2 Moran 15 - Bibilia Buk na Ŋun nagon koti luŋu a

Ajaria a mor

¹ A i kiŋa tomerya murek wot buryo na gwoŋdi Yerobama a mor lo Yisaraele nu, a Ajaria ŋuro Amajia mor lo Yuda suluje gwon a kasaranit.

² A nye gwe ko kiŋajin puök wot buker na suluje nye gwon a kasaranit nu, a nye saŋi Yerusalema yu ko kiŋajin merya mukanat wot murek. A karin ti ŋote nanyit gwe a Yekolia na Yerusalema.

³ A nye koŋdi ŋo nagon a na ’but ko MATAT i metet, gwoso ŋo liŋ na kon Amajia monye lonyit köju kunu.

⁴ Ma ’di sona piritön kwakwasesi na gwon i ko ’dulan ti merya kune a ko turö kak; ŋutu nyuŋ ’du ’duŋgo rubaŋgajin ko ’yu ’yuŋa bo-kur i kune piritön nagon a ko ’dulan.

⁵ A MATAT riŋge mor, a nye worani a ŋuto lo rimajin tojo ko lor lonyit twayet, a mor si ’dani i nene kadi nye geleŋ. A Yotama ŋuro lo mor gwe a duma lo mede na mor, i saŋu na ŋutu ti jur.

⁶ A pitönö ti konesi ti Ajaria, ko ŋo liŋ nagon nye a kon kune, kine ’bayin a se nagon a wuröki i Buk na Dekat ti moran ti Yuda le?

⁷ A Ajaria dotoni ko merenyejin kanyit, a se nuŋge lepeŋ ko merenyejin kanyit i merete i köji na Dawidi, a Yotama ŋuro lonyit lo ruddye tumatyan nanyit.

Takaria a mor

⁸ A i kiŋa tomerya musala wot budök na gwoŋdi Ajaria a mor lo Yuda nu, a Takaria ŋuro lo Yerobama gwe a kasaranit lo Yisaraele Samaria yu yaŋa la buker.

⁹ A nye koŋdi ŋo nagon a naron ko MATAT i metet, gwoso na koŋdi merenyejin kanyit köju nu. A nye tine ko ’yu toronjin ti Yerobama ŋuro lo Nebat nagon nye a tiŋdi Yisaraele i toroŋdya kune.

¹⁰ A Salum ŋuro lo Yabesa momori ko kulye ŋutu a lwön anyen mwön ko lepeŋ, a se gwutö-kiŋdye lepeŋ kak ko ŋutu i komor a tatuje lepeŋ, a nye ruddye tumatyan nanyit.

¹¹ A pitönö ti konesi ti Takaria, mete, se a wuröki i Buk na Dekat ti moran ti Yisaraele.

¹² (Ŋilo a milye lo MATAT logon nye a milyekin Yeu köju nu adi, Ŋwajik kulök molu si ’daki i si ’daet na tumatyan na Yisaraele tojo ko nyakwari toiŋwan. A kine ŋo iŋge temakiŋdya sona.)

Salum a mor

¹³ A Salum ŋuro lo Yabesa suluje gwon a kasaranit i kiŋa tomerya musala wot buŋwan na gwoŋdi Ujiya a mor lo Yuda nu, a nye saŋi Samaria ko yaŋa geleŋ.

¹⁴ A Menakem ŋuro lo Ŋadi poni kaŋo Tiresa a ’dure Samaria, a nye gwutökiŋdye Salum ŋuro lo Yabesa kak Samaria yu a tatuje lepeŋ, a ruddye tumatyan nanyit.

¹⁵ A pitönö ti konesi ti Salum, ko momora nanyit ko ŋutu a lwön i mwön ko mor, mete, se a wuröki i Buk na Dekat ti moran ti Yisaraele.

¹⁶ A i ŋinu diŋit a Menakem köŋi Tapuak ko se liŋ lo si ’da i ŋinu köji, ko koresi kanyit suluja Tiresa tojo ko ŋerot; nyena nye a köŋu lepeŋ, ko a kikilija ŋutu wate liŋ nagon ko pelela na gwon i ŋinu köji kunu, kogwon kilu ŋutu a ko pakin lepeŋ kötumitön ti köji.

Menakem a mor

¹⁷ A i kiŋa tomerya musala wot buŋwan na gwoŋdi Ajaria a mor lo Yuda nu, a Menakem ŋuro lo Ŋadi suluje gwon a kasaranit lo Yisaraele, a nye saŋi Samaria ko kiŋajin puök.

¹⁸ A nye koŋdi ŋo nagon a naron ko MATAT i metet; a nye tine kö ’yu toronjin liŋ ti Yerobama ŋuro lo Nebat nagon nye a tiŋdi Yisaraele i toroŋdya kune, i perok liŋ ti gwiliŋit nanyit.

¹⁹ A Pula mor lo Asura poni i mörö ko ŋilu jur; a Menakem tiŋdi Pula ŋö-do nagon temuŋdya a talentajin aliŋ geleŋ, anyen Pula böŋö parakiŋdya lepeŋ i togo ’yu na tomoran nanyit.

