2 Moran 14 - Bibilia Buk na Ŋun nagon koti luŋu a

Amajia a mor

¹ A i kiŋa tomurek na gwoŋdi Yeyoasa ŋuro lo Yeyoakaja a mor lo Yisaraele nu, a Amajia ŋuro lo Yöasa mor lo Yuda suluje gwon a kasaranit.

² A nye gwe ko kiŋajin merya murek wot mukanat na suluje nye gwon a kasaranit nu, a nye saŋi Yerusalema yu ko kiŋajin merya murek wot buŋwan. A karin ti ŋote nanyit gwe a Yeyoadin na Yerusalema.

³ A nye koŋdi ŋo nagon a na ’but ko MATAT i metet, ama ti gwon gwoso na Dawidi merenye lonyit nu; a nye koŋdi ŋo liŋ gwoso na koŋdi Yöasa monye lonyit köju nu.

⁴ Ama piritön kwakwasesi na gwon i ko ’dulan ti merya kune a ko turö kak; köti ŋutu nyuŋ ’du ’duŋgö rubaŋgajin ko ’yu ’yuŋa bökur i kune piritön nagon a ko ’dulan.

⁵ A nagon tumatyan aje gwo ’dan go kanyit i könin nu, a Amajia tatuje köliŋönök kanyit logon köju a tatuja mor monye lonyit kulu.

⁶ Ama a nye gwe a ko tatu ŋwajik ti kulu katatuak; gwoso na wuröri i buk na saresi ti Mose na saŋi MATAT nu adi, A komonye kodyo tine tatua i kulya ti ŋwajik, kode a ŋwajik ködyö tine tatua i kulya ti komonye; ŋutu liŋ geleŋ geleŋ kodyö tatuani kogwon toronjin kase.

⁷ A nye tatuje ŋutu ti Edom aliŋan puök i pirit na ’dir na ’Balaŋ, a nye te ’yi Sela ko riŋit, a gwije lepeŋ a Yoketele, a kine gwe a karin ti Sela tojo ko lo lor.

⁸ A Amajia soŋdi luyökie ko mor lo Yisaraele logon a Yeyoasa, ŋuro lo Yeyoakaja, ŋuro lo Yeu, kulya adi, Po, anyen yi ko tutumör ko ’börik.

⁹ A Yeyoasa mor lo Yisaraele sunyukiŋdye Amajia mor lo Yuda lore adi, Kalele-rokti lo Libanon a soŋdu luyökie lonyit i pija na ködini lo Libanon logon gwoso tika adi, Ŋuro liŋ ’dek yemba ŋuro inot; a kijakutat lo Libanon lwöŋoddi nyona a ryoggi lu kalelerokti.

¹⁰ Do ’diri aje te ’ya Edom, a do iŋge bu ’ya mugun. Lyöŋi lyoŋon ko kine ŋo, ama si ’dani konut i ’baŋ. Nyo nagon do ga ’yu lodök, anyen tiŋdu do ko mugun inot i ’doro se ko Yuda i pirit na geleŋ liŋ na?

¹¹ Ama a Amajia tine ’bön yiŋga. Nyena a Yeyoasa mor lo Yisaraele iti tu a lepeŋ se ko Amajia mor lo Yuda tumori tumör i möro ko ’börik Bete-semese na Yuda.

¹² A ŋutu ti Yisaraele te ’yi ŋutu ti Yuda, a ŋutu liŋ geleŋ geleŋ woki kase midijik.

¹³ A Yeyoasa mor lo Yisaraele morgi Amajia mor lo Yuda, ŋuro lo Yöasa, ŋuro lo Akajia, Bete-se-mese yu, a nye iti Yerusalema, a duyömbi gorom nagon a mariŋ na Yerusalema, suluja i kötumit na Epuraima tojo ko kötumit na gwon i goŋet, a tojolan na pirit na duyömö na gwe a lokiliŋan miajin iŋwan.

