2 Moran 2 - Bibilia Buk na Ŋun nagon koti luŋu a

Eliya a ’depaji ki i ’diko

¹ A gwe sona nagon MATAT ’deke joŋga Eliya ki ko libibiu nu, a Eliya se ko Elisa ŋiörö kaŋo Giligala.

² A Eliya kulyani ko Elisa adi, Möŋdi ni boŋo, kogwon MATAT a soŋdu nan teŋ ko Betele. Ama a Elisa kulyani adi, ’Diri gwak gwoso na gwoŋdi MATAT na, ko gwoso na gwoŋdi do ko mugun inot ŋina, nan ti kölökin do asut. Nyena a se dudulara tojo ko Betele.

³ A teŋ na nebijin lo gwon Betele kulu poŋdi ko Elisa ni a pije lepeŋ adi, Do deden le adi i lo lor MATAT de ’dumaddu duma ilot logon do a yumi lonyit lo? A nye waddi adi, Nan deden; yiŋani ta taliŋ.

⁴ A Eliya kulyani ko lepeŋ adi, Elisa, mordi ni böno; kogwon MATAT a soŋdu nan tojo ko Yeriko. A Elisa waddi adi, ’Diri gwak gwoso na gwoŋdi MATAT na, ko gwoso na gwoŋdi do ko mugun inot ŋina, nan ti kolokin do asut. A se ’dure Yeriko.

⁵ A teŋ na nebijin lo gwon Yeriko kulu poŋdi ko Elisa ni, a pije lepeŋ adi, Do deden le adi i lo lor MATAT de ’dumaddu duma ilot logon do a yumi lonyit lo? A nye waddi adi, Iŋkoi, nan deden; yiŋani ta tali.

⁶ A Eliya kulyani ko Elisa adi, Möŋdi ni boŋo, kogwon MATAT a soŋdu nan tojo ko Yardene. Ama a Elisa waddi adi, ’Diri gwak gwoso na gwoŋdi MATAT na, ko gwoso na gwoŋdi do ko mugun inot ŋina, nan ti kölökin do asut. A se murek liŋ iti ŋerot.

⁷ A ŋutu merya mukanat ti teŋ na nebijin köti iti tu, a gwo ’de gwo ’dan pajo ko lepeŋat, a ko Eliya ko Elisa gwo ’de nyona ko Yardene.

⁸ A Eliya ’dumuŋdye boŋgo nanyit nagon a muit, a ŋudu ’ye lepeŋ, a gwuddye pioŋ, a pioŋ koŋi koŋa kunie i lele swöt ko kunie i lele swöt, a se murek laŋaddi i nu pele i kak nateyon.

⁹ A gwe sona nagon se aje laŋaddu i nu pele nu, a Eliya kulyani ko Elisa adi, Pije ŋo nagon nan de kökonakin do, i ŋerot nagon nan a ko nyuŋ koraji konut na. A Elisa kulyani adi, Ti nan böŋö ruddye koret daŋin murek na riŋit kitaet inot a nebi.

¹⁰ A nye waddi adi, Do a pija ŋo na pömöni; kölumbö ko do a metara nan na koraji ’e nan konut nu, a kine ŋo poki konut; ama ko do a ko metara nan, a kine ŋo de tine gwon sona.

¹¹ A nagon se nyuŋ tu ŋerot jajamaddu nu, mete, a arabia lo kimaŋ lo jijiko ko kusanjin ti kimaŋ koŋi lepeŋat murek. A Eliya ’dokoni ki ko libibiu tojo i ’diko.

¹² A Elisa iŋge metara, a nye luluje lulujö adi. A, baba, baba! arabiajin ti Yisaraele lo jijiko se ko kajoŋak kase! A nye tine met lepeŋ köti asut. A Elisa morgi boŋgwat kanyit kune a kekereŋdi se i tupesi murek.

Elisa ruddya Eliya a nebi

¹³ A nye ’dumuŋdye boŋgo na Eliya nagon a muit na ’doro kak ko lepeŋ na, a yitöni bot a gwo ’de gwo ’dan i kijit na Yardene.

¹⁴ A nye ’dumuŋdye nu boŋgo na Eliya na ’doro kak ko lepeŋ nu, a gwuddye pioŋ kulya adi, Liya MATAT Ŋun lo Eliya? A nye ko gwuddye kunu pioŋ a se koŋi koŋa, kunie i lele swöt ko kunie i lele swöt; a Elisa laŋaddi i nu pele.

¹⁵ A teŋ na nebijin lo gwon Yeriko kulu ko meddi lepeŋ pajo, a se kulyani adi, Mulökötyo lo Eliya aje yukin ko Elisa. A se iti i rum ko lepeŋ, a dulakine kak ko lepeŋ i komor.

¹⁶ A se kulyani ko lepeŋ adi, Mete, yi köliŋönök kulök gwon ko ŋutu iŋgo merya mukanat ni; ti lepeŋat böŋö iti ga ’yu na duma ilot; kode Mulökötyo lo MATAT ŋona a ’depaddu lepeŋ ki a gubakiŋdye lepeŋ i lele mere kode i lele loro. A nye kulyani adi, Ta ti soŋdu.

¹⁷ Ama na tiddye se lepeŋ tojo ko kwe nanyit a yu nu, a nye kulyani adi, logö, soŋdi ta. Nyenagon a se soŋdi ŋutu merya mukanat kulo; a se galaddi galaddu perok musala ama se a ko ryo lepeŋ.

¹⁸ a se yitweni bot ko lepeŋ ni nagon nye monuŋdyo Yeriko nu, a nye pije lepeŋat adi, Nan ’beron a ko takin ta le adi ta kodyo ti tu?

¹⁹ A ŋutu ti köji kulo kulyani ko Elisa adi, Mete, na köji gwon i pirit na ’but gwoso na meddi do duma likaŋ na; ama pioŋ a narok, ko köti lö jur ti radan.

²⁰ A nye kulyani adi, Taki ta nan dikori ludukotyo ko tiki ta ’balaŋ kata. A se jakiŋdye lepeŋ dikori.

²¹ A nye iti i pirit leleket na pioŋ a ratakiŋdye ’balaŋ kata a kulyani adi, MATAT lo kulya sona adi, Nan aje toke ’ya kine pioŋ; nyenagon suluja i na diŋit kine pioŋ mo ti tiŋdu twan kode yoŋ köti.

²² Nyena a kunu pioŋ gwe a nake tojo ko lo lor, gwoso kulyaet logon Elisa a kulyari lo.

²³ A nye ŋiörö kaŋo nyu a iti tojo ko Betele; a nagon nye gwoni tu i ŋilu kiko nu, a kulye ŋwajik lo ’di ’dik lupene kaŋo köji kata a kweni ’e kweni ’e lepeŋ adi, Iti yu, lomelen kwe! Iti yu, lomelen kwe!

²⁴ A nye boŋgi se, a lömbi se i karin ti MATAT. A gwuruŋin murek nawate na burunyuŋdye kaŋo i rudu a roroŋdi kulye kase merya iŋwan wot murek.

²⁵ A nye lwöŋöddi tojo ko mere Karme-la, a kirut a nye yitwene Samaria.