2 Moran 5 - Bibilia Buk na Ŋun nagon koti luŋu a

Namana a tokela i rimajin kanyit

¹ A Namana, kasaranit lo kamörök ti mor lo Suria gwe a ŋuto duma lo bubula ko duma lonyit i komor, kogwon MATAT a tiŋdu Suria i te ’ya kogwon kulya kanyit. A nye gwe a ŋuto wa, ama nye a ŋuto lo rimajin.

² Ŋutu ti Suria köju a tu kaŋo a teŋon, a se iŋge ryakuŋdya nene ŋuro na ’dit i jur lo Yisaraele, a nu ŋuro gwe a köliŋönit na narakwan na Namana.

³ A nu ŋuro kulyani ko ŋote ’baŋ na adi, Ko ködyö duma lio gwon ko nebi lo gwon Samaria lu, a nye ködyö totoke lepeŋ i rimajin kanyit.

⁴ a Namana iti tu a nyönyökökiŋdye duma lonyit adi, Ŋinu ŋuro na jur lo Yisaraele na a jambu kulya gwoso kine.

⁵ A mor lo Suria kulyani adi, Nyena ti do iti, a nan de sunyukiŋdye mor lo Yisaraele waraga. A Namana iti tu, a baraddi pödö nagon temuŋdya a talentajin puök ko dakap nagon temuŋdya a sekelejin aliŋan buker, ko boŋgwat leusesi nagon jujukin ŋutu puök.

⁶ A nye ŋutukiŋdye mor lo Yisaraele waraga nagon a wurö adi, Ko ŋina waraga a ’dur konut pini, dene den adi nan a sunyukiŋdyö do Namana köliŋönit lio, anyen do toke ’ya lepeŋ i rimajin kanyit.

⁷ A ko gwe sona na keŋdi mor lo Yisaraele waraga nu, a nye kekereŋdi boŋgwat kanyit, a kulyani adi, Nan a Ŋun i tatuja ko i torujö le, nagon ŋilo ŋuto sunyukiŋdyö nan ŋuto anyen nan toke ’ya lepeŋ i rimajin kanyit? Nyenagon denuŋdye ta böŋö, ko meddi ta, lepeŋ ga ’yu pisa ko nan.

⁸ Ama a Elisa ŋuto lo Ŋun ko yiŋge adi mor lo Yisaraele a kekereŋdya boŋgwat kanyit, a nye sunyukiŋdye mor lore pija adi, Nyo nagon do kekereŋdya boŋgwat kunök? Ti ŋilo ŋuto poŋdi köyö ni, a lepeŋ de kuruŋdye adi nebi kata Yisaraele.

⁹ A Namana poŋdi po ko kusanjin se ko arabiajin kanyit lo jijikö, a gwo ’de gwo ’dan i kötumit na kadi na Elisa.

¹⁰ A Elisa soŋdi luyökie i takiŋdya na Namana adi, Iti ko kwöni kwo daŋin buryo Yardene, a mugun inot de poŋdi a na ’but, a do de gwe a loke.

¹¹ Ama a Namana wore woran a iti tu kulya adi, Mete ta, nan a yeyeju adi lepeŋ ŋona de lupe kaŋo köyö ni, a gwo ’de gwo ’dan, a luŋgi karin ti MATAT Ŋun lonyit, a kokoddi na pirit ko könin lonyit, a toke ’yi nan ŋuto lo rimajin.

¹² Arbana ko Parpar karya ti Damaseke ŋona ti gwon a lo ’but lwölwöŋ karya liŋ ti Yisaraele le? Nan ti bulö kwö i lukata na se a kele kelan le? A nye iŋge ’duk mugun ko woran a wöripöni wöripö a iti tu.

¹³ Ama a köliŋönök kanyit mijörö ko lepeŋ yu a pije adi, Baba, ko ködyö nebi lo a sara-kiŋdya do i koŋdya na nene po duma, a do ködyö ti kon le? Nyena bia ko nyo do ti kon ko lepeŋ saŋu do adi, Kwöni ko gwe a loke?

¹⁴ A nye dudulara kak a juruddye mugun Yardene dapin buryo, gwoso saret lo ŋuto lo Ŋun; a mugun nanyit poŋdi gwoso na lupudi, a nye gwe a loke.

