2 Korinto 5 - Bibilia Buk na Ŋun nagon koti luŋu a

¹ Kogwon yi deden adi ko mugunya kaŋ nagon a murugujin ti na kak ni kune a panyaji kaŋo, a yi gwe ko kunie kadijik nagon Ŋun lo tiŋdu yi. Kine kadijik ŋutu a ko ’duggo se, ama se a kadijik nagon yeyeŋon ki yu.

² Kak ni yi ’diri ’du ’duatu, a yi gwe ko pusök anyen ködudwölön kaŋ ködyö mukö ko kadijik na ŋo ki.

³ Kogwon ko se a muggö yi a ködudwölön kaŋ mo tine rye köke ’bak mukesi.

⁴ Kogwon na gwoŋdi ködudwölön kaŋ nyuŋ i kune murugujin na, yi ’du ’duatu ko töilyet lo pömöni. Yi ti ’bön mugunya kaŋ panyaji kaŋo, ama anyen se ködyö mumuko ko kadijik ludukö; anyen ru böŋö wi ’yö ŋo na ’bu ’burön kine.

⁵ Ŋun ko mugun nanyit lo tetenakiŋdya yi i kine kulya, a lepeŋ iŋgi tiŋdu yi Mulökötyo lonyit a waŋet lo ŋo na ŋoŋo.

⁶ Nyena yi ŋupi gwon a purwat; yi deden adi na gwoŋdi yi nyuŋ ko kune mugunya kaŋ na, a yi gwe pajo ko Matat,

⁷ kogwon yi wöwörö i kulya ti ŋo nagon yi yuyuŋ kine, ti gwon i kulya ti ŋo nagon yi memet.

⁸ Yi totopurwan. a yi ’deke piörö i kune mugunya anyen yi tu si ’da ko Matat i pirit na geleŋ.

⁹ Nyenagon koyi gwon ni kode yu, ti yi tiŋdi ta tirikwet nikaŋ i tulyöŋgu na lepeŋ.

¹⁰ Kogwon yi liŋ mo gwoŋwo ’dan i komor na si ’daet nagon Kristo ’duŋgö putet kata na, anyen yi liŋ geleŋ geleŋ böŋö ropaki ŋo na kon yi na gwoŋdi yi nyuŋ ko kune mugunya kune, kode yi a koŋdya ŋo na ’but kode yi a koŋdya ŋo narok.

Ŋun a tomoruŋdya ŋutu ko Kristo i mugun a kanyit

¹¹ Nyenagon kogwon yi deden ko kuka na Matat a nyo, a yi möŋi löpukuŋdyö ŋutu; ama Ŋun deden koyi gwon ada, nyena nan yeŋdu adi töilyet kasu köti deden koyi gwon ada.

¹² Yi ’bayin jamakiŋdya ta köti adi yi a lo ’but, ama anyen tiŋdu kwe nagon ta lyölyöpi i kulya kaŋ, anyen ta böŋö bubulo waddu ŋutu logon bu ’ya ’börik i ŋo na memeta ama ’bayin i kulya ti ŋo na gwon ko ŋuto i töili kune.

¹³ Kogwon koyi a mamala, yi mamala kogwon kulya ti Ŋun; koyi gwon ko yeyeesi na ’but, yi gwon sona kogwon kulya kasu.

¹⁴ Kogwon nyaret na Kristo riri’dikiŋdya yi. Yi a kurun adi ŋuto geleŋ aje twan kogwon kulya ti ŋutu liŋ, kweja adi ŋutu liŋ aje twatwa.

¹⁵ Lepeŋ a twakin kogwon kulya ti ŋutu liŋ, anyen ŋutu lo gwon jörun kilo böŋö gwon ti gwolor i kitakiŋdya na ’börik, ama anyen kitakiŋdya lepeŋ logon aje twan ko aje topiyu kogwon kulya kase lo.

¹⁶ Nyenagon suluja soŋinana yi ti lilija kulya ti lele ŋuto ko yeyeesi ti na kak, ma ’di köju yi a lilija kulya ti Kristo ko yeyeesi ti na kak kune, a yi tine koŋdya sono köti kwöŋ.

¹⁷ Nyenagon ko lele ŋuto gwon ko Kristo i mugun, nye aje gweya a ludukötyo; kulya ti ’beron kune aje ’duddyö, mete, ŋo liŋ gwe a ludukö.

¹⁸ Kine ŋo liŋ ŋun lo koŋdya, logon a tomorakiŋdya yi kanyit i mugun kogwon Kristo lo, a nye i iŋgi tiŋdu yi kita na tomoruŋdya na ŋutu kanyit ni.

¹⁹ Kweja adi Ŋun kita ko Kristo i mugun anyen tomoruŋdya ŋutu ti jurön kanyit ni, a tine kenakiŋdya se toronjin kase arabat, a tiŋdi yi lore logon tuköki ŋutu adi ti se moruŋdye ko Ŋun ni.

²⁰ Nyena yi a gworolo ti Kristo, gwoso nagon Ŋun ko mugun nanyit lo mo ’yu ta kayaŋi kutusen na. Yi mo ’yu ta i karin ti Kristo adi, Morani ta mora ko Ŋun.

²¹ Kristo ’bak toron, ama Ŋun a kon lepeŋ a toron kogwon kulya kaŋ, anyen yi bonö gwon ko torigwo na Ŋun kanyit i mugun.