2 Samuele 14 - Bibilia Buk na Ŋun nagon koti luŋu a

Yeyeet na Yöaba anyen tiŋdu mor i ruggö na Abisaloma i yitwe

¹ A Yöaba ŋuro lo Seruya kuruŋdye adi töili lo mor gwon i yeyeju na Abisaloma.

² a Yöaba sonyoddi ŋuto Tekowa i dogga na nene ŋuto nakoŋ nyu, a kulyani ko lepeŋ adi, Böŋö ti do koŋdi mugun gwoso ŋuto na tetereka, ko jupuni boŋgwat terekesi; an do ko we ’ya mugun ko welet, ama koŋdi mugun gwoso ŋuto na delya lutwatwa perok jore;

³ ko iti ko mor yu, ko jambi ko lepeŋ sona. Nyena a Yöaba jamakiŋdye lepeŋ kulya liŋ nagon nye tu jajam.

⁴ A ŋina ŋuto na Tekowa ko ’duröki ko mor yu, a lepeŋ ’dorone kak rupu, a twöji twöju kulya adi, Ŋaraki nan pon mor.

⁵ A mor pipije lepeŋ adi, Nyo lo yöŋgu do? A lepeŋ nyobbi adi, Nan a ŋuto karu ’be; lalet liŋ a twan.

⁶ Nan köliŋönit inot kata ko ŋwajik lyan murek, a se iŋge mörö mu ’dio; a lele ŋuto gwe ’bayin logon göja se, a lele jo gwuddye luŋaser, a tatuje lepeŋ.

⁷ Soŋi-nana mede liŋ aje ŋikin i mörö ko nan köliŋönit inot, a se jambi adi, Topuköki yi ŋuto lo gwuddyö luŋaser lonyit lo, anyen yi tatatu lepeŋ kogwon rima ti luŋaser lonyit logon nye a tatu lo; a lepeŋat kirut ’deke ’dekan tukaŋu karutanit lo köti. Nyena a lepeŋat de peŋgi tukuyu nio na kimaŋ nagon a pitöki na, a se gwe ti kölökin lalet liŋ ma ’di nyakwari geleŋ anyen ’diŋdya karin kanyit i kak ni.

⁸ A mor kulyani ko ŋuto na adi, Iti konut mede, nan de sasar ŋutu i kulya kunök.

⁹ A ŋuto na Tekowa na mo ’yi mor adi, Böŋo pon mor duma liŋ, ti toron na gwe köyö ko i kötumit na baba köti, ama ti mor ko tumatyan nanyit gwe a loke i kine kulya.

¹⁰ A mor kulyani adi, Ko lele ŋuto a kulya nene ŋo ko do jaki nan lepeŋ, a nye mo tine ’bo ’yu do köti asut.

¹¹ A ŋuto na kulyani adi, Böŋö pon moi, ti do ’diŋdye karin ti MATAT ŋun ilot an karutyo karopanit lo rima ko tatuja köti, an se tatuja ŋuro liŋ. A lepeŋ waddi adi, ’Diri gwak gwoso na gwoŋdi MATAT na, lele kupiret lo ŋuro ilot gwe ti ’dukin kak asut.

¹² A ŋuto na kulyani adi, Boŋo ti nan köliŋönit inot jamakiŋdye do nene ŋo pon mor duma liŋ. A lepeŋ waddi adi, Tambi koi.

¹³ A ŋuto na kulyani adi, Nyo nagon do a tetenakiŋdya ŋutu ti ŋun ŋo gwoso na? Kogwon na lileŋ do mor kulyaesi gwoso kilo nu, a do kölum aje ’buŋu mugun, kogwon do a ko toyituŋdyö ŋuro ilot logon a riköji kaŋo lo.

¹⁴ Yi liŋ mo twatwa, yi gwon gwoso piŋo nagon a ’buköŋ kak nagon ti bulö momora i pirit na geleŋ köti. ŋun ti joŋga ru na ŋuto kaŋo, ama a lepeŋ teteŋdi kiko anyen ŋuto lo riköji lo gwon ti karakin sona tojo ko ’dutet nanyit.

¹⁵ Nyenagon nan a poŋdya i jamakiŋdya na do pon mor duma liŋ kine kulya, kogwon ŋutu aje tokujöŋdu nan; a nan köliŋönit inot yeyeji adi, Nan de jajambu ko mor, kode ŋona mor ruruk koŋdya ŋo nagon köliŋönit nanyit a mulun na.

¹⁶ Kode ŋona mor de yiyiŋ, anyen lwökuŋdyö nan i könisi ti ŋuto logon de tutukar nan se ko ŋuro liŋ ’bukuluŋ i lomore nagon ŋun a tin yi na.

