2 Korinto 12 - Bibilia Buk na Ŋun nagon koti luŋu a

ŋo nagon ŋun a kwekin ko Paulo i töili

¹ Nan agu ködyö bu ’ya mugun, ma ’di ködyö ’bulit ’bayin. Nyena nan puputuru ŋerot i jambu na kulya nagon Matat a kwekin nan köyö i toili anyen nan memet se kune.

² Nan a den lele ŋuto logon gwon ko Kristo i mugun logon köju i kipajin puök wot iŋwan lo tu lo a ’depaji ki tojo i ’diko tomusala. Nan ti den kode lepeŋ a jopa ko mugun nanyit liŋ kode ka ’de toili lo jopa, tuŋ ŋun lo deŋdya.

³ Nan köti a den adi ŋilo ŋuto a ’depaji ki i Melesen nakwekwelen na Ŋun. (Nan ti den kode lepeŋ a jopa ko mugun nanyit liŋ kode ka ’de töili lo jopa, tuŋ Ŋun lo deŋdya.)

⁴ A ŋilo ŋuto i iŋgi yiŋ kulya nagon ti bulö jama, kweja adi kulya nagon ŋuto a ko ’buruki i jambu na se kune.

⁵ Nan de bu ’ya mugun i kulya ti ŋuto gwoso ŋilo, ama nan ti bu ’ya mugun i kulya kwe ama ka ’de i kulya ti tomunyan nio.

⁶ Ko nan ködyö ’de ’dekan bu ’ya mugun, a nan ködyö tine gwon a lu ’böŋ, kogwon nan jambu to ’diri. Ama nan teteŋ mugun, anyen lele ŋuto böŋö gwon ti kiuŋdyö adi nan a duma lwölwöŋ ŋo nagon nye a met nan i koŋdya kode ŋo nagon nye a yiŋ nan i jambu kune.

⁷ Nyena kikwöti a suki köyö i mugun anyen teŋgu nan i ’du ’duŋga kogwon ŋo sörösi jore na met nan kune. Ŋina kikwöti a luyökie lo Satani anyen tomijö nan anyen teŋgu nan i ’du ’duŋga.

⁸ Daŋin musala nan a momo ’yu Matat anyen joŋga ŋina ŋo kaŋo köyö i mugun.

⁹ Ama a nye waddi nan adi, ’Busan nio na nyaŋu a jukin do, kogwon riŋit nio wora a duma parik i ŋuto lomunyan. Nyena nan lyölyöŋön bia parik i bu ’ya na mugun kogwon tomunyan nio, anyen riŋit na Kristo böŋö gwon köyö i mugun.

¹⁰ Nyena nan lyölyöŋön i gwon a lomunyan, ko i momorotu, ko i ŋoŋesi nago, ko i sasanyesi, ko i yöyöŋesi kogwon kulya ti Kristo. Kogwon ko nan a lomunyan a nan gwe ko riŋit.

Töili lo Paulo mimien kogwon ŋutu ti Korinto

¹¹ Nan a lu ’böŋ! Ama ta lo ri ’dikindya nan i ŋina tu ’böŋön, kogwon ta ködyö lo pupurja nan. Kogwon nan ’bayin a lo ’dit kwöŋ i kilo luyökie temejik, ma ’di nagon nan ’bayin a nene ŋo.

¹² ŋo nagon kwekiŋdya adi nan ’diri a luyökie kune, nan aje kon se kasu kiden mora ko kweyesi ko sörösi se ko kitajin nagon kona ko riŋit kune.

¹³ Nan ŋona a jaran i konakiŋdya na ta nene ŋo nagon nan a konakin kunie kanisajin le? Tuŋ nan ko mugun nio a ko tudaraju ta i luŋgu na pariesi. Böŋö pitöki ta nan i ŋina toron!

¹⁴ Soŋinana na gwe a daŋ tomusala nagon nan gwon ajo i tu kasu ŋini. Nan mo ti tudaraju ta i luŋgu na pariesi, kogwon nan ti ga ’yu ŋo kasu, ama nan ga ’yu ta ko ’börik kasu; kogwon ŋwajik ködyö ti ’delakiŋdya komonye kase tito, ama komonye ködyö lo ’delakiŋdya ŋwajik kase tito.

¹⁵ A ko gwe gwoso nan, nan mo lyölyöŋön parik i tutuŋgö na ŋo nagon nan gwon ko se kune kogwon kulya kasu, iŋkoi, nan mo tutuŋökiŋdyö riŋit nio köti. A ko nan nyanyar ta parik, a ta ŋona nyaŋi nan madaŋ le?

¹⁶ Gwon sona ’diri adi nan a ko tudaraju ta i luŋgu na pariesi, ama kulye kasu kulya adi nan a kadumanit, a mumulukuŋdye ŋo kasu ko koŋon.

¹⁷ Nan ŋona a soŋdu luyökie i dumba na ta anyen jakiŋdya nan pariesi le?

¹⁸ Nan a mo ’yu Tito parik anyen tu kasu pini, a nan soŋdi lele luŋaser lo yubbö lo ko lepeŋ i pirit na geleŋ. Tito ŋona a dumba ta ko ŋo kasu le? Yi ŋona a ko wörö ko Mulökötyo lo geleŋ lo le? Yi ŋona a ko kebbu gwoke lo geleŋ lo le?

¹⁹ Ta ŋona yeyeju i na diŋit liŋ adi yi möŋu wasuŋdya ’börik kaŋo kasu i komor? ’Bayin, yi jambu ko Ŋun i komor gwoso ŋutu ti Kristo. Julin kwe lo nyanyara, ŋo liŋ na kon yi kine yi koŋdya se anyen gweyuŋdya ta ki.

²⁰ Nan kukujönö adi kode ŋona ko nan a ŋo kasu pini, a nan mo ryeji adi ta gwon ka ’de ’bayin gwoso nagon nan ’de ’dekan na, a ta mo ryeji adi nan gwon ka ’de ’bayin gwoso nagon ta ’de ’dekan na. Nan kukujönö an nan ko ryö adi ta gwon i rerenya, ko i be ’ya, ko i woran, ko i deŋdya na ’börik ka ’de, ko i momoröju, ko i yeyeŋga na kulya, ko i bu ’ya na kusik, ko i wopesi.

²¹ Nan kukujönö adi ko nan a ŋo kasu pini köti, a Ŋun liŋ mo tiŋdi kwe nio i yu kasu i komor, a nan ködyö gwine ko ŋutu jore logon köju aje toroŋdya a gwe a ko löpuggö töilyet i ŋo na kon se kune i gwiliŋisi kase logon a lut kulo, ko i lulupujö nase, ko i koŋdya na ŋo ti yu na kwe aka.