2 Korinto 7 - Bibilia Buk na Ŋun nagon koti luŋu a

¹ Julin kwe lo nyanyara, kulo rukesi a milyeki yi. Nyena ti yi toke ’yi ta ’börik i lut liŋ nagon toluddya mugun se ko töili kune, anyen yi gwon a loke ’bukuluŋ i kugga na ŋun.

Paulo guron ko lyoŋön

² Tiki ta yi pirit kasu i töilyet. Yi a ko konakiŋdya lele ŋuto arabat, yi a ko köŋu lele ŋuto, a gwe a ko dumba lele ŋuto.

³ Nan ti jambu kine kulya anyen yuyuggö ta, kogwon gwoso na jambi nan a kokwe nu adi ta gwon kayaŋ i toilyet, ma ’di ko a twan kode gwon jörun yi ti koŋa ko ta.

⁴ Nan a yinikin ta parik kogwon ta gwoŋwo ’dan go, a nan bu ’ye mugun parik kogwon kulya kasu. Nan a togolo parik, a lyoŋön nio gwe a duma parik ma ’di nagon yi sasanya parik na.

⁵ Ma ’di nagon yi a ’durökin Makedonia yu nu, a yi tine ryö yukan. Yi gwon i yöyöŋö i swötön liŋ, a gwe i kiden na rerenyesi, a töilyet kaŋ gwe ko kujönö.

⁶ Ama Ŋun logon togo ’yu ŋutu logon dudurwe lo aje togo ’yu yi ko ’durökin na Tito.

⁷ Ti gwon a ’durökin na Tito ka ’de nagon a togo ’yu yi, ama kogwon lepeŋ a togolo ko ŋo nagon nye a met kasu kiden kune. Lepeŋ a tukökiŋdyö yi adi ta yöŋö meddya nan, a ta iŋge delya, a ta gwe ko pusök i kulya kwe, nyena a nan lyöŋi lyöŋön bia parik.

⁸ Kogwon ma ’di nagon nan aje todelyaju ta ko ŋina leta nio na, nan ti delya. Nan a den adi ŋina leta nio aje todelyaju ta ama ’bayin ko diŋit a najo. Ama ma ’di nagon nan ködyö a delya,

⁹ soŋinana nan lyölyöŋön, ti gwon kogwon nan a todelyaju ta, ama kogwon delyaesi kasu aje tin ta i löpu-ggö na töilyet. Kine delyaesi ŋo ko Ŋun yu, a ta gwe a ko körö kogwon kulya kaŋ.

¹⁰ Kogwon delyaesi nagon ŋo ko Ŋun kine tiŋdu ŋutu i löpuggö na töilyet anyen lwölwökö, a tine todelyaju se. Ama delyaesi ti na kak joŋdya twan.

¹¹ Meddi ta, kine delyaesi nagon a ŋo ko Ŋun kine aje topukuŋdyö nyo kasu i töilyet. Kweja adi a tiŋdu ta kure anyen ta tetenakiŋdya ’börik a lo ’but. Kune delyaesi a tiŋdu ta i ŋoma, ko i kujönö, ko i yöŋö na meddya na nan. Köti a tiŋdu ta i gwon ko pusök a duma, ko i ga ’yu riŋga na katoronyanit. I ŋo liŋ ta aje kwekiŋdya ’börik ’bak toron.

¹² Nyenagon ma ’di ködyö nan a wurö-kin ta ŋina leta, nan ti wuŋö i kulya ti nye logon koŋdya arabat lo, kode i kulya ti nye logon a konaki arabat lo, ama nan a wuŋö ŋina leta anyen pusök nasu koyi böŋö kwekiŋdya ta ko Ŋun i komor.

¹³ Nye ŋina kwe nagon soŋinana töilyet kaŋ gwe a iŋgo na. Töilyet kaŋ ’diri a iŋgo ama yi köti lyölyöŋön bia parik i meddya na Tito i lyöŋön. Ta liŋ aje tiŋdu töili lonyit i yukan.

¹⁴ Kogwon ko nan ködyö pupurjata ko lepeŋ i komor, a ta gwe a ko tiŋdu kwe nio i yu. Ŋo liŋ nagon yi a jamakin ta kune a gwak, a pupurja nikaŋ na ta ko Tito i komor köti iŋge kurwe a gwak.

¹⁵ Töili lonyit nyanyar ta parik na yeyeji lepeŋ adi ta liŋ twötwö nye nu, a iŋge wuyuŋdya lepeŋ ko kujönö ko böŋdu.

¹⁶ Nan lyölyöŋön kogwon nan deden adi ta mo gwon a lo ’but i ŋo liŋ.