2 Moran 22 - Bibilia Buk na Ŋun nagon koti luŋu a

Kulya ti Yosia se ko buk na saresi

¹ A Yosia gwe ko kiŋajin budök na suluje nye gwon a kasaranit nu; a nye saŋi Yerusalema yu ko kiŋajin merya musala wot geleŋ, A karin ti ŋote nanyit gwe a Yedida ŋuro na Adaya lo Bosekat.

² A nye koŋdi ŋo nagon a na ’but ko MATAT i metet, a wöröni i kiko lo Dawidi merenye lonyit, a nye gwe a ko girara i könin lo lutaten kode i lo kadoŋe.

³ A i kiŋa topuök wot budök na gwoŋdi Yosia a mor nu, a mor soŋdi Sapana kawurönit, logon a ŋuro lo Asalia, ŋuro lo Mesulam, tojo ko kadi na MATAT kulya adi,

⁴ Iti ko koane Kili-kia yu, anyen nye böŋö keŋdya gurut nagon a jwe i kadi na MATAT, nagon katiyuk ti kötumit aje momorun ko ŋutu kune;

⁵ ko ti kine gurut tikine i könisi ti kakitak logon a kametak ti kadi na MATAT; ko ti se tiŋdi kakitak logon gwon nyu i kadi na MATAT i teteŋdya na swötön kanyit logon a kököröju,

⁶ kweja adi tiki kakepak, ko ka ’dukok, ko ka ’dukök ti gorom nagon a mariŋ, ko koti anyen kunie gurut gwororikin kaden ko ŋurupö lo tuturu anyen tetenarikin kadi nu.

⁷ Ama se ti bulö piya i kulya ti gurut nagon a tiki kase i könisi kunu, kogwon se a ŋutu lo yiyiniki.

⁸ A Kilikia koane duma, kulyani ko Sapana logon a kawurönit adi, Nan a ryeju buk na saresi i kadi na MATAT. A Kilikia tiŋdi Sapana nu buk, a nye keŋdi lepeŋ.

⁹ A Sapana kawurönit ŋoŋdi ko mor ni, a nyonyökokiŋdye mor adi, Köliŋönök kulök aje ’dumaddu kaŋo gurut nagon a rye i kadi na MATAT kune, ko aje tiŋdu i könisi ti kakitak logon a kametak ti kadi na MATAT.

¹⁰ A Sapana kawurönit takiŋdye mor adi, Koane Kilikia a tiŋdu nan na buk. A Sapana keŋdi nu buk ko mor i komor.

¹¹ A gwe sona na yiŋge mor kulyaesi ti nu buk na saresi nu, a nye kekereŋdi boŋgwat kanyit.

¹² A mor saŋi koane Kilikia se ko Akikam ŋuro lo Sapana, ko Akebor ŋuro lo Mikaya, ko Sapana kawurönit, ko Asaya köliŋönit lo mor, adi,

¹³ Iti ta, ko piyuŋdye ta ko MATAT i kulya kwe, ko i kulya ti ŋutu, ko i kulya ti Yuda liŋ, kogwon kulyaesi ti na buk nagon aje rye na; kogwon woran na MATAT nagon aje tulekin kayaŋ gwe a duma, kogwon merenyejin kaŋ a ko yiŋ kulyaesi ti na buk, anyen koŋdya gwoso i ŋo liŋ nagon a wuröki yi.

¹⁴ A koane Kilikia, se ko Akikam, ko Akebor, ko Sapana, ko Asaya iti ko Kuleda nagon a nebi yu nakwan na Salum katiyunit lo kadi ’delet na boŋgwat. Ŋilo Salum a ŋuro lo Tikewa. (Ŋina ŋuto si ’da Yerusalema i swöt tomurek lo köji.) A se tujamaki ko lepeŋ.

¹⁵ A Kuleda kulyani ko se adi, MATAT Ŋun lo Yisaraele lo kulya sona adi, Taki ta ŋuto lo sunyuŋdyö ta köyö ni lo adi,

¹⁶ MATAT lo kulya sona adi, Mete, nan mo jakiŋdya ŋina pirit se ko ŋutu kanyit ŋo naron anyen tema-kiŋdya i kulyaesi liŋ ti buk nagon mor lo Yuda aje ken na.

¹⁷ Kogwon se aje kö ’yu nan ko aje ’yurakiŋdya kulye Ŋunyen bökur, anyen se towoŋa nan ko kitajin liŋ ti könisi kase, nyenagon woran nio mo tutulekin i ŋina pirit, a mo tine pepa.

¹⁸ A ta kulyani sona ko mor lo Yuda logon a sunyuŋdyö ta i piyuŋdya ko MATAT lo adi, MATAT ŋun lo Yisaraele lo jambu sona i kulya ti kulyaesi logon do aje yiŋ kulo adi,

¹⁹ Kogwon töili ilot lilik, a do tokoyoggi mugun ko MATAT i komor, na yiŋge do ŋo nagon nan aje jambu i kulya ti na pirit, ko i kulya ti ŋutu kanyit adi se kodyö mo gwon a tusörit ko a lomit, ko köti do a kekereŋdya boŋgwat kunok a gwine gwien köyö i komor, a nan köti iŋge yiŋ do, nan MATAT lo kulya sona.

²⁰ Nyenagon, mete, nan mo tomo-rakiŋdya do ko merenyejin kulök, a do mo jopani i gulöm inot ko taliŋ, a do mo tine met ŋo narok liŋ nagon nan mo jakin na pirit kune. A se nyönyökö-kiŋdye mor kilo kulyaesi.