2 Samuele 15 - Bibilia Buk na Ŋun nagon koti luŋu a

Abisaloma a toŋiju ŋutu anyen renya sara ko Dawidi

¹ A ko gwe sona i mukök na ’kine kulya, a Abisaloma gala-kiŋdye mugun arabia, ko kusanjin na jiggö arabia, ko ŋutu merya mukanat logon wöwöki kanyit ŋerot.

² A Abisaloma yeoe ŋien ki ’beron, a gwogwo ’di-ne i merete lo kiko logon lupe köji kata i kötumit; a ko lele ŋuto gwon ko putet logon ködyö lilia ko mor, a Abisaloma yeŋ luŋgi lepeŋ a kulyani ko lepeŋ adi, Do poŋdya i nan köji? A ko lepeŋ a kulya adi, Köliŋönit ilot a lo nene kötumit na Yisaraele,

³ a Abisaloma ködyö kulyani ko lepeŋ adi, Mete, kulya kunök a na ’but ko a gwak; ama yumi lo mor ’bayin logon ködyö yioga kulya kunök.

⁴ A Abisaloma koti kulyani adi, Bia ko ködyö nan a tiki a kasaranit lo jur, a ködyö ŋutu liŋ geleŋ geleŋ logon ko putesi kase kode ko kunie kulya kilo böŋo poŋdi köyö ni, a nan ’duŋökiŋdye lepeŋ putet lonyit rigwo.

⁵ A gwe sona, na miŋuŋdye ŋuto nyona ko lepeŋ i twöju na nye nu, a nye kalabbi lepeŋ a ’biyuŋdye nye.

⁶ A Abisaloma konakiŋdye ŋutu liŋ ti Yisaraele sona logon a poŋdya ko mor ni i liliki na putesi kase kulo. Nyena a Abisaloma iŋge lulukara töilyet ti ŋutu ti Yisaraele sona.

⁷ A i mukök na kiŋajin iŋwan, a Abisaloma kulyani ko mor adi, Böŋö kölörö nan i koŋdya na milye liŋ Keberon yu, logon nan köju a milyekin MATAT lu.

⁸ Kogwon nan köliŋönit ilot a milyeju i diŋit na gwoŋdi nan Gesur i jur lo Aram nu, adi, Ko MATAT mo ’diri a nyökuŋdyö nan Yerusalema ni, a nan mo kitakiŋdye MATAT.

⁹ A mor kulyani ko lepeŋ adi, Iti ’bura. A lepeŋ ŋine ŋien a iti Keberon.

¹⁰ Ama a Abisaloma soŋdi luyökie kulye a lwön i kötumitön liŋ ti Yisaraele kulya adi, Ko ta a yiŋga tore i kuta kulyani ta ’de ’de adi,

¹¹ Abisaloma lo gwe a mor Keberon! A Abisaloma iti ko ŋutu miajin murek ti Yerusalema logon a luŋuji a kömu, a lepeŋat iti ko töilyet loke a ko den nene ŋo.

¹² A nagon Abisaloma gwe i ’duŋgö na rubaŋgajin nu, a nye luŋgi Akitopele ŋuto lo Gilö, kajujuwanit lo Dawidi, anyen po kanyit i köji nagon a Gilö. A ŋutu kamwönyök kulo gwe jore a löpukuŋdye ko Abisaloma i swöt.

¹³ A ŋuto lo ’dure ko Dawidi ni, a kulyani adi, Töilyet ti ŋutu ti Yisaraele tirikuni Abisaloma.

¹⁴ A Dawidi kulyani ko köliŋönök kanyit liŋ lo gwon ko nye Yerusalema yu kulo adi, ŋine ta ki, ti yi wöki ta wökön, kogwon koyi a ko koŋdya sona a lele likaŋ gwe ’bayin logon de lwöggu mugun ko Abisaloma i könin. Nyoŋgi ta nyoŋga, an lepeŋ ko ryö yi ’de ’de, an joŋdya toron kayaŋ loki i tukaŋu na köji ko baŋdu.

¹⁵ a köliŋönök ti mor kulo kulyani ko lepeŋ adi, Mete, yi köliŋönök kulök gwon ajo i koŋdya na ŋo nagon do mor duma likaŋ a wulun na.

¹⁶ A mor iti tu ko kötumit nanyit liŋ kanyit i mukök. A mor kölökiŋdye köliŋönök kanyit puök nawate i tiju na mede.

¹⁷ A mor iti tu ko ŋutu liŋ kanyit i mukök; a se gwo ’de i kadi na ’dutet na köji.

¹⁸ A köliŋönök kanyit liŋ lwöŋöddi lwöpöddu kanyit yu, ko kamörök liŋ logon a Kereti ko Peleti, ko ŋutu liŋ miajin buker ti Gata, logon köju a kipuŋdyö lepeŋ Gata kulo, a lwöŋöddi lwöpöddu ko mor i komor.

¹⁹ A kirut mor kulyani ko Ita i ŋuto lo Gata lo adi, Nyo nagon do köti a moruŋdya koyi? Yitöni bot ko si ’dani ta ko mor, kogwon do a lepetyo, ko köti do a wökun kaŋo i jur losu.

