2 Moran 1 - Bibilia Buk na Ŋun nagon koti luŋu a

Twan na Akajia

¹ A i mukök na twan na Aba, a jur lo Moaba renyani sara ko Yisaraele.

² A Akajia iŋge ’duruun kak i kulu-pit na koŋilore nanyit na gwon Samaria nu, a nye tanani tana; a nye yokije ŋutu adi, Iti ta, piyuŋdye ta ko Bala-sebuba nun lo Ekuron kode nan ŋona ruru i lo twanti.

³ Ama a malaikatat lo MATAT kulyani ko Eliya Tisebetyo adi, ŋine ki, iti i rum ko luyökie ti mor lo Samaria, ko pije lepeŋat adi, Ŋun ’diri ’bayin Yisaraele le nagon ta tu i pija na Bala-sebuba Ŋun lo Ekuron na?

⁴ Nyenagon MATAT lo kulya sona adi, Do mor mo ti ŋien ki köti i dotoet nagon do a kija kata nu, ama do mo ’diri twatwan. A Eliya iti tu.

⁵ A luyökie kulu yitöni ko mor yu, a nye pije se adi, Nyo nagon ta a yitwe bot?

⁶ A se waddi adi, Lele ŋuto a po i rum koyi, a kulyani koyi adi, Yitöni ta bot ko mor lo sunyuŋdyo ta lo, taki ta lepeŋ adi, MATAT lo kulya so-na adi, Ŋun ’diri ’bayin Yisaraele le nagon do soŋdu ŋutu i pija na Bala-sebuba ŋun lo Ekuron na? Nyenagon do mo ti ŋien ki köti konut i dotoet nagon do a kija kata na, ama do mo ’diri twatwan.

⁷ A nye pije lepeŋat adi, Ŋilu ŋuto lo rum ko ta a takiŋdye ta kine kulya lo gweya ada?

⁸ A se waddi adi, Lepeŋ Jupu boŋgo na kupir ti kijakutat ko a torakiŋdya kamba nagon a ’böriköt kanyit i mukök. A mor kulyani adi, Ŋilu a Eliya Tisebetyo.

⁹ A mor sunyukiŋdye Eliya duma lo kamörök ko teŋ nanyit na ŋutu merya mukanat. A ŋilo duma kiyaddi ko Eliya yu logon sisi ’da i kwe na mere, a kulyani ko lepeŋ adi, Pon ŋuto lo Ŋun, mor a kulya adi ti do kiyuŋdye kak.

¹⁰ Ama a Eliya waddi lepeŋ adi, Ko nan a ŋuto lo Ŋun, ti kimaŋ ’duruu kak ki yu ko ti totumbe do se ko ŋina teŋ inot. A kimaŋ na ’duruu kak ki yu, a totumbe lepeŋ se ko teŋ nanyit na.

¹¹ A mor köti sunyukiŋdye lepeŋ lele duma lo kamörök ko teŋ nanyit na ŋutu merya mukanat. A nye kiyaddi ki, a kulyani ko lepeŋ adi, Pon ŋuto lo Ŋun, mor lo kulya sona adi ti do kiyuŋdye kak ’de ’de.

¹² Ama a Eliya waddi adi, Ko nan a ŋuto lo Ŋun, ti kimaŋ ’duruu kak ki yu ko ti totumbe do se ko ŋina teŋ inot. A kimaŋ na Ŋun ’duruu kak ki yu, a totumbe lepeŋ se ko teŋ nanyit na.

¹³ A mor koti soŋdi lele duma lo kamörök ko teŋ tomusala nanyit na ŋutu merya mukanat. A duma lo ŋina teŋ tomusala lo kiyaddi i mere ki, a iti ko Eliya yu a ’dorone kak ko kuŋwat kanyit ko lepeŋ i komor, a kwaddi lepeŋ adi, Pon ŋuto lo Ŋun, boŋo meddi ru nio a ŋo nagon ko ’bulit se ko ru na kilo köliŋönök kulök merya mukanat.

¹⁴ Mete, kimaŋ a ’duruun kak ki yu, a iŋge totum duma-lak murek ti dika kulo, se ko teŋon kase liŋ; ama soŋinana meddi ru nio a ŋo nagon ko ’bulit.

¹⁵ A malaikatat lo MATAT kulyani ko Eliya adi, Dudula-ra kak se ko lepeŋ; an do ko kujönö lepeŋ. A Eliya kirut ŋine ŋien a dudulara kak se ko lepeŋ tojo ko mor yu,

¹⁶ a kulyani ko mor adi, MATAT lo kulya sona adi, Kogwon do a soŋdu luyökie i pija na Bala-sebuba Ŋun lo Ekuron, ŋina kweja adi Ŋun ’bayin Yisaraele le logon do piyuŋdya kulyaet lonyit? Nyenagon do mo ti ŋien ki koti konut i dotoet nagon do a kija kata na, ama do mo ’diri twatwan.

¹⁷ A nye twane twan gwoso kulyaet lo MATAT logon Eliya aje jam lo. Nyena kogwon Akajia ’bak ŋuro, a Yeyorama luŋaser lonyit lo ruddye lepeŋ a mor i kiŋa tomurek na gwoŋdi Yorama ŋuro lo Yosapata mor lo Yuda nu.

¹⁸ A pitönö ti konesi ti Akajia nagon nye a kon, kine ’bayin a se nagon a wuröki i Buk na Dekat ti moran ti Yisaraele le?