2 Moran 23 - Bibilia Buk na Ŋun nagon koti luŋu a

Yosia teteŋdya ŋo liŋ rigwo

¹ A kirut mor soŋdi lore, a ŋutu temejik ti Yuda ko ti Yerusalema momori ko lepeŋ yu.

² A mor iti i kadi na MATAT, se ko ŋutu liŋ ti Yuda, ko ŋutu liŋ ti Yerusalema, ko koanejin ko nebijin ko ŋutu liŋ lo ’di ’dik ko dumalak; a nye kena-kiŋdye se kulyaesi liŋ ti buk na tomoret nagon a rye i kadi na MATAT na.

³ A mor gwo ’de nyona ko togwi ’diet lo kadi, a milyeji ko MATAT, i keŋoddu na MATAT, ko i ’debba na saresi kanyit, ko todinesi kanyit, ko saresi kanyit lo wurö, ko töili lonyit liŋ ko ködudwö nanyit liŋ, adi nye mo kökon kulyaesi ti ŋina tomoret logon a wuröki i na buk kulo. A ŋutu liŋ morakiŋdye i nu tomoret.

⁴ A mor saŋi Kilikia koane duma, se ko koanejin logon a yumiat, ko katiyuk ti kötumit, anyen yekuŋdya kaŋo i kadi na MATAT toro ’bo liŋ logon a tetenaki Bala, ko Asera se ko kaser liŋ ti ki; a nye ’yuŋe se i kaŋo na Yerusalema i meleseno ti Kidirona, a joŋgi kurök kase tojo ko Betele.

⁵ A nye togwo ’yi koanejin ti nyömuejin, logon moran ti Yuda aje tiŋdu anyen ’yuŋa bökur i piritön kwakwasesi na gwon i ko ’dulan ti merya kune, i köjinö ti Yuda, ko i mara ti Yerusalema. A nye köti togwo ’yi se logon ’yuŋa bökur a lo Bala, ko a lo kolor, ko a lo yaŋa, ko a lo gweyarijin ti kaser temejik, ko a lo ŋo liŋ ti ki.

⁶ A nye joŋdi ködini lo mian logon a Asera kaŋo i kadi na MATAT, tojo ko i kaŋo na Yerusalema, tojo ko loro lo Kidirona, a nye ’yuŋe lepeŋ nyona ko lu loro, a nyö ’buŋe lepeŋ a naliliŋök, a ’bukoddi ŋutu kune i pirit nuket na ŋutu abur.

⁷ A nye duyömbi kadijik ti ŋutu logon totoluŋ ko ’börik gwoso keri kwakwaset lose lo nyömue. Kine kadijik gwon i kadi na MATAT, i pirit nagon ŋutu wate gweji boŋgwat ti Asera.

⁸ A nye joŋgi koanejin liŋ kaŋo i köji-nö ti Yuda, a toluddye piritön kwakwasesi na gwon i ko ’dulan ti merya kune nagon koanejin aje ’yuŋe rubaŋgajin, suluja Geba tojo ko Ber-seba; a nye duyömbi piritön nagon kwakwasarikin lorijoki ti mulökö gwoso na gwon i ko ’dulan ti merya kune. Kine piritön gwon i komor na kötumit na Yosua kasaranit lo köji, i swöt kadoŋe lo kötumit na köji.

⁹ Ma ’di sona koanejin ti piritön kwakwasesi na gwon i ko ’dulan ti merya kune kulu ti ŋo i pirit ’yuret na rubaŋgajin ti MATAT Yerusalema, ama a se ko koanejin luŋasirik kase nyesi ambata nagon ’bak kaŋo.

¹⁰ A nye toluddye Topet na gwon i pirit na ’dir na ŋwajik ti Inoma, anyen lele ŋuto gwon ti ’yurakiŋdya Molek ŋuro lonyit kode ŋuro nanyit a rubaŋga.

¹¹ A nye joŋgi kaŋo kusanjin nagon moran ti Yuda a tikin kolor a ’dokesi. Kine kusanjin gwon i lupet na kadi na MATAT, nyona ko kadi na Natana-melek duma lo kadi na mor. Kadi nanyit gwon i lukata na mariŋ na kadi na MATAT. A mor ’yuŋe arabiajin lo jijikö logon a ti kolor kulo.

