arukatyo nagon a na ’but lwölwöŋ jujuwet na Akitopele. Kogwon MATAT aje teteŋdya adi jujuwet na ’but na Akitopele ködyö tetela, anyen MATAT bubulö tiŋdu toron ko Abisaloma i kwe.

¹⁵ A Kusai kulyani ko Sadok ko Abyatar koanejin kulo adi, Akitopele a jujuja Abisaloma ko temejik ti Yisaraele ko yeyeet gwoso ŋina; ama nan lo a jujuja ko yeyeet gwoso na.

¹⁶ Nyenagon sunyuki Dawidi lore ’de ’de adi, An do ko doto i ŋilo tukwaje i laŋesi ti kare i yöbu lukata, ama kegga laŋaddi i nu pele; an mor ko ŋutu kanyit liŋ ko tutuŋöji asut.

¹⁷ A Yonatana ko Akimasa gwe i möŋdu Ene-rŋgele; a nene köliŋönit yeŋ wörö i yekakiŋdya na se liŋio, a lepeŋat tu nyönyökökiŋdye mor Dawidi; kogwon lepeŋat ti bulö lupö köji kata an ko meta.

¹⁸ Ama a lele ŋuro iŋge met se; a lepeŋ iti i takiŋdya na Abisaloma; a kirut se murek liŋ iti tu ’de ’de, a ’dure ko lele ŋuto mede na gwon Bakurim yu, logon gwon ko kidi kanyit i ’baŋ, a se lupöni i lukata na Ŋilu kidi.

¹⁹ a ŋote ŋinu mede ’dumuŋdye muket a peta-kiŋdye i kutuk na lu kidi, a totorekiŋdye ’bolot i loki nanyit; a gwe a ko dena asut.

²⁰ A nagon köliŋönök ti Abisaloma ko ’duröki ko nu ŋuto mede, a se pipije lepeŋ adi, Kuliya ko Akimasa ko Yonatana? A ŋuto na waddi lepeŋat adi, Se aje laŋgu i nu pele na loro. A nagon lepeŋat aje ga ’yu a tine ryö se nu, a lepeŋat yitöni Yerusalema.

²¹ A i mukök na tu nase, a ŋutu kulo lupuŋdye kaŋo i kidi, a iti tu a takiŋdye mor Dawidi. A lepeŋat kulyani ko Dawidi adi, Ŋine ŋien ko laŋaddi i nu pele na kare ’de ’de; kogwon Akitopele aje jujuja ko yeyeet gwoso ŋina i mörö ko do.

²² A kirut Dawidi ŋine ŋien ko ŋutu kanyit liŋ, a lepeŋat laŋgi laŋgu Yardene; a ko kak aje baŋun a ŋuto gwe ’bayin logon a ko nyuŋ laŋgu Yardene.

²³ A Akitopele ko meddi adi jujuwet nanyit a ko kona, a lepeŋ toŋi kaine nanyit, a iti köji kanyit mede yu. A nye tetenakiŋdye mede nanyit i miru ’bura, a to ’yi to ’yu mugun, a twane twan, a nukani ko monye lonyit i gulöm.

Dawidi a wökön Makanayim

²⁴ A Dawidi ’dure Makanayim. A Abisaloma se ko ŋutu liŋ ti Yisaraele laŋgi Yardene.

²⁵ a Abisaloma aje tiŋdu Amasa a duma lo kamorök ko Yöaba i pirit. A Amasa gwe a ŋuro lo lele ŋuto karin kanyit a Yitara Yisa-maeletyo, lo yemba Abigaila ŋuro na Nakasa kiaser Seruya ŋote Yöaba.

²⁶ A ŋutu ti Yisaraele ko Abisaloma ’beggi mera i jur lo Gilada.

²⁷ A Dawidi ko ’dure Makanayim, a Sobi ŋuro lo Nakasa lo po Raba na ŋutu ti Amon, ko Makir ŋuro lo Amiele lo po Lodebar, ko Barujilai Giladatyo lo po Rŋgelim kulo lo ’dure.

²⁸ A se joŋdi dotoesi, ko sakanyan, ko sapya, ko ’bulusin ka ’de ka ’de, ko ’bolot na jiö, ko ’bolot lo kelo, ko lo ŋutu, ko logwu ’dik,

²⁹ ko siwatat, ko le na gworan, ko köbilu ko gwoŋali na kisuk, anyen Dawidi ko ŋutu kanyit kulo nyönyo; kogwon lepeŋat a kulya adi. Ŋutu kulo a magora ko aje doddya, a gwe ko kure i yöbu yu.