2 Moran 21 - Bibilia Buk na Ŋun nagon koti luŋu a

Manase a mor

¹ A Manase gwe ko kiŋajin puök wot murek na suluje nye gwon a kasaranit nu, a nye saŋi Yerusalema yu ko kiŋajin merya mukanat wot mukanat. A karin ti ŋote nanyit gwe a Kepesiba.

² A nye koŋdi ŋo nagon a naron ko MATAT i metet, gwoso konesi manat ti jurön logon MATAT köju a rikörö kaŋo ko ŋutu ti Yisaraele i komor kulu.

³ Kogwon nye a nyöggu ’duggö piritön kwakwase-si na gwon i ko ’dulan ti merya nagon Kijikia monye lonyit aje köŋu kune; a nye ’dukökiŋdye Bala piritön ’yuresi ti rubaŋgajin, a nye teteŋdi ködini lo mian logon a Asera, gwoso na koŋdi Aba mor lo Yisaraele köju nu, a nye kwakwaddi kaser liŋ ti ki, a kitakiŋdye se.

⁴ A nye ’duŋge piritön ’yuresi ti rubaŋgajin i kadi na MATAT, nagon MATAT a kulyari adi, Nan mo tiŋdu karin kwe Yerusalema na.

⁵ A nye ’dukökiŋdye kaser liŋ ti ki piritön ’yuresi ti rubaŋgajin i lukata na mariŋan murek ti kadi na MATAT.

⁶ A nye ’yuŋe ŋuro lonyit a rubaŋga, a nye koŋdi dolesio, a nye kitani ko ŋutu logon do ’ya ko kwen ti mulökö, se ko kawanak. A nye koŋdi ŋo narok jore ko MATAT i metet, i towoŋa na lepeŋ.

⁷ A nye tiŋdi Asera nagon a nyömue na gigiru nagon nye a teten na i kadi na Ŋun. Ŋina a kadi nagon köju MATAT a kulyari ko Dawidi se ko ŋuro lonyit Solomona adi, Nan mo tiŋdu karin kwe ŋupi i na kadi, ko i Yerusalema nagon nan a wulun i kötumitön liŋ ti Yisaraele na;

⁸ a nan mo tine tiŋdu ŋutu ti Yisaraele köti i wöröji kaŋo abur i jur logon nan aje tin merenyejin kase lo, ko se ködyö mo gwon ko tirikwet i koŋdya gwoso i ŋo liŋ nagon nan a sarakin se kune, ko gwoso i saresi liŋ logon Mose köliŋönit liŋ a sarakin se kulo.

⁹ Ama se ti yiŋga, a Manase togiraddi se i koŋdya na konesi narok lwölwöŋ na koŋdi kulu jurön logon MATAT köju a tukar ko ŋutu ti Yisaraele i komor kulu.

¹⁰ A MATAT jambi i kutusen ti köliŋönök kanyit nebijin adi,

¹¹ Kogwon Manase mor lo Yuda aje koŋdya kine ŋo na mamana, ko aje koŋdya a naron lwölöŋ ŋo liŋ na kon ŋutu ti Amori lo gwon kanyit ŋerot kulu, ko köti aje tiŋdu Yuda i toroŋdya ko nyömuejin kanyit;

¹² nyenagon nan MATAT Ŋun lo Yisaraele lo kulya sona adi, Mete, nan mo jakiŋdya Yerusalema se ko Yuda kulya narok anyen swö ti ŋutu liŋ lo yiŋga kine kulya kulo mo gigiŋga adi birr.

¹³ A nan mo rije temet i loki na Yerusalema nagon a temarikin Samaria, ko temet na leleyo i gorom nagon a temarikin kötumit na Aba; a nan mo seji Yerusalema gwoso ŋuto na seja saani, a söpuŋge lepeŋ.

¹⁴ A nan mo paji pitönö ti ŋutu kwe lomoriot, a tiŋdi se i könisi ti merok kase, a se mo gwe gwoso ŋo lo kokolwe kode lo ryaryakwe ti merok kase liŋ,

¹⁵ kogwon lepeŋat a koŋdya ŋo nagon a naron köyö i metet ko aje towoŋa nan, suluja i lor logon merenyejin kase a pori kaŋo Ejipeto lu tojo ko lo lor.

¹⁶ Köti luŋa Manase a ’buköddu rima na mamaŋa jore parik, tojo lepeŋ a tojore Yerusalema i ’dutet tojo ko nene ’dutet, kökö toron nagon nye a tiŋdi kötumit na Yuda i toroŋdya anyen se koŋdya ŋo nagon a naron ko MATAT i metet.

¹⁷ A pitönö ti konesi ti Manase, ko ŋo liŋ nagon nye a kon, ko toron nagon nye a kon kune, kine ’bayin a se nagon a wuröki i Buk na Dekat ti moran ti Yuda le?

¹⁸ A Manase dotoni ko merenyejin kanyit, a nukani i melesen na gwon i ’baŋ nanyit nagon köju a melesen na Usa na; a Amon ŋuro lonyit lo ruddye tumatyan nanyit.

Amon a mor

¹⁹ A Amon gwe ko kiŋajin merya murek wot murek na suluje nye gwon a kasaranit nu, a nye saŋi Yerusalema yu ko kiŋajin murek. A karin ti ŋote nanyit gwe a Mesulemet ŋuro na Karusa lo Yoteba.

²⁰ A nye koŋdi ŋo nagon a naron ko MATAT i metet, gwoso na koŋdi Manase monye lonyit nu.

²¹ A nye wöröni i kiko lo wöröri monye lonyit, a nye kitakiŋdye nyömuejin logon monye lonyit köju a kitakin kulu, a kwakwaddi se;

²² a nye kö ’yi MATAT Ŋun lo merenyejin kanyit, a tine wörö i kiko lo MATAT.

²³ a köliŋönök ti mor Amon momori a lwön anyen mwön ko lepeŋ, a se tatuje lepeŋ kanyit kadi.

²⁴ Ama a ŋutu ti jur tatuje se liŋ logon a momora a lwön i mwön ko mor Amon kulu, a ŋutu ti jur tiŋdi Yosia ŋuro lonyit i ruddya na lepeŋ a mor.

²⁵ A pitönö ti konesi ti Amon nagon nye a kon kune, kine ’bayin a se nagon a wuröki i Buk na Dekat ti moran ti Yuda le?

²⁶ A nye nukani i gulöm nanyit i melesen na Usa; a Yosia ŋuro lonyit lo ruddye tumatyan nanyit.