2 Moran 3 - Bibilia Buk na Ŋun nagon koti luŋu a

Yeyorama a mor lo Yisaraele

¹ A gwe sona i kiŋa topuök wot budök na gwoŋdi Yosapata a mor lo Yuda nu, a Yeyorama ŋuro lo Aba lo poki a mor lo Yisaraele Samaria yu, a nye iŋge saŋu ko kiŋajin puök wot murek.

² A nye koŋdi ŋo nagon a naron ko MATAT i metet, ama ’bayin gwoso na monye lonyit se ko ŋote nanyit, kogwon nye a joŋga kaŋo ŋurupit lo Bala logon a togwi ’diki ki gwoso kumut, lo teten monye lu.

³ Ma ’di sona lepeŋ a ’depa-kiŋdya i toron na Yerobama ŋuro lo Nebat, nagon nye a tiŋdi Yisaraele i toroŋdya na; a nye tine ko ’yu toroŋdya kwoŋ.

Elisa a keju adi Moaba tetela

⁴ A Mesa mor lo Moaba gwe a ka-wowoanit lo köbilu; nye yeŋ tiŋdu mor lo Yisaraele yisi aliŋan mia geleŋ, ko kupir ti lopijoki alipan mia geleŋ.

⁵ Ama a Aba ko twane, a mor lo Moaba renyani sara ko mor lo Yisaraele.

⁶ A mor Yeyorama iti kaŋo Samaria i nu diŋit a momori ŋutu ti Yisaraele liŋ.

⁷ A nye sunyukiŋdye Yosapata mor lo Yuda lore adi, Mor lo Moaba aje re-nya sara ko nan; do ŋona ti bulö mo-raddu ko nan i mörö ko ŋutu ti Moaba le? A Yosapata waddi adi, Nan de tutu; nan gwoso do, ŋutu kwe gwoso ŋutu kulök, ko kusanjin kwe gwe gwoso kusanjin kunok.

⁸ A nye pije adi, Yi de tiri lon kiko? A Yeyorama waddi adi, Yi de tiri kiko lo yöbu na Edom.

⁹ Nyena a mor lo Yisaraele ko mor lo Yuda se ko mor lo Edom iti tu. A nagon se loloraddu na jölöjine se perok buryo nu, a pioŋ ti kamörök gwe ’bayin köde ti toro ’bo nagon kebbu se kunu.

¹⁰ A mör lo Yisaraele kulyani adi, Wöidiö! MATAT aje luŋgu kilo moran musala anyen wukiŋdya se i könisi ti ŋutu ti Moaba.

¹¹ A Yosapata pije adi, Lele nebi lo MATAT ’bayin ni logon yi piyuŋdya MATAT ko lepeŋ? A lele lo köliŋönök ti mor lo Yisaraele waddi adi, Elisa ŋuro lo Sapat kata ni logon köju yeŋ dililikiŋdya Eliya pioŋ lalaesi ti könisi.

¹² A Yosapata kulyani adi, Kulyaet lo MATAT kata ko lepeŋ. A mor lo Yisaraele se ko Yosapata ko mor lo Edom dudulara ko lepeŋ yu.

¹³ A Elisa pije mor lo Yisaraele adi, Kulya kwe a nyo konut? Iti ko nebijin ti munyi ko ti ŋuti yu. Ama a mor lo Yisaraele kulyani ko lepeŋ adi, ’Bayin sona, ŋilo a MATAT lo luŋgu kilo moran musala anyen wukiŋdya se i könisi ti ŋutu ti Moaba.

¹⁴ A Elisa kulyani adi, ’Diri gwak gwoso na gwoŋdi MATAT na, logon nan a kö-lipönit lonyit lo, ko ködyö nan ti twöju Yosapata mor lo Yuda, nan ködyö ti yeye do kode meddya do.

¹⁵ Ama soŋinana jaki ta nan kajulönit lo tom. A nagon kajulönit lu aje ju ’yö tom nu, a riŋit na MATAT poki ko Elisa loki.

¹⁶ A nye kulyani adi, MATAT lo kulya sona adi, Nan mo tiŋdu joran i ŋilo loro.

¹⁷ Kogwon MATAT lo kulya sona adi, Ta de ti met köbuŋöt kode kudu, ama ŋilo loro de totojore ko pioŋ, anyen ta ko teŋon kasu se ko toro ’bo kasu böŋö mömoju.

¹⁸ Ŋina ŋo pölilyö ko MATAT i metet; lepeŋ köti de wuwukin ŋutu ti Moaba kasu i könisi,

¹⁹ a ta mo te ’yi köjinö liŋ nagon a gömö ko mariŋan, ko köjino liŋ na ’but parik, a ta mo toggi kaden lo ’but liŋ kak, a ’dije piritön lelekesi liŋ ti pioŋ, a ta mo koŋi meleseno na ’but liŋ i gugumba na ŋurupö kata.

²⁰ A i ko ’bure, gwoso i diŋit wukiet na rubaŋga, mete, a pioŋ na ’bukuŋdye i swöt lo Edom, a ŋilu jur gwogwo ’dine a pioŋ.

²¹ A ŋutu liŋ ti Moaba ko yiŋga adi kulu moran aje po i mörö ko se nu, a se nyumbe ŋutu liŋ logon jujukin jupukiŋdya tito möriesi suluja i teton tojo ko muduŋin, a se gwogwo ’dine i koret na jur lose.

²² A se ko ŋine ko ’bure kobubut nagon kolor lokiŋdya i pioŋ nu, a ŋutu ti Moaba meddi pioŋ nagon kase i komor kune a nator parik gwoso rima.

²³ A se kulyani adi, Kunu a rima; moran kulo ŋona aje torem ko ’börik? Yakulo Moaba, yi a tu ta i ryaggu!

²⁴ Ama a se ko ’dure i mera na ŋutu ti Yisaraele, a ŋutu ti Yisaraele piki i mörö ko ŋutu ti Moaba, a se iŋge wökön kase i komor; a ŋutu ti Yisaraele möröddi ŋerot i ’du ’dupöddu na ŋutu ti Moaba.

²⁵ A se duyömbi köjinö, a ŋutu liŋ geleŋ geleŋ gumbe ŋurupö i meleseno na ’but liŋ tojo ko se a muluwa ko ŋurupö; a se ’dije piritön lelekesi liŋ ti pioŋ a toggi kaden lo ’but liŋ kak; a kawitök ti wirowirojin lorgi köji na Kir-karaset a gugumbe lepeŋ, tojo ko nye a kölöki a murwö na ŋurupö.

²⁶ A mor lo Moaba ko meddi adi nu mörö puriörö kanyit yu pape, a nye joŋgi ŋutu miajin buryo lo mörö ko baŋdujin anyen gwuöddu ’börik kapo ko mor lo Edom i swöt; ama a se tine bulö kwöŋ.

²⁷ A nye morgi ŋuro lonyit kayu logon ködyö ruddya tumatyan nanyit lo, a wukiŋdye lepeŋ a rubaŋga lo ’yu ’yura ’buluŋ i loki na gorom nagon a mariŋ na köji. A ŋutu ti Yisaraele iŋge mana parik kogwon kine kulya; a se kö ’yi kö ’yu a yitöni bot kase i jur.