2 Moran 18 - Bibilia Buk na Ŋun nagon koti luŋu a

Kijikia a mor

¹ A ko gwe sona i kiŋa tomusala na gwoŋdi Osea ŋuro lo Ela a mor lo Yisaraele nu, a Kijikia ŋuro lo Akaja, mor lo Yuda, suluje gwon a kasaranit.

² A nye gwe ko kiŋajin merya murek wot mukanat na suluje nye gwon a kasaranit nu, a nye saŋi Yerusalema yu ko kiŋajin merya murek wot buŋwan. A karin ti ŋote nanyit gwe a Abi ŋuro na Takaria.

³ A Kijikia koŋdi ŋo nagon a na ’but ko MATAT i metet, gwoso i ŋo liŋ na kon Dawidi merenye lonyit köju kunu.

⁴ A nye tuŋe kak piritön kwakwasesi na gwon i ko ’dulan ti merya kune, a gwagwalaggi ŋurupö lo togwi ’diki ki anyen kwakwasa kulo, a toggi kaden ti mian logon a Asera kak. A nye gwagwalaggi ŋöjinöti na munu logon Mose köju a teteŋdya ko mölwö lu, kogwon tojo ko kilu perok ŋutu ti Yisaraele ’yurakiŋdya lepeŋ bökur; a lu munu lupuni a Nekusetan.

⁵ A Kijikia yinikiŋdye mugun ko MATAT Ŋun lo Yisaraele; a lele gwe ’bayin kanyit i mukök i kiden na moran ti Yuda logon jojo ko lepeŋ, kode i kiden na se logon kanyit ŋerot.

⁶ Kogwon nye a ’depakiŋdya go ko MATAT; a tine kö ’yu keŋoddu lepeŋ, ama a nye ’debbi saresi logon MATAT a sarakin Mose kulu.

⁷ A MATAT gwe ko Kijikia; a kulya kanyit puputuru ŋerot ’bura i ŋo liŋ nagon nye kökon kunu. A nye renya-ni sara ko mor lo Asura, a tine ’bön kitakiŋdya lepeŋ.

⁸ A nye te ’yi ŋutu ti Pelesete tojo ko Gaja ko koresi kanyit suluja i bililiyat ti kayukuk tojo ko köjinö nagon a gömö ko maripan nago.

Samaria a tela

⁹ A i kiŋa toiŋwan na gwoŋdi Kijikia a mor, logon a kiŋa toburyo na gwoŋdi Osea ŋuro lo Ela a mor lo Yisaraele nu, a Salumaneser mor lo Asura poni i mörö ko Samaria, a tumbe lepeŋ,

¹⁰ a te ’yi lepeŋ i mukök na kiŋajin musala. A i kiŋa tobuker na gwoŋdi Kijikia a mor, logon a kiŋa tobuŋwan na gwoŋdi Osea a mor lo Yisaraele nu, a Samaria kirut telani tela.

¹¹ A mor lo Asura joŋgi ŋutu ti Yisaraele kaŋo tojo ko Asura, a tosi ’daji se Kalak ko kötinyona ko Kabor logon a kare lo Gojan, ko i köjinö ti ŋutu ti Medai,

¹² kogwon se a ko yiŋ gworo lo MATAT Ŋun lose a laŋgi tomoret nanyit, ma ’di saresi liŋ logon Mose köliŋönit lo MATAT köju a saŋi kulu; a se tine yiŋga kode koŋdya.

Sanakeriba luŋö i jur lo Yuda i morga na lepeŋ

¹³ A i kiŋa topuök wot iŋwan na gwoŋdi Kijikia a mor nu, a Sanakeriba mor lo Asura poni i möro ko köjinö liŋ ti Yuda nagon a gömö ko mariŋan nago, a te ’yi se.

¹⁴ A Kijikia mor lo Yuda soŋdi lore Lakisa ko mor lo Asura yu, adi, Nan a koŋdya arabat; wusaddi kaŋo köyö ni; nan a ruk ŋo liŋ nagon do tiŋdu nan i koŋdya. A mor lo Asura luŋgi ko Kijikia mor lo Yuda ŋödo nagon temuŋdya a talentajin miajin musala, ko dakap nagon temuŋdya a talentajin merya musala.

¹⁵ A Kijikia tiŋdi lepeŋ podö kune liŋ na rye i kadi na MATAT, ko i piritön ’delesi ti kadi na mor.

¹⁶ A i nu diŋit a Kijikia ’boggi dakap kaŋo i kötumitön ti kadi na MATAT, ko i kaden gopesi kase. Kine a dakap nagon Kijikia mor lo Yuda köju a muluje kune. A nye tiŋdi mor lo Asura kine dakap.

¹⁷ A mor lo Asura sonyoddi kaŋo Tartan ko Rabasarisa ko Rabasake se ko kamörök jore, suluja Lakisa tojo ko Yerusalema ko mor Kijikia yu. A se iti tu a ’dure Yerusalema. A se ko ’dure, a se iti tu, a gwo ’de nyona ko kiko wökiet lo pioŋ ti jor na gwon i swöt lo ki i kiko lo tiri kak na katokwekweyak ti boŋgwat.

¹⁸ A se ko luŋgi mor, a Eleyakim ŋuro lo Kilikia logon a duma lo kadi na mor lo lupene kase ni, se ko Sebena logon a kawurönit, ko Yöak ŋuro lo Asap katoyeyeonit.

¹⁹ A Raba-sake kulyani ko lepeŋat adi, Taki ta Kijikia adi, Mor duma logon a mor lo Asura lo pija sona adi, Yupet inot a nyo nagon do yiyinikin?