¹⁴ A nye ryakaddi dakaŋ liŋ ko ŋödo, ko toro ’bo liŋ logon a rye i kadi na MATAT ko i piritön ’delesi ti kadi na mor. A nye köti momokaddi kulye ŋutu logon a dakesi, a nye yitöni Samaria.

¹⁵ A pitönö ti konesi ti Yeyoasa nagon nye a kon kune, ko riŋit nanyit, ko mörö nanyit ko Amajia mor lo Yuda, kine ’bayin a se nagon a wuröki i Buk na Dekat ti moran ti Yisaraele le?

¹⁶ A Yeyoasa dotoni ko merenyejin kanyit, a se nuŋge lepeŋ Samaria i pirit nuket na moran ti Yisaraele; a Yerobama ŋuro lonyit lo ruddye tumatyan nanyit.

¹⁷ A Amajia ŋuro lo Yöasa mor lo Yuda, gwolore kiŋajin puök wot mukanat i mukök na twan na Yeyoasa ŋuro lo Yeyoakaja, mor lo Yisaraele.

¹⁸ A pitönö ti konesi ti Amajia, kine ’bayin a se nagon a wuröki i Buk na Dekat ti moran ti Yuda le?

¹⁹ A se momori a lwön i mwön ko lepeŋ Yerusalema yu, ama a nye wöki Lakisa. Ama a se soŋdi ŋutu i keŋoddu na lepeŋ tojo Lakisa, a tatuje lepeŋ nyu.

²⁰ A se ’dukuŋdye öpu nanyit ko kusanjin, a nuŋge lepeŋ Yerusalema, i pirit nuket na merenyejin kanyit i köji na Dawidi.

²¹ A ŋutu liŋ ti Yuda wuluŋdye Ajaria, logon ko kiŋajin puök wot buker, a tiŋdi lepeŋ a mor i ruddya na monye lonyit Amajia.

²² A Ajaria nyöggi ’duggö Elat, a nyökökiŋdye lepeŋ Yuda, i mukök na nukaki ’e mor ko merenyejin kanyit i merete nu.

Yerobama a mor

²³ A i kiŋa topuök wot mukanat na gwoŋdi Amajia ŋuro lo Yöasa a mor lo Yuda nu, a Yerobama ŋuro lo Yeyoasa mor lo Yisaraele suluje gwon a kasaranit Samaria yu, a nye saŋi ko kiŋajin merya iŋwan wot geleŋ.

²⁴ A nye koŋdi ŋo nagon a naron ko MATAT i metet; a nye tine kö ’yu toronjin liŋ ti Yerobama ŋuro lo Nebat nagon nye a tiŋdi Yisaraele i toroŋdya kune.

²⁵ A nye nyökökiŋdye Yisaraele koret nase suluja i kwake nagon luŋörikin Kamat tojo ko tör na Araba, gwoso kulyaet lo MATAT Ŋun lo Yisaraele, logon nye a kulyari ko köliŋönit lonyit nebi Yona ŋuro lo Amitai i kutuk, logon a lo Gata-keper.

²⁶ Kogwon Ŋun a met adi yöyöŋesi ti ŋutu ti Yisaraele gwe pötwör parik, a ŋutu gwe ’bayin lo pituŋdyö kode ’dupi kode lui, köti a lele ŋuto gwe ’bayin logon parakiŋdya ŋutu ti Yisaraele.

²⁷ Nagon MATAT a ko kulya adi nye de seyaddu karin ti Yisaraele kaŋo i kak ’bukuluŋ, nyena a nye lwöggi se ko könin lo Yerobama ŋuro lo Yeyoasa.

²⁸ A pitönö ti konesi ti Yerobama, ko ŋo liŋ nagon nye a kon kune, ko riŋit nanyit, ko mörö nanyit, ko nyököki-ŋdyö nanyit na Yisaraele Damaseke ko Kamat nagon köju a ti Yuda, kine ’bayin a se nagon a wuröki i Buk na Dekat ti moran ti Yisaraele le?

²⁹ A Yerobama nukakine ko merenyejin kanyit i merete, logon köju a moran ti Yisaraele kulu, a Takaria ŋuro lonyit lo ruddye tumatyan nanyit.