2 Moran 16 - Bibilia Buk na Ŋun nagon koti luŋu a

Akaja a mor

¹ A i kiŋa topuök wot buryo na gwoŋdi Peka ŋuro lo Remalia a mor nu, a Akaja ŋuro lo Yotama mor lo Yuda, suluje gwon a kasaranit.

² A Akaja gwe ko kipajin merya murek na suluje nye gwon a kasaranit nu, a nye saŋi Yerusalema yu ko kipajin puök wot buker. A nye tine koŋdya ŋo nagon a na ’but ko MATAT Ŋun lonyit i metet, gwoso na koŋdi merenye lonyit Dawidi köju nu,

³ ama a nye wöröni i kiko lo moran ti Yisaraele. Lepeŋ köti a ’yuŋa ŋuro lonyit a rubaŋga gwoso konesi manat ti jurön logon MATAT köju a rikörö kaŋo ko ŋutu ti Yisaraele i komor kulu.

⁴ A nye ’duŋge rubaŋgajin a ’yuŋe bökur i piritön kwakwasesi na gwon i ko ’dulan ti merya kune, ko i merya loki, ko i mukökö ti kaden lo rurwan liŋ.

⁵ A kirut Resin mor lo Suria se ko Peka ŋuro lo Remalia, mor lo Yisaraele, poni i mörö ko Yerusalema, a se tumbe Akaja nyu ama a se tine bulo te ’ya lepeŋ.

⁶ A i nu diŋit a mor lo Edom nyökuŋdye Elat anyen gwon a na Edom, a riköddi ŋutu ti Yuda kaŋo Elat; a ŋutu ti Edom poni Elat, a si ’dani nyu tojo ko lo lor.

⁷ A Akaja soŋdi luyökie ko Tigilat-pileser mor lo Asura yu kulya adi, Nan a köliŋönit ilot ko a ŋuro ilot. Poŋdi ko lwök nan i könin lo mor lo Suria ko i könin lo mor lo Yisaraele logon kulo a pikin i mörö ko nan.

⁸ a Akaja köti ’dumuŋdye pödö ko dakap nagon rye i kadi na MATAT ko i piritön ’delesi ti kadi na mor, a nye sunyukiŋdye mor lo Asura a ’doket.

⁹ A mor lo Asura yiŋge lepeŋ, a nye iti i moro ko Damaseke, a te ’yi lepeŋ, a joŋgi ŋutu ti ŋinu köji a ’dupi tojo ko Kir, a nye tatuje Resin.

¹⁰ A mor Akaja iti Damaseke i rum ko Tigilat-pileser mor lo Asura, a nye meddi pirit ’yuret na rubaŋgajin na gwon Damaseke nu. A mor Akaja sunyukiŋdye koane Uriya gweya na ŋinu pirit ’yuret na rubaŋgajin ko miratti nanyit gwoso i tetenesi kanyit liŋ.

¹¹ A koane Uriya teteŋdi nu pirit ’yuret na rubaŋgajin; a nye koŋdi ŋo liŋ gwoso nagon mor Akaja a sunyukin lepeŋ Damaseke kune, i ŋerot na pori mor Damaseke yu nu.

¹² A mor ko ŋoŋdi Damaseke yu, a nye meddi pirit ’yuret na rubaŋgajin nu. A kirut mor mijöro i pirit ’yuret nyona, a kije kanyit loki,

¹³ a nye ’yuŋe rubaŋga lonyit lo ’yu ’yura ’buluŋ ko ’doket na ’bolot, a ’buŋge rubaŋga logon a ’bu ’buket, a nye ŋoggi rima ti rubaŋgajin kanyit ti taliŋ i loki na nu pirit ’yuret na rubaŋgajin.

¹⁴ A nye tomijoddi pirit ’yuret na rubaŋgajin nagon tetena ko mölwö nagon köju gwo ’dan ko MATAT i komor nu, a nye joŋgi lepeŋ kaŋo i komor na kadi, i nu pirit na gwo ’di ’e lepeŋ i kiden na pirit ’yuret na rubaŋgajin kanyit ti mor ko kadi na MATAT nu, a tiŋdi lepeŋ i swöt lo lobot lo nu pirit ’yuret nanyit na rubaŋgajin.

¹⁵ A mor Akaja saŋi koane Uriya adi, Do kodyö ’yuŋa rubaŋgajin i loki na ŋina pirit ’yuret duma na rubaŋgajin, logon a rubaŋga lo ’yu ’yura ’buluŋ lo ko ’bure, ko ’doket na ’bolot na wuki i sömukö i ’doro na kolor, ko rubaŋga lo ’yu ’yura ’buluŋ lo mor, ko ’doket nanyit na ’bolot, se ko rubaŋga lo ’yu ’yura ’buluŋ lo ŋutu liŋ ti jur, ko ’doket nase na ’bolot, ko rubaŋga ’bu ’buket lonyit; a do ŋoggi kanyit loki rima liŋ ti rubaŋga lo ’yu ’yura ’buluŋ ko ti kulye rubaŋgajin; ama ŋinu pirit ’yuret na rubaŋgajin nagon tetena ko mölwö na mo gwe a nio nagon nan kwakwaddi.

¹⁶ A koane Uriya koŋdi ŋo liŋ gwoso na saŋi mor Akaja nu.

¹⁷ A mor Akaja ’beleŋoddi mara ti gwo ’diesi kaŋo, a nye ’dumaddi lalaet kaŋo i kinu gwo ’diesi, a ’dukuŋdye ŋopö kak i loki na ŋöjinö ti öwönin logon a tetena ko mölwö lo gwon kanyit i mukök, a tiŋdi lepeŋ i loki na ŋurupö logon a peta kak.

¹⁸ A nye joŋgi pirit na mumuko a na sabata kaŋo i kadi na MATAT, nagon se a ’duggö i lukata na nu kadi, se ko lupet na mor nagon a tetena kaŋo. A nye koŋdi sona kogwon nye kukujono mor lo Asura.

¹⁹ A pitönö ti konesi ti Akaja nagon nye a kon kune, kine ’bayin a se nagon a wuröki i Buk na Dekat ti moran ti Yuda le?

²⁰ A Akaja dotoni ko merenyejin kanyit, a se nuŋge lepeŋ i pirit nuket na merenyejin kanyit i köji na Dawidi; a Kijikia ŋuro lonyit lo ruddye tumatyan nanyit.