¹² A nye duŋge piritön ’yuresi ti rubaŋgajin na gwon i lo ’dek lo koŋilore na Akaja, nagon moran ti Yisaraele a teten kune, ko piritön ’yuresi ti rubaŋgajin nagon Manase a teten i lukata na mariŋan murek ti kadi na MATAT, a nye gwagwalaggi se, a ’buköddi ŋutu nase i loro Kidirona.

¹³ A mor toluddye piritön kwakwasesi na gwon i ko ’dulan ti merya na gwon i swöt lo ’yure lo Yerusalema kune, i swöt lo loki lo mere Bilaya. Kine piritön kwakwasesi Solomona mor lo Yisaraele a ’dukökin Asatoret Ŋun na mamana na ŋutu ti Sidona, ko Kemosa Ŋun lo mamana lo Moaba, ko Milikom Ŋun lo mamana lo ŋutu ti Amon.

¹⁴ A nye gwagwalaggi ŋurupö lo togwi ’diki ki gwoso kumutan kulo, a toggi kaden ti mian kak logon a Asera, a töjoreji ŋinu pirit ’bukuluŋ ko kuyu ti ŋutu.

¹⁵ Koti a mor dukakiŋdye pirit ’yuret na rubaŋgajin na gwon Betele nu, se ko pirit kwakwaset na gwon i ko ’du na mere na ’duk Yerobama ŋuro lo Nebat na, logon a tiŋdu Yisaraele i toroŋdya lo, a gwagwalaggi ŋurupö kase, a nyö ’buŋe lepeŋat a naliliŋök, a nye köti ’yuŋe ködini lo mian logon a Asera.

¹⁶ A na wöripöri Yosia nu, a nye meddi gulömö yu i mere; a nye sonyoddi ŋutu i ’dumuŋdya na kuyu i kunu gulömö, a ’yuŋe se i loki na pirit ’yuret a to-luddye lepeŋ, gwoso kulyaet lo MATAT logon ŋuto lo Ŋun a saŋi, logon köju a keju kine kulya lo.

¹⁷ A nye pije adi, Ŋilu ŋurupit kweyet logon nan memet lu kweja nyo? A ŋutu ti köji takiŋdye lepeŋ adi, Ŋinu a gulöm na ŋuto lo Ŋun lo ŋo Yuda a keŋ kine ŋo nagon do aje konakin pirit ’yuret na rubaŋgajin na gwon Betele na.

¹⁸ A nye kulyani adi, Ti lepeŋ gwe; ti lele ŋuto gwe ti joŋga kuyu kanyit. Nyena a se kölökiŋdye kuyu kanyit, se ko kuyu ti nebi lo ŋo kaŋo Samaria lo.

¹⁹ A Yosia köti duyömbi kadijik kwakwasesi na gwon i ko ’dulan ti merya na gwon i köjinö ti Samaria, nagon moran ti Yisaraele aje ’duggö i towoŋa na MATAT kune; a nye konakiŋdye se gwoso i ŋo liŋ nagon nye aje kon Betele yu kunu.

²⁰ A nye tatuje koanejin liŋ lo gwon yu kulu i loki na piritön ’yuresi ti rubaŋgajin. Kilo koanejin a ti piritön kwakwasesi na gwon i ko ’dulan ti merya kune. A nye ’yuŋe kuyu ti ŋutu i kunu piritön ’yuresi loki. A kirut nye yitöni Samaria.

Rorwe lo Pasaka a kona

²¹ A mor saŋi ŋutu liŋ adi, Konakiŋdye ta MATAT ŋun losu rorwe lo Pasaka, gwoso nagon a wuröki i na buk na tomoret.

²² Kogwon Pasaka gwoso lo a ko nyuŋ kona, suluja i perok ti ka ’duŋök logon köju saŋu Yisaraele kulu, kode i perok liŋ ti moran ti Yisaraele kode ti Yuda;

²³ ama i kiŋa topuök wot budök na gwoŋdi Yosia a mor nu, a ŋilo Pasaka iŋge konaki MATAT Yerusalema yu.

