2 Samuele 13 - Bibilia Buk na Ŋun nagon koti luŋu a

Amunon a ryaggu Tamara

¹ A Abisaloma ŋuro lo Dawidi gwe ko kiaser nanyit nake parik, karin kanyit a Tamara, a i mukök na diŋit a na ’dit, a Amunon ŋuro lo Dawidi nyare nyar lepeŋ.

² A Amunon gwe ko yeyeesi jore a nye giloni gilö i yeyeju na kulya ti kiaser nanyit Tamara; kogwon lepeŋ na nyuŋ gwon a ’diet, a Amunon mete a nago i konakiŋdya na lepeŋ nene ŋo.

³ Ama a Amunon gwe ko ju lonyit, karin kanyit a Yonadaba, ŋuro lo Simea, luŋaser Dawidi; a Yonadaba gwe a ŋuto lowat parik.

⁴ A lepeŋ pipije nye adi, Nyo pon ŋuro lo mor, nyo do meta a losok temba i ko ’bure? Do ŋona ti bulö takiŋdya nan le? A Amunon ruŋge lepeŋ adi, Nan nyanyar Tamara kiaser na luŋaser liŋ Abisaloma.

⁵ A Yonadaba kulyani ko lepeŋ adi, Pirikine kak konut i dotoet, ko koŋdi mugun gwoso do a gilö; a ko munyi de a poŋdya i ’yö ’yu na do, a do kulyani ko lepeŋ adi, Ti kiaser nio Tamara böŋö poŋdi anyen ko jakiŋdya nan ambata na nyenyei, anyen tetenakiŋdya nan kinyo köyö i komor, anyen nan memet a nyesi kanyit i könisi.

⁶ A Amunon pirikine kak, a koŋdi mugun a gilö; a nagon mor aje poŋdya i ’yö ’yu na lepeŋ ŋu, a Amunon kulyani ko mor adi, Böŋo ti kiaser nio Tamara poŋdi anyen ko tetenakiŋdya nan ambatajin murek köyö i komor anyen nan bubulö nyesu kanyit i könisi.

⁷ A Dawidi soŋdi ŋuto i ’baŋ ko Tamara yu adi, Iti ko luŋaser ilot Amunon kadi, ko tetenaki lepeŋ kinyo.

⁸ A Tamara iti ko luŋaser lonyit Amunon kadi, na piriki ’e nye nu. A nye ’dumuŋdye ’bolot na ŋo ’yowa ko pioŋ, a nuddi nuddu, a teteŋdi ambata-jin kanyit i komor, a deŋi deŋa.

⁹ A lepeŋ ’dumuŋdye kelet a ’bukökiŋdye kanyit i komor, ama a nye renyani renya nyesu. A Amunon kulyani adi, Ti ŋutu liŋ iti kaŋo köyö ni. A ŋutu liŋ iti kaŋo kanyit yu.

¹⁰ A Amunon kulyani ko Tamara adi, Jo kinyo ŋina i kadi lukata, anyen nan bubulö nyesu konut i könisi. A Tamara ’dumuŋdye ambatajin nagon nye aje teten kune, a joŋgi se i kadi lukata ko luŋaser lonyit Amunon yu.

¹¹ Ama a nye ko tomuŋun-dye se nyona ko lepeŋ anyen nye nyenyesu, a Amunon morgi lepeŋ, kulya adi, Po, ti nan dotoni ko do pon kiaser nio.

¹² a lepeŋ na nyobbi adi, ’Bayin sona pon luŋaser liŋ, an do ko ri ’dikin nan; kogwon ŋo gwoso na ti bulö kona i Yisaraele; ko koŋdya ŋo nagoŋ gwoso ŋina.

¹³ Ama nan de tu da ko ŋina yu na kwe nio? A do kirut de gwe gwoso ŋuto rube i Yisaraele. Nyenagon böŋö ti do jambi ko mor, kogwon lepeŋ de ti tiŋikin nan do.

¹⁴ Ama a Amunon tine ’bön yiŋga lepeŋ kogwon nye ko riŋit lwölwöŋ lepeŋ, a riŋuŋdye lepeŋ, a dotoni ko lepeŋ.

¹⁵ A kirut Amunon mane man ŋuro na parik parik; nyena a manet na maŋdi lepeŋ na lwöŋe lwöŋ nyaret na nyaŋi nye lepeŋ na. A Amunon kulyani ko lepeŋ adi, Ŋine ki, iti tu.

¹⁶ Ama a Tamara kulyani ko lepeŋ adi, ’Bayin sona pon luŋaser liŋ, kogwon soŋdu inot na nan kaŋo a toron lwölwöŋ nagon do aje konakin nan nu. Ama a Amunon tine ’bön yiŋga lepeŋ.

¹⁷ A lepeŋ luŋgi köliŋönit lonyit lo adi, Rikörö ŋina ŋuto kaŋo köyö i komor, ko tokone toko kötumit ŋina kanyit i mukök.

¹⁸ Lepeŋ na a jupu ko boŋgo najo nagon ko könisi kanyit a lojo; kogwon ŋwajik kö ’disi ti mor jupu boŋgwat gwoso kine. A köliŋönit lonyit lo riköddi lepeŋ kaŋo, a toköji tokoja kötumit na kanyit i mukök.