²⁰ Do yeyeju adi kulyaesi kana bubulö gwon a jujuwet ko a riŋit möriet! Do sopinana yinikiŋdyö mugun ko ŋa nagon do renya sara ko nan na?

²¹ Do sopinana a yinikin mugun ko Ejipeto? Ejipeto a ture pa ’duŋi lo ’beleŋo, logon mo soso könin lo ŋuto logon tokokin mugun i lepeŋ lo. Nyena Paro mor lo Ejipeto gwon sona ko ŋutu liŋ logon yinikiŋdyö ’börik ko lepeŋ kilo.

²² Ama ko do kulya ko nan adi, Yi yinikiŋdyö ’börik ko MATAT Ŋun likaŋ: ŋilo a leŋe ŋun logon piritön kwakwasesi kanyit na gwon i ko ’dulan ti merya ko piritön ’yuresi kanyit ti rubaŋgajin Kijikia a tur kak kune le? Ŋilo a leŋe Ŋun logon Kijikia a kulya ko ŋutu ti Yuda se ko ti Yerusalema adi, Ta ködyö kwakwaddu i komor na pirit ’yuret na rubaŋgajin na gwon Yerusalema ni na?

²³ Nyenagon soŋinana böŋö toruköki ta ko duma liŋ mor lo Asura: nan mo tiŋdu ta kusanjin aliŋan murek ko ta logon bubulö tiŋdu ŋutu kajopak kase loki.

²⁴ Nyena ta bubulö riköddu ada ma ’di duma geleŋ i kiden na köliŋönök lo ’di ’dik ti duma liŋ, na yinikiŋdye ta Ejipeto i kulya ti arabiajin lo jijikö ko i kulya ti kajopak ti kusanjin?

²⁵ Nan soŋinana a ŋo i lo jur ’bak MATAT le, i tukaŋu na lepeŋ? MATAT a kulya ko nan adi, Iti i lo jur i tukaŋu na lepeŋ.

²⁶ A Eleyakim ŋuro lo Kilikia, ko Sebena se ko Yöak kulyani ko Rabasake adi, Böŋö kulyani ko köliŋönök kulök ko kutuk na Aram, kogwon yi yiyiŋ lepeŋ; an do ko jambu koyi ko kutuk na Yudayaki i yiŋa ko ŋutu lo gwon i loki na mariŋ nagon a gorom kilo.

²⁷ Ama a Rabasake kulyani ko lepeŋat adi, Duma liŋ a sunyun nan i jamakin-dya na duma losu kilo kulyaesi se ko ta ka ’de le, ti gwon i ŋutu köti lo sisi ’da i loki na mariŋ nagon a gorom kilo, logon i ’dutet mo nyönyö kin kase ko mamat kula kase se ko ta i pirit na geleŋ le?

²⁸ A Rabasake kirut gwo ’de gwo ’dan a kulyajine ki ko kutuk na Yudayaki adi, Yiŋge ta kulyaesi ti mor duma, mor lo Asura!

²⁹ Mor lo kulya sona adi, Ti Kijikia gwe ti mumulugga ta, kogwon nye mo ti bulö lwökuŋdyö ta köyö i könin.

³⁰ Ti Kijikia gwe ti töyinikiŋdyö ta ko MATAT kulya adi, MATAT ’diri mo lwökuŋdyö yi, a ŋina köji mo tine wuki i könin lo mor lo Asura.

³¹ An ta ko yiŋ ta Kijikia; kogwon mor lo Asura lo kulya adi, Moruŋdye ta köyö ni i teteŋdya nataliŋ, ko ŋoŋdi ta kaŋo köyö ni; a ta liŋ geleŋ geleŋ mo nyesi lukweki ti kaden kasu ti binyo ko ti ki ’biet, a ta liŋ geleŋ geleŋ mo möji kasu i kidia;

³² tojo ko nan a ŋo i yekaddu na ta tojo ko lele jur gwoso ŋilo jur losu, logon a jur lo ’bolot ko binyo, ko a jur lo kinyo ko lo meleseno ti kaden ti binyo, ko a jur lo kaden ti jeitun ko a lo siwatat, anyen ta böŋö gwon jörun, a tine twa-twa. An ta ko yiŋ ta Kijikia ko nye lulukaddu ta kulya adi, MATAT mo lwölwök yi.

³³ Lele ŋun lo jurön kata logon ’beron a riŋaddu jur lonyit kaŋo i könin liŋ lo mor lo Asura le?

³⁴ Kuliya ŋunyen ti Kamat ko ti Arpada? Kuliya ŋunyen ti Separawayim, ko ti Ena, ko ti Lwa? Lepeŋat a riŋaddu Samaria kaŋo köyö i könin le?

³⁵ Lele ŋun kata i kiden na ŋunyen liŋ ti jurön, logon a riŋaddu jurön kase kaŋo köyö i könin? Nyena MATAT ŋona bubulö riŋaddu Yerusalema kaŋo köyö i könin ada?

³⁶ Ama a ŋutu kulu yiŋani taliŋ, a se gwe a ko wat Rabasake ma ’di ko kulyaet geleŋ to, kogwon mor a saŋu adi, An ta ko nyoŋ ta lepeŋ.

³⁷ a kirut Eleyakim ŋuro lo Kilikia, logon a duma lo kadi na mor se ko Sabena kawurönit ko Yöak ŋuro lo Asap katoyeyeonit, ŋoŋdi ko Kijikia ni ko boŋgwat kase a kekerenya, a nyönyökökiŋdye lepeŋ kulyaesi ti Rabasake.