²⁰ Do gwoso lo poŋdya kaje, nyena nan bubulö tiŋdu do i wörö ki koyi ada i lo lor? Kogwon nan lo wöki i pirit na ryö nan. Yitöni bot ko joŋgi luŋösurök ko do i pirit na geleŋ; ko ti nyaret na MATAT nagon ti ’duddyö na ko to ’diri nanyit ti gwe ko ta.

²¹ Ama a Ita i nyobbi mor adi, ’Diri gwak gwoso na gwoŋdi MATAT na ko gwoso na gwoŋdi do mor duma liŋ na, ’diri ko do pon mor duma liŋ de gwon ya kode i twan kode i ru, a nan köliŋönit ilot de gwe nyu köti.

²² A Dawidi kulyani ko Ita i adi, Iŋgo, laŋaddi i nu pele. A Ita i ŋuto lo Gata lo laŋaddi laŋaddu ko ŋutu kanyit liŋ, ko lupudiet liŋ logon gwon ko nye kulo.

²³ A jur liŋ gwiörö ki parik i diŋit nagon ŋutu liŋ gwe i laŋaddu nu, a mor köti ko mugun nanyit laŋaddi i nu pele na loro Kidi-rona, a ŋutu liŋ laŋaddi laŋaddu i kiko lo tu i yöbu.

²⁴ A Abyatar ko ’dure, a Sadok ko Lewijin liŋ logon ’doggu saŋduk na tomoret na Ŋun kulo köti lo ’duröki; a lepeŋat ’dukukiŋdye saŋduk na Ŋun kak tojo ko ŋutu liŋ aje lwöpöddu kaŋo köji kata.

²⁵ A mor kulyani ko Sadok adi, Nyökörö ta saŋduk na Ŋun köji kata. Ko ködyö nan a ryeju ’busan ko MATAT i komor, a lepeŋ ködyö nyökuŋdye nan anyen tiŋdu nan i meddya na lepeŋ ko kadi nanyit;

²⁶ ama ko lepeŋ a kulya adi nye ’bak lyöŋön ko nan, mete, nan malo, ti lepeŋ konakiŋdye nan ŋo nagon nye a met a na ’but kanyit na.

²⁷ A mor köti pipije koane Sadok adi, Do ti gwon a kametanit lo kulya na popo le? Yitöni ta köji yu ko taliŋ, ta ko ŋwajik kasu murek logon a ko Akimasa ŋuro ilot ko Yonatana ŋuro lo Abyatar.

²⁸ Meddi, nan de mömöŋdu i laŋesi ti kare i yöbu lukata tojo ko do a sunyukiŋdyö nan lore i tukökiŋdyö na nan.

²⁹ A Sadok ko Abyatar nyököddi saŋduk na Ŋun na Yerusalema; a se möŋdi nyu.

³⁰ Ama a Dawidi kije ki i mere lo Jeitun, gwigwiörö ko kwe nanyit a mukö, a nye wöröni ’bak kamuka; a ŋutu liŋ logon a tu ko lepeŋ kulo köti muŋge kusik kase, a se kije ki gwigwi-örö.

³¹ A Dawidi iŋge taki adi, Akito-pele kata i kiden na kilu ŋutu lo momora a lwön ko Abisaloma i mwön ko do kulo. A Dawidi kulyani adi, Pon MATAT, böŋö löpuŋge jujuwesi ti Akitopele anyen gwon ’bak ’bulit.

³² A na ’durökiŋdye Dawidi i kwe na mere nagon a pirit kwakwaset na Ŋun nu, a Kusai Arukatyo poŋdi i rum ko lepeŋ, ko boŋgo nanyit a kerenya ko kujöŋ kanyit i kwe.

³³ A Dawidi kulyani ko lepeŋ adi, Ko do a moraddu ko nan a do mo tiŋdi wörö nio i tu go.

³⁴ Ama ko do a yitö köji a do kulyani ko Abisaloma adi do gwe a köliŋönit lonyit lo mor; do soŋinana de gwe a köliŋönit lonyit gwoso na gwoŋdi do köju a köliŋönit liŋ logon a monye lonyit nu. A do de kirut lopukö-kiŋdye nan jujuwesi ti Akitopele.

³⁵ Ti gwon sona le adi koanejin kulo ko Sadok ko Abyatar gwon kasu nyu? Nyenagon ŋo liŋ nagon do a yiŋun i kadi na mor kune nyönyököki koanejin logon a ko Sadok ko Abyatar.

³⁶ Meddi, ŋwajik kase murek logon a ko Akimasa ŋuro lo Sadok, ko Yonatana ŋuro lo Abyatar kulu gwon ko lepeŋat nyu. Do de bubulö sunyuŋdyö lepeŋat anyen ko takiŋdya nan liŋio liŋ logon do a yiŋun kulu.

³⁷ A Kusai ju lo Dawidi ’duröki i köji lukata i diŋit na lupöri Abisaloma Yerusalema nu.