2 Korinto 6 - Bibilia Buk na Ŋun nagon koti luŋu a

¹ Yi kita ko Ŋun i pirit na geleŋ, nyena yi momo ’yu ta, an ta ko wuju ta ’busan na nyaŋu na Ŋun ko kana.

² Kogwon Ŋun a kulya adi, Nan a yiŋ do i diŋit na ’but, a nan parakiŋdye do i lor lwökit. Mete ta, soŋinana a diŋit na ’but; iŋkoi, soŋinana a lor lwökit.

³ Yi ti ’bön tiŋdu lele ŋuto i kopukö, anyen ŋutu gwon ti yuyuggö kita nikaŋ.

⁴ Yi mömöŋu i ŋo liŋ i kwekiŋdya adi yi a koliŋönök lo ’but ti Ŋun; yi ŋoŋoŋaddu diŋit a najo, yi sasanya, yi ’bak ŋo nagon yi ’de ’deŋgi, yi gwon i nagusu,

⁵ yi gwugwutö, yi rereka, yi gwon i kiden na lodirön logon woŋon koyi, yi gwon i dara i kita nago, yi ti doto, yi mamagora.

⁶ I kine delyaesi liŋ yi gwon ko toilyet loke, yi deden kulya, yi ŋoŋoŋga taliŋ, yi a lo ’but ko ŋutu, Mulökötyo Loke gwon koyi, yi nonyaŋu ko to ’diri,

⁷ yi tokujo ko to ’diri, yi gwon i riŋit na Ŋun, yi morga tito möriesi i könin lutaten ko i könin kadoŋe logon a ti loti lo rigwo.

⁸ Yi bubula ko lalawe, yi yuyuko ko pupura. Ŋuto kulya adi yi a kamumulukak, ama yi a ti to ’diri;

⁹ yi gwoso ŋutu logon ti dena, ama yi dedena parik; yi gwoso ŋutu lo twatwa, ama yi gwon jörun; yi a riŋa, ama yi a ko tatua.

¹⁰ Ma ’di ködyö yi a sasanya, ama yi ŋupi lyolyoŋon, yi meta gwoso lomerika, ama yi tukwörieŋöju ŋutu jore; yi meta gwoso logon ’bak nene ŋo, ama yi gwon ko ŋo liŋ.

¹¹ Ta ŋutu ti Korinto, yi aje jamakin ta ŋo liŋ köke, yi aje pakiŋdya ta toilyet kaŋ a lugalaŋak.

¹² Ko taa teŋo i jambu, kine ’bayin a kulya kaŋ ama toilyet kasu lo teŋgu ta.

¹³ Nyena nan jambu ko ta gwoso ta a ŋwajik kwe, ŋane ta ŋa toilyet kasu koti a lugalaŋak.

Po ta kaŋo i gwiliŋit lo ’beron

¹⁴ Ko morakiŋdya ta ’börik i ŋutu logon a ko yubbö kilo. Löti lo rigwo se ko kulya narok bubulö mora ada? Parara se ko mudwe bubulö tojulin ada?

¹⁵ Kristo bubulö torukökin ko Beliala ada? Ŋona kulya ti kayuŋönit gwon jojo ko kulya ti ŋuto logon a ko yubbo lo le?

¹⁶ Kadi na Ŋun ŋona bubulö gwon a ŋo geleŋ ko nyömuejin le? Kogwon yi a kadi na Ŋun lo gwon jörun; gwoso na kulyari ŋun nu adi, Nan mo gwolor ko se, a mo wöröni ko se; a nan mo gwe a ŋun lose, a se mo gwe a ŋutu kwe.

¹⁷ Nyenagon nan Matat lo kulya adi, Po ta kaŋo kase kiden, ko gwe ta ka ’de, an ta ko ’bo ’yu ta nene ŋo nagon a lut; a nan mo wuyuŋdye ta,

¹⁸ a nan mo gwe a monye losu, a ta mo gwe a ŋwajik kwe lulyan se ko nawate, nan Matat Kabulönit lo ŋo liŋ lo kulya.