2 Dekat 9 - Bibilia Buk na Ŋun nagon koti luŋu a

Mor na Seba a ’yo ’yu Solomona

¹ A mor na Seba ko yiŋge kuoröna Solomona, a nye poŋdi Yeru­salema i temba na lepeŋ ko piyesi nago. A nye poni ko lodir duma parik, ko kamilojin nagon ’dukuŋdyö welesi na momon ’bura, ko dakap jore parik, ko torok lo gworo go. A nye ko ’dure ko Solomona ni a takiŋdye lepeŋ kulya liŋ nagon kanyit i töili.

² A Solomona rukökiŋdye lepeŋ piyesi kanyit liŋ; a nene ŋo gwe ’bayin nagon a puja Solo­mona i tokurukiŋdyo na ŋinu ŋuto.

³ A mor na Seba ko meddi koŋon na Solomona, ko kadi nagon nye a ’duk nu,

⁴ ko kinyo lo nyei kanyit i ’baŋ lo, ko si ’da na kametak kanyit, ko köli­pönok kanyit lo momordu kulo, ko jupu nase, ko katumatak kanyit, ko jupu nase, ko rubaŋgajin kanyit lo ’yu ’yura ’buluŋ, logon nye a wukin i kadi na MATAT kulo, a nye gwo ’de a tukuyu kana.

⁵ A ŋinu ŋuto kulyani ko mor adi, Loŋe lo yiŋ nan koyo i jur i kulya kunok ko i koŋon inot lo a gwak ’diri,

⁶ ama nan köju a ko yuŋ kilu liŋio tojo ko nan a po a nan aje met ko konyen kwe; mete, ŋutu a ko tukökiŋdyo nan ma ’di swot na todumalan na koŋon inot; kogwon do a lwöŋ lore logon nan a yiŋ.

⁷ Ŋutu kulok a kalyoŋok. ko kilo koliponok kulok köti a kalyoŋok logon yeŋon gwo ’dan konut i komor i yiŋuŋdya na koŋon inot!

⁸ Ti MATAT Ŋun ilot purani pura, logon a lyoŋon ko do lo, a tiŋdi do a mor i si ’daet na tumatyan nanyit na MATAT Ŋun ilot! Kogwon Ŋun ilot nyanyar ŋutu ti Yisaraele a togwo ’yi lepeŋat go ŋupi, a nye aje tiŋdu do a mor lose anyen do jojo ’duŋgo putesi gwogwo.

⁹ A ŋina ŋuto tiŋdi mor talentajin mia geleŋ ko merya murek ti dakap, ko welesi na momon ’bura jore parik, ko torok lo gworo go; a kunie welesi na momon ’bura gwe ’bayin gwoso kinu nagon mor na Seba a tin mor Solomona kunu.

¹⁰ Koti a koliponok ti Kuram mora ko koliponok ti Solomona, logon joŋdya dakap Opir yu, kulu köti a baruŋdya kaden alamuga ko torok lo gworo go.

¹¹ A mor teteŋdi piriton gwo ’diesi ko kulu kaden alamuga a ti kadi na MATAT se ko ti kadi nanyit, nye köti a teteŋdya rababajin ko tomon a ti kayolok; a po gwoso kilo köju gwe a ko meta i jur lo Yuda kwoŋ.

¹² A mor Solomona tiŋdi mor na Seba ŋo liŋ nagon nye ’de ’deggi, nagon nye a luŋ kine, wat kunu ’dokesi nagon mor Solomona a tikin lepeŋ a lyoŋesi ti ŋo nagon nye a jakin lepeŋ kune. A kirut nye yitöni bot kanyit i jur se ko koliponok kanyit.

Solomona a kwörinit parik a iŋge kono

¹³ A dakap nagon a jaki Solomona ti kiŋa geleŋ temuŋdye a talentajin miajin buker ko merya buker wot buker,

¹⁴ koko kunie nagon jwe ko kadoyok ko i katugworok; a moran liŋ ti jur lo Arabi se ko modirön ti jur lonyit jakiŋdye Solomona dakap ko podo.

