2 Korinto 13 - Bibilia Buk na Ŋun nagon koti luŋu a

Kukuesi ko romesi ti ’duteŋ

¹ Na a dao tomusala nio i tu kasu ŋini. Kulya liŋ kodyo ririki gwogwo i tokoresi ti katökorok murek kode musala.

² Nan kukuju ŋutu logon koju aje toroŋdya ko kulye kilo nutu liŋ koti adi, ko nan a tu i ’yo ’yu na ta i nene daŋ, a nan mo tine pitokin se kwoŋ. Nan aje jamakiŋdya se sona na gwoŋdi nan kasu ŋini daŋ tomurek nu, nyena na gwoŋdi nan pajo ko ta na a nan nyoggi Tambu sona.

³ Na tiri nan kasu ŋini na, a ta mo denuŋdye ’bura adi Kristo ’diri lo Tambu koyo i kutuk. Lepeŋ ti gwon a lomunyan kasu, ama gwon ko riŋit kasu kiden.

⁴ Ma ’di kodyo lepeŋ a lomunyan i ’bikiki nanyit i kodini na goro, ama soŋinana lepeŋ gwon jorun kogwon riŋit na Ŋun. Yi a lomunyak ko lepeŋ i pirit na geleŋ, ama yi gwon Jorun i pirit na geleŋ kogwon riŋit na Ŋun i kulya kasu.

⁵ Teme ta tem ’borik, liline ta lili ’borik anyen denuŋdya kaŋo ko ta Ŋona gwolor i yupet. Ta ŋona ’diri deden adi Yesu Kristo gwon kasu i mugunya le? Ko ’bayin sona kweja adi ta ti jukin i ŋina temet.

⁶ Nan yeŋdu adi ta mo deden adi yi jujukin i ŋina temet.

⁷ Ama yi momo ’yu Ŋun anyen ta boŋo gwon ti koŋdya arabat, mo ’yu lepeŋ sona ti gwon i kwekindya adi yi jujukin i ŋina temet, ama anyen ta kodyo koŋdya ŋo nagon a na ’but, ma ’di kodyo yi meta gwoso logon ti jukin i ŋina temet.

⁸ Kogwon yi ti bulo koŋdya nene ŋo i teŋgu na kulya ti to ’diri, ama tuŋ anyen tiŋdu kulya ti to ’diri i puputuru ŋerot.

⁹ Yi lyolyoŋon koyi a lomunyak a ta gwe a iŋgo. Nyena yi koti momo ’yu Ŋun anyen ta boŋo tetenaki ’bura.

¹⁰ Kwe nagon nan wutokiŋdye ta kine kulya na gwoŋdi nan pajo ko ta nu, anyen ko nan a ’dur kasu ŋini, a nan tine tukaŋan ko ta ko kido saret nagon Matat a tikin nan na. Ŋina kido a tiki nan anyen gweyuŋdya ta ki, ti gwon i dukakiŋdya na ta kak.

¹¹ Luŋasirik, nan gwe ’bak kunie kulya jore nagon nan jajam, gwe ta ’bura. Moŋi ta moru anyen ta boŋo gwon a jukin; yiŋge ta jujuwesi kwe; torukoki ta torukökin ko ’borik; gwolore ta ko taliŋ; a Ŋun lo nyaŋu logon taliŋ gwon ko lepeŋ lo mo gwe ko ta.

¹² Rome ta ko ’borik ko ’bi ’biyet nake.

¹³ Ŋutu ti Ŋun liŋ a roman ko ta.

¹⁴ Ti ’busan na Matat Yesu Kristo, ko nyaŋu na Ŋun, se ko tojulin na Mulokotyo Loke gwe ko ta liŋ.