MATAT a ko löpuggö i woran nanyit ko ŋutu ti Yuda

²⁴ A Yosia köti togwo ’yi ŋutu logon do ’ya ko kwen ti mulökö, ko ’bunuk, ko nyömuejin, ko ŋojinö ti Ŋunyen kana, ko manat liŋ nagon a meta i jur lo Yuda ko Yerusalema, anyen nye böŋö togo ’yu kulyaesi ti saresi logon a wuröki i buk nagon koane Kilikia a ryeju i kadi na MATAT.

²⁵ A lele mor köju gwe ’bayin kanyit ŋerot logon gwoso lepeŋ, logon a löpuköddu ko MATAT ko töili lonyit liŋ ko ködudwö nanyit liŋ ko riŋit nanyit liŋ, gwoso saresi liŋ ti Mose; a lele mor gwoso lepeŋ gwe a ko pukun koti kanyit i mukök.

²⁶ Ma ’di sona MATAT a ko löpuggö i woran nanyit duma nagon a tulekin ko Yuda na, kogwon toworesi liŋ nagon Manase a towoŋi lepeŋ kune.

²⁷ A MATAT kulyani adi, Nan köti mo wusaddu kötumit na Yuda kaŋo köyö i metet, gwoso na wusaddi nan kötumit na Yisaraele na, a nan mo renyani ŋina köji nagon nan a wulun nagon a Yerusalema, ko kadi nagon nan a kulyari adi, Karin kwe mo gwon nyu na.

Twan na Yosia

²⁸ A pitönö ti konesi ti Yosia, ko ŋo liŋ nagon nye a kon, kine ’bayin a se nagon a wuröki i Buk na Dekat ti moran ti Yuda le?

²⁹ a i perok ti Yosia a Paro Neko mor lo Ejipeto iti ko mor lo Asura yu tojo ko kare Perat. A mor Yosia iti i teŋgu na lepeŋ; a Paro Neko tatuje lepeŋ Megido yu, na meddi nye lepeŋ nu.

³⁰ A köliŋönök kanyit ’doggi lepeŋ aje twan ko arabia lo jijikö suluja Megido, a joŋdi lepeŋ Yerusalema, a nuŋge lepeŋ i gulöm nanyit. A ŋutu ti jur joŋgi Yeyoakaja ŋuro lo Yosia, a welakiŋdye lepeŋ, a tiŋdi lepeŋ a mor i ruddya na monye lonyit.

Yeyoakaja suluja gwon a mor a iŋge joŋa kaŋo

³¹ A Yeyoakaja gwe ko kiŋajin merya murek wot musala na suluje nye gwon a kasaranit nu, a nye saŋi Yerusalema yu ko yaŋa la musala. A karin ti ŋote nanyit gwe a Kamutala ŋuro na Yeremia lo Libina.

³² A nye koŋdi ŋo nagon a naron ko MATAT i metet, gwoso i ŋo liŋ na kon merenyejin kanyit köju kunu.

³³ A Paro Neko rereggi lepeŋ ko toŋot Ribila yu i jur lo Kamat, anyen lepeŋ gwon ti saŋu Yerusalema, a nye ri ’dikiŋdye ŋilu jur i robba na pödö nagon temuŋdya a talentajin mia geleŋ ko talenta geleŋ na dakap.

³⁴ A Paro Neko tiŋdi Eleyakim ŋuro lo Yosia a mor i ruddya na monye lonyit, a löpuŋge karin kanyit a Yeyoya-kim. Ama a nye joŋgi Yeyoakaja kaŋo; a Yeyoakaja ’dure Ejipeto, a twane twan nyu.

³⁵ A Yeyoyakim tiŋdi Paro ŋödo ko dakap, a nye tiŋdi lu jur i ’buggö na usur gwoso saret lo Paro. A nye ri ’diki-ŋdye ŋutu ti jur i robba na ŋödo ko dakap gwoso na kenaki se liŋ geleŋ geleŋ na, anyen tiki Paro Neko.

Yeyoyakim a mor

³⁶ A Yeyoyakim gwe ko kiŋajin merya murek wot mukanat na suluje nye gwon a kasaranit nu, a nye saŋi Yerusalema yu ko kiŋajin puök wot geleŋ. A karin ti ŋote nanyit gwe a Jebida ŋuro na Pedaya lo Ruma.

³⁷ A nye koŋdi ŋo nagon a naron ko MATAT i metet, gwoso i ŋo liŋ na kon merenyejin kanyit köju kunu.