²⁰ A Menakem luŋgi kine gurut ko ŋutu kwörinikö liŋ ti Yisaraele, kweja adi ŋutu liŋ ködyö tiŋdu podö nagon temuŋdya a sekelejin merya mukanat, anyen tiki mor lo Asura. Nyena a mor lo Asura yitöni bot, a nye gwe a ko mönuŋdyö i ŋilu jur.

²¹ A pitönö ti konesi ti Menakem, ko ŋo liŋ nagon nye a kon kune, kine ’bayin a se nagon a wuröki i Buk na Dekat ti moran ti Yisaraele le?

²² A Menakem nukakine ko merenyejin kanyit i merete, a Pekakia ŋuro lonyit lo ruddye tumatyan nanyit.

Pekakia a mor

²³ A i kiŋa tomerya mukanat na gwoŋdi Ajaria a mor lo Yuda nu, a Pekakia ŋuro lo Menakem suluje gwon a kasaranit lo Yisaraele Samaria yu, a nye saŋi ko kipajin murek.

²⁴ A nye koŋdi ŋo nagon a naron ko MATAT i metet; a nye tine löpuggö i toronjin ti Yerobama ŋuro lo Nebat nagon nye a tiŋdi Yisaraele i toroŋdya kune.

²⁵ A Peka ŋuro lo Remalia, logon a duma lo kamörök kanyit, momori a lwön ko ŋutu merya mukanat ti Gilada anyen mwön ko lepeŋ, a se tatuje lepeŋ Samaria yu i pirit nago na kadi na mor se ko Aregoba, ko Areye i pirit na geleŋ. Nyena a Peka tatuje Pekakia a ruddye tumatyan nanyit.

²⁶ A pitönö ti konesi ti Pekakia ko ŋo liŋ nagon nye a kon kune, se a wuröki i Buk na Dekat ti moran ti Yisaraele.

Peka a mor

²⁷ A i kiŋa tomerya mukanat wot murek na gwoŋdi Ajaria a mor lo Yuda nu, a Peka ŋuro lo Remalia suluje gwon a kasaranit lo Yisaraele Samaria yu, a nye saŋi ko kipajin merya murek.

²⁸ A nye koŋdi ŋo nagon a naron ko MATAT i metet; a nye tine kö ’yu toronjin ti Yerobama ŋuro lo Nebat nagon nye a tiŋdi Yisaraele i toroŋdya kune.

²⁹ A i perok ti Peka mor lo Yisaraele, a Tigilat-pileser mor lo Asura poni ŋo, a te ’yi Iwon ko Ebele-bete-maka, ko Yanoak, ko Kedese, ko Kasor, ko Gilada, ko Galilaya, ko jur liŋ lo Napatali; a nye joŋgi kilu ŋutu Asura yu a ’dupi.

³⁰ a Osea ŋuro lo Ela mori ko kulye ŋutu a lwön anyen mwön ko Peka ŋuro lo Remalia, a gwutökiŋdye lepeŋ kak, a tatuje lepeŋ, a ruddye tumatyan nanyit i kiŋa tomerya murek na gwoŋdi Yotama ŋuro lo Ujiya a mor nu.

³¹ A pitönö ti konesi ti Peka, ko ŋo liŋ nagon nye a kon kune, se a wuröki i Buk na Dekat ti moran ti Yisaraele.

Yotama a mor

³² A i kiŋa tomurek na gwoŋdi Peka ŋuro lo Remalia a mor lo Yisaraele nu, a Yotama ŋuro lo Ujiya, mor lo Yuda, suluje gwon a kasaranit.

³³ A nye gwe ko kiŋajin merya murek wot mukanat na suluje nye gwon a kasaranit nu, a nye saŋi Yerusalema yu ko kiŋajin puök wot buker. A karin ti ŋote nanyit gwe a Yerusa ŋuro na Sadok.

³⁴ A nye koŋdi ŋo nagon a na ’but ko MATAT i metet, gwoso i ŋo liŋ na kon Ujiya monye lonyit köju kunu.

³⁵ Ma ’di sona piritön kwakwasesi na gwon i ko ’dulan ti merya kune a ko turö kak; ŋutu nyuŋ ’du ’duŋgö rubaŋgajin ko ’yu ’yuŋa bökur i kune piritön nagon a ko ’dulan. A nye ’duŋge kötumit i swöt lo lobot lo kadi na MATAT.

³⁶ A pitönö ti konesi ti Yotama ko ŋo liŋ nagon nye a kon kune, kine ’bayin a se nagon a wuröki i Buk na Dekat ti moran ti Yuda le?

³⁷ A i kilu perok a MATAT suluje soŋdu Resin mor lo Suria se ko Peka ŋuro lo Remalia i moro ko Yuda.

³⁸ A Yotama dotoni ko merenyejin kanyit a se nuŋge lepeŋ i pirit nuket na merenyejin kanyit i köji na Dawidi merenye lonyit; a Akaja ŋuro lonyit lo ruddye tumatyan nanyit.