¹⁵ A Namana yitöni ko ŋuto lo Ŋun yu se ko teŋ nanyit liŋ. A nye poŋdi po a gwo ’de kanyit i komor; a nye kulyani adi, Mete, nan a kurun adi Ŋun ’bayin i kak liŋ nagon i Yisaraele ka ’de; nyena böŋö wuji ’doket köyö nan köliŋönit ilot.

¹⁶ Ama a Elisa waddi adi, ’Diri gwak gwoso na gwoŋdi MATAT na, logon nan a köliŋönit lonyit lo, nan ti bulö wuju nene ŋo. A nye tisakiŋdye lepeŋ i wuju na ’doket na, ama a Elisa renyani renya.

¹⁷ A Namana kulyani adi, Ko ’bayin sona, ruköki nan böŋö i joŋga na kujöŋ nagon tetemakiŋdya i ’doko ko kaineki murek; kogwon suluja i na diŋit nan mo ti wukiŋdya kulye punyen rubaŋga lo ’yu ’yura ’buluŋ kode lele rubaŋga ama ko MATAT ka ’de.

¹⁸ Ama ti MATAT böŋö pitö kiŋdye nan i na po, adi na wöröri duma lio i kwakwaddu na Rimona i kadi nanyit nyu, a nye tokoni ko könin lio, a nan du ’ye mugun kak i kadi na Rimona, a ko nan a du ’ya mugun kak i kadi na Rimona, ti MATAT pitökiŋdye nan i ŋina ŋo.

¹⁹ A Elisa kulyani ko lepeŋ adi, Iti ko taliŋ. A nagon Namana aje piörö kapo kanyit pajo madaŋ nu,

²⁰ A Geaji köliŋönit lo Elisa ŋuto lo Ŋun lo kulyani ko mugun adi, Meddi, duma lio a pitökin ŋilo Namana lo Suria, a nye gwe a ko wuju ŋo na jon lepeŋ kune. ’Diri gwak gwoso na gwoŋdi MATAT na, nan de wöwökön kanyit i mukök a nan de luŋgi nene ŋo ko lepeŋ.

²¹ A Geaji ’demeji Namana. A Namana ko meddi ŋuto wöwokun kanyit i mukök, a nye kiyuŋdye kak i arabia lonyit lo jijikö i rum ko lepeŋ, a pije adi, ŋo liŋ a na ’but?

²² A Geaji waddi adi, lye, po liŋ a na ’but. Duma lio a sunyuŋdyö nan i takiŋdya na do adi kulye teton murek lo po i jur lo merya ti Epuraima, logon a ti teŋ na nebijin kulo a ’durökin kanyit sopinana; böŋo tiki se pödö nagon temuŋdya a talenta geleŋ, ko boŋgwat leusesi nagon jujukin ŋutu murek.

²³ A Namana kulyani adi, Böŋö wuji pödö nagon temuŋdya a talentajin murek. A nye tisakiŋdye lepeŋ, a tiŋdi pödö nagon temuŋdya a talen tajin murek i jurakan murek a toŋi toŋa se ko boŋgwat leusesi nagon jujukin ŋutu murek, a nye ’dukukiŋdye se ko köliŋönök kanyit murek kulo i kusik; a se ’dokoddi kine ’dokesi ko Geaji i komor.

²⁴ A Geaji ko ’dure i mere, a nye ’dumuŋdye kunu ’dokesi kase i könisi, a ’delakiŋdye se kadi; a nye kölöddi kulu ŋutu, a se iti tu.

²⁵ A nye lupöni kadi, a gwo ’de gwo ’dan ko duma lonyit i komor, a Elisa pije lepeŋ adi, Geaji, do gwon ya? A nye waddi adi, Nan köliŋönit ilot a ko tu i nene pirit.

²⁶ Ama a Elisa kulyani ko lepeŋ adi, Töili lio dika ’bayin gwon nyu le nagon lu ŋuto löpukö i rum ko do nu? Ŋinu a diŋit na ’but nagon do wuji gurut, ko boŋgwat, ko meleseno ti jeitun ko ti binyo, ko köbilu, ko dwönin, ko köliŋönök lyan ko nawate le?

²⁷ Nyenagon rimajin ti Namana de momok do ko nyakwariat kulök ŋupi. A Geaji kö ’yi lepeŋ a nye gwe a ŋuto lo rimajin, a kwekweji a lokwe gwoso kurök.