¹⁷ A nan köliŋönit inot yeyeji adi, Tamet lo mor duma liŋ mo sugga nan; kogwon mor duma liŋ gwon gwoso malaikatat lo Ŋun i kuruŋdyo na ŋo na ’but ko narok. Ti MATAT Ŋun ilot gwe ko do.

¹⁸ A mor nyobbi ŋuto na adi, An do ko muggo nene ŋo köyö nagon nan a piyun konut na. A ŋuto na kulyani adi, Ti mor duma liŋ böŋo jambi.

¹⁹ A mor pipije adi, Könin lo Yöaba kata i kine kulya kunök liŋ le? A ŋuto na nyobbi adi, ’Diri gwak gwoso na gwoŋdi do pon mor duma liŋ na, ŋuto ti bulö girara i könin lutaten kode i kadoŋe i nene ŋo nagon mor duma liŋ aje kulyari kine. ’Diri gwon a köliŋönit ilot Yöaba logon a saŋu nan; a nye aje takiŋdya nan köliŋönit inot i jambu na kilo kulyaesi liŋ.

²⁰ Köliŋönit ilot Yöaba aje koŋdya sona anyen tuka ’de’yu kine kulya. Ama do duma liŋ a lokoŋ gwoso malaikatat lo ŋun i deŋdya na ŋo liŋ na gwon i na kak kune.

²¹ A kirut mor kulyani ko Yöaba adi, Meddi, nan a ruk ŋo na mulun do na; nyena iti ko nyokuŋdye ŋilu titinti Abisaloma.

²² A Yöaba ’dorone kak rupu, a twöji twöju, a tiŋdi mor tinate; a Yöaba kulyani adi, Nan köliŋönit ilot aje den i lo lor adi nan aje ryeju ’busan konut i komor Pon mor duma liŋ, kogwon do mor aje ruggö molet na köliŋönit ilot.

²³ Nyenagon a Yöaba ŋine ŋien a iti Gesur, a nyökuŋdye Abisaloma Yerusalema ni.

²⁴ A mor kulyani adi, Ti lepeŋ si ’dani ka ’de kanyit kadi, lepeŋ ti bulö meddya komor nio. Nyena a Abisaloma si ’dani ka ’de kanyit kadi, a tine met komor na mor.

²⁵ A lele ŋuto gwe ’bayin i Yisaraele liŋ logon kwelen nanyit kukwön lwö-lwöŋ na Abisaloma; a nene yuyuket gwe ’bayin kanyit suluja i ’dapan ti mokosi kanyit tojo ko juruku ’diet nanyit.

²⁶ Temba i ’dutet na kiŋa ko kupir kanyit gwe jore a lepeŋ ’bariŋdi se, a ko lepeŋ aje ’bariŋdu kupir kanyit ti kwe, a lepeŋ tembi temba ko mijan, a se gwe gwoso sekelejin miajin murek ti mijan na mor.

²⁷ a Abisaloma iŋge yuŋweki ŋwajik lulyan musala, ko ŋuro nakwan geleŋ karin kanyit a Tamara; a lepeŋ gwe a nake parik.

²⁸ A Abisaloma iŋge si ’da Yerusalema yu ko kiŋajin murek liŋ, a nye gwe a ko met komor na mor.

²⁹ a kirut Abisaloma luŋgi Yöaba anyen ködyö son nye ko mor yu, ama a Yöaba tine ’bön po kanyit ni. A nye luogi lepeŋ nene daö tomurek, ama a Yöaba tine ’bön po.

³⁰ A lepeŋ kirut kulyani ko köliŋönök kanyit kulo adi, Meddi ta, melesen na Yöaba ŋinu didiŋö ko nio nu, lepeŋ kata ko ’bolot saora nyu; iti ta ko ’yure ta ’yur. A köliŋönök ti Abisaloma kulo ’yuŋe ’yuŋa melesen nu.

³¹ A Yöaba ŋine ŋien a iti ko Abisaloma kadi, a pipije lepeŋ adi, Nyo nagon köliŋönök kulök a ’yuŋa melesen nio?

³² A Abisaloma nyobbi Yöaba adi, Mete, nan a luŋgu do anyen nan ködyö bubulö soŋdu do ko mor yu i pija na lepeŋ adi, Kwe a nyo nagon nan po Gesur yu? Bia nan nyuŋ ködyö si ’da nyu. Nyenagon ti nan iti ko mor i komor; a ko toron kata köyö a ti lepeŋ tatuje nan.

³³ a Yöaba iti ko mor yu, a nyönyökökiŋdye lepeŋ kine kulya; a mor luogi Abisaloma. A lepeŋ poŋdi ko mor ni, a dulakine kak ko mor i komor; a mor rome ko Abisaloma ko ’bi ’biyet.