¹⁵ A mor Solomona nituŋdye ’bukwo nagalaŋak miajin murek nagon a dakap; a ’buku geleŋ joŋgi rotolan merya murek wot iŋwan ti dakap i tetena nanyit.

¹⁶ A nye nituŋdye kunie ’bukwo na ’di ’dik miajin musala nagon a dakap; a ’buku geleŋ joŋgi rotolan puök wot murek ti dakap i tetena nanyit; a mor tiŋdi se i kadi na luŋu a Rudu lo Libanon.

¹⁷ A mor köti teteŋdi si’daet duma na tumatyan ko kala ti tome, a muluje nye ko dakap nake parik.

¹⁸ A si ’daet na tumatyan nu gwe ko kiyesi buker, ko tokit na mokosi nagon liŋ a linyo ko dakap. A ŋinu si ’daet gwe ko tökisi ti könisi i swötön murek, a ŋojino murek ti komiruŋt lo gwogwo ’dan iŋge tetenaki i mara ti kinu tökisi,

¹⁹ a kunie ŋojino puök wot murek ti komiruŋt lo gwogwo ’dan a tetenaki geleŋ geleŋ i ’dutesi ti swötön murek liŋ ti kinu kiyesi buker. A nene si ’daet na tuma­tyan gwoso ŋina gwe a ko tetena asut i nene na tumatyanjin liŋ.

²⁰ A toro ’bo liŋ matesi logon a ti mor Solomona gwe a dakap, ko toro ’bo liŋ lo gwon i kadi na luŋu a Rudu lo Libanon kulo a tetena ko dakap nake; kogwon ŋutu ti yeye podo a nene ŋo i perok ti Solo­mona.

²¹ Kogwon ki ’bojin ti mor Solo­mona yeŋ woro Tarasisa mora ko koliponok ti Kuram. A ki ’bojin lo dööddu Tarasisa kilo yeŋon ’durökin nyu daŋ geleŋ i kiŋajin musala ’dukuŋdyo dakap, ko podo, ko kala ti tome, ko ’darulan, ko joman.

²² A mor Solomona iŋge lwöŋ moran liŋ ti kak i tukworien ko i koŋon.

²³ A moran liŋ ti kak ga ’yi meddya komor na Solomona anyen se yiŋuŋdya koŋon nanyit nagon ŋun aje tin kanyit i kwe na.

²⁴ A se liŋ geleŋ geleŋ joŋdi ’dokesi kase gwoso temet nase temba i kiŋajin, gwoso toro ’bo logon a podo. ko a dakap, ko boŋgwat. ko mur, ko welesi na momon ’bura, ko kusanjin, ko kaineki.

²⁵ A Solomona gwe ko köjino ti kusanjin nagon temakiŋdya i kusanjin alipan iŋwan ko arabiajin lo jijiko, ko kajoŋak ti kusanjin alipan puök wot murek, a nye soŋdi kulye kase i si ’da i köjino ti arabiajin lo jijiko, ko kulye anyen gwon ko nye mor Yerusalema yu.

²⁶ A nye saŋi moran liŋ suluja kare Perat tojo ko jur lo Pelesete, ko tojo ko lokökorit lo Ejipeto.

²⁷ A mor tiŋdi podo gwon a roki gwoso torok Yeru­salema yu, ko a tiŋdu kaden logon gwoso tika anyen gwon a roki gwoso ki ’biet ti ’dir na merya.

²⁸ A Solomona gwöruŋdye kusanjin Musiri ko i juron liŋ.

Twan na Solomona

²⁹ A pitönö ti konesi ti Solomona i suluwa tojo ko ’dutet, kine ’bayin a se nagon a wurö i dekat ti nebi Natana, ko i keesi ti Akiya Silotyo, ko i ŋo na met Ido kametanit lo kulya na popo i kulya ti Yerobama ŋuro lo Nebat le?

³⁰ A Solomona gwe a kasaranit lo Yisaraele liŋ Yerusalema yu kiŋajin merya iŋwan.

³¹ A Solomona dotoni ko merenyejin kanyit, a se nuŋge lepeŋ i köji na Dawidi monye lonyit;a Rabama ŋuro lonyit ruddye tumatyan nanyit.