2 Samuele 11 - Bibilia Buk na Ŋun nagon koti luŋu a

Dawidi a toroŋdya ko Bate-seba

¹ A ko gwe sona i suluet na kiŋa, i diŋit nagon moran wöröri i gor nu, a Dawidi sonyoddi Yöaba se ko köliŋönök kanyit kulo, ko Yisaraele liŋ, a se tukaŋi ŋutu ti Amon, a tuma-kiŋdye köji na Raba kiden. Ama a Dawidi karaki Yerusalema.

² A gwe sona i lele koriri nagon kolor gwe nyona ko ’doro nu, a Dawidi ŋine ki kanyit i dotoet, a wöröni woro i lo ’dek loki lo kadi nanyit na mor, a nye meddi i ŋilu lo ’dek loki nene ŋuto gwon i kwo; a ŋinu ŋuto metani a nake parik.

³ A Dawidi sonyoddi ŋuto i denuŋdya na kulya ti ŋinu nakwan. A lele ŋuto kulyani adi, ŋina ŋona ’bayin a Bate-seba ŋuro na Eliam, narakwan na Uriya ŋuto lo Kiti le?

⁴ A Dawidi sonyoddi ŋutu i joŋdya na lepeŋ kanyit ni, a Dawidi dotoni ko lepeŋ. (Kogwon i ŋinu diŋit ŋina ŋuto gwon i toke ’ya na mugun i tolutwan nanyiŋ.) A kirut nye yitöni kanyit mede.

⁵ A ŋuto na piŋge pigga; a lepeŋ sonyoddi ŋuto i takiŋdya na Dawidi adi, Nan na gwe ko pele.

⁶ A Dawidi sonyoddi lore ko Yöaba yu adi, Sunyu Uriya ŋuto lo Kiti köyö ni. A Yöaba sunyukiŋdye Dawidi Uriya.

⁷ A nagon Uriya aje ’dur kanyit ni nu, a Dawidi pipije lepeŋ kode Yöaba a lo ’but ko ŋutu kulu gwon ada, ko kulya ti gor tutu ada.

⁸ A Dawidi kulyani ko Uriya adi, Iŋgo, iti konut mede i yukan. A Uriya lupöni kaŋo ko mor kadi, a mor sonyoddi ’doket i mukök nanyit.

⁹ Ama a Uriya dotoni ko mor i kötumit na kadi se ko köliŋö-nok ti duma lonyit i pirit na geleŋ, a tine tu kanyit mede.

¹⁰ A se ko takiŋdye Dawidi adi Uriya a ko tu kanyit mede, a Dawidi pipije Uriya adi, Do ’bayin po i jölö le? Nyo nagon do a ko tu konut mede?

¹¹ A Uriya nyobbi Dawidi adi, Saŋduk na ŋun ko ŋutu ti Yisaraele ko ti Yuda doto i murugujin; a duma liŋ Yöaba ko köliŋönök kanyit ’beggu mera mu ’diŋ; nyena ada lolor nagon nan tu köyö mede i nyesu ko i möju ko i doto ko narakwan nio? ’Diri gwak, gwoso na gwoŋdi do na, ko gwoso na gwoŋdi ködudwö inot na, nan ti bulö koŋdya ŋina ŋo.

¹² A Dawidi kulyani ko Uriya adi, Mönun-dye ni i lo lor köti, a ko ’bure a nan kölöddi do. A Uriya mönuŋdye Yerusalema yu i ŋilu lor ko ko ’bure nanyit.

¹³ A Dawidi lupundye lepeŋ, a lepeŋ nyesi nyesu a möji möju kanyit i komor. A Dawidi tomeŋi lepeŋ; a i tokotyaŋ a Uriya iti kaŋo a pirikine kak kanyit i dotoet ko köliŋönök ti duma lonyit i pirit na geleŋ, ama lepeŋ a ko tu kanyit mede.

¹⁴ A gwe sona i ko ’bure, a Dawidi wurökiŋdye Yöaba waraga anyen Uriya jojoŋ.

¹⁵ Lepeŋ a wuŋö i ŋinu waraga adi, Tiki ta Uriya i komor na gor lo pape, kirut a ti ta mijöro bot ko lepeŋ nyona, anyen nye bubulö rimiki kak anyen twatwan.

¹⁶ A ko gwe sona nagon Yöaba gwe i tumba na köji nu, a nye tiŋdi Uriya i pirit nagon nye deden adi ŋutu walan lo gwon kata nu.

¹⁷ A ŋutu ti köji lupene kaŋo i mörö ko Yöaba; a kulye lo tatua kulu gwe a köliŋönök ti Dawidi; a Uriya ŋuto lo Kiti lo iŋge tatua köti.

¹⁸ A kirut Yöaba sunyukiŋdye Dawidi ŋuto i nyönyökö-kiŋdyö na lepeŋ liŋio liŋ ti gor;

¹⁹ a nye kukuji luyökie lo adi, Ko do aje tutuŋgö nyönyökökiŋdyö mor liŋio liŋ ti gor,

²⁰ a ko mor a woran, a pipije do adi, Nyo nagon ta a mijörö nyona parik ko köji i mörö? Ta a ko den adi se bubulö poŋu i lukata na mariŋ le?

²¹ Ŋa na tatuja Abimelek ŋuro lo Yerubeset? ’Bayin a ŋuto nanakwan Ŋona na gubuŋdya karito duma i mariŋ loki, a nye ’duki kanyit i mugun, anyen nye ko twaji Tebese yu nu le? Nyo nagon ta a mijörö nyona parik ko ŋinu mariŋ? A kirut do kulyani adi, Köliŋönit ilot Uriya ŋuto lo Kiti lo köti aje tatua.

²² A kirut luyökie lo iti tu a ’dure ’dur, a nyönyökökiŋdye Dawidi ŋo liŋ nagon Yöaba soŋdi nye kune.

²³ a luyökie lo kulyani ko Dawidi adi, Merok kulu a rikuŋdyo yi, a poŋdi kaŋo i mörö koyi i jur, ama a yi riköddi se bot tojo ko pirit lupet na kötumit na köji.

²⁴ a kaŋorok poki i poŋu na yi köliŋönök kulök i gorom nagon a mariŋ, a kulye köliŋönök kulök pon mor aje tatua; koliŋönit ilot Uriya ŋuto lo Kiti köti aje tatua.

²⁵ A Dawidi kulyani ko luyökie lo adi, Mana ŋo nagon do de nyönyökökin Yöaba adi ti nye gwe ti delya i kine kulya, kogwon gor lo tutuŋgö ŋutu liŋ jojo a tuka ’de gwe ’bayin. Möröni ta parik ko ŋinu köji, i te ’ya na lepeŋ. Ko togole togo Yöaba i kine kulya.

²⁶ A nagon narakwan na Uriya ko yiŋge adi lalet lonyit aje tatua nu, a nye gwine lepeŋ.

²⁷ A nagon delya nanyit aje jo, a Dawidi sonyoddi ŋutu a joŋdi lepeŋ kanyit mede, a nye gwe a narakwan nanyit, a iŋge yuŋwekiŋdyö lepeŋ ŋuro lulalet. Ama ŋo nagon Dawidi a kon na meta a naron ko MATAT i komor.