2 Dekat 3 - Bibilia Buk na Ŋun nagon koti luŋu a

Solomona a ’dukokiŋdyo MATAT kadi

¹ A kirut Solomona suluje ’duggökadi na MATAT