¹⁹ A Tamara tiŋdi kurök kanyit i kwe a kereŋdi boŋgo najo nagon nye a jupukin na; a lepeŋ sopakiŋdye könisi kanyit i kwe, a iti tu luluöddu.

²⁰ A luŋaser lonyit Abisaloma pipije lepeŋ adi, Luŋösur Amunon aje gwon ko do le? Nyenagon yiŋani taliŋ pon kiaser nio; lepeŋ a luŋaser ilot; ko ’delakiŋdya kine kulya i töili. Nyena a Tamara si ’dani ko luŋaser lonyit Abisaloma kadi, kogwon nye gwe gwoso ŋuto nagon aje wulwe ko kiasirik kiden.

²¹ A na yiŋge mor Dawidi kine kulya liŋ nu, a lepeŋ wore woran parik.

²² Ama a Abisaloma gwe a ko jambu kulya na ’but kode narok ko Amunon; kogwon Abisaloma maman Amunon, kogwon lepeŋ a riŋuŋdya kiaser nanyit Tamara.

Abisaloma a ropakiŋdya kiaser nanyit a iŋge wökön

²³ A ko gwe sona i mukök na kiŋajin murek liŋ, a Abisaloma gwe ko momo-ret na ’bariŋdu na yidin Bala-kasor na gwon nyona ko Epuraima nu, a Abisaloma luŋgi ŋwajik ti mor kata.

²⁴ A Abisaloma poŋdi ko mor ni a kulyani adi, Nan köliŋönit ilot kata ko momoret na ’bariŋdu na yidin, böŋö pon mor, ti do moraddi ko nan se ko köliŋönök kulök i pirit na geleŋ.

²⁵ A mor kulyani ko Abisaloma adi, ’Bayin pon ŋuro liŋ, yi ti bulö tu liŋ sona, kogwon an yi ko gwon jore. A Abisaloma mimi ’dije nye, ama a mor iŋge renya tu, ka ’de a ’boroji lepeŋ.

²⁶ A kirut Abisaloma kulyani adi, Ko sona, böŋö ti luŋaser liŋ Amunon moraddi koyi. A mor pipije adi, Nyo nagon lepeŋ moraddu ko ta?

²⁷ Ama a Abisaloma mimi ’dije nye parik tojo nye a rukörö Amunon ko ŋwajik liŋ ti mor anyen tu ko lepeŋ.

²⁸ A Abisaloma saŋi köliŋönök kanyit kulo adi, Mete ta met Amunon ’bura i diŋit nagon nye aje meran nu; a ko nan a kulya ko ta adi, Gwute ta Amunon, kirut a ta de tatuje lepeŋ. An ta ko kujönö ta; ti gwon a nan lo sarakiŋdya ta le? Ti ta gwe a walan ko a lunsak.

²⁹ Nyena a köliŋönök ti Abisaloma kulo konakiŋdye Amunon gwoso na saŋi Abisaloma nu. A ŋwajik liŋ ti mor ŋine ŋien, a lepeŋat liŋ kije kaineki kase a wöki wökön.

³⁰ A nagon se nyuŋ gwon i kiko nu, a lore aje ’durökin ko Dawidi yu adi, Abisaloma aje rembu ŋwajik liŋ ti mor, a lele lose gwe ’bayin logon a pituŋdyö.

³¹ A kirut mor ŋine ŋien a kekereŋdi boŋgwat kanyit kune, a pirikine kak i ŋutu; a köliŋönök kanyit liŋ logon gwo ’dan nyona kulo kekereŋdi boŋgwat kase.

³² Ama a Yonadaba ŋuro lo Simea, luŋaser Dawidi kulyani adi, Böŋö pon duma liŋ, an do ko yeyeju adi lepeŋat aje rembu ŋwajik ti mor teton liŋ, ake Amunon ka ’de lo tatua, kogwon Abisaloma a teteŋdya suluja i lor logon Amunon a riŋuŋdya kiaser nanyit Tamara lu adi kine kulya ködyö kökona.

³³ Nyenagon pon mor duma liŋ, an do ko ’delakiŋdya kine kulya i töili i yinikiŋdyö adi ŋwajik liŋ ti mor aje tatua, ake Amunon ka ’de lo tatua.

³⁴ Ama a Abisaloma wöki wökön. A titinti katiyunit lo ’bi ’yi konyen kanyit ki, a metuŋdye ŋutu jore parik popoŋdya i kiko lo Koronayim i swöt lo mere.

³⁵ A Yonadaba kulyani ko mor adi, Mete, ŋwajik ti mor kulo aje ’durökin; ’diri aje gwon gwoso na kulyari köliŋönit ilot dika nu.

³⁶ A nye ko tutuŋge jambu, mete, a ŋwajik ti mor kulo ’duröki ’durökin, a gwiörö ki; a ma ’di mor köti ko köliŋönök kanyit liŋ morakiŋdye i gwien parik.

³⁷ Ama a Abisaloma wöki wökön, a iti ko Talemai ŋuro lo Amiuda, mor lo Gesur yu. A Dawidi delyani delya ŋuro lonyit temba i lor.

³⁸ A Abisaloma wöki wökön, a iti Gesur, a gwe nyu kiŋajin musala.

³⁹ A mor Dawidi yöŋöni tu ko Abisaloma yu; kogwon lepeŋ aje suka i kulya ti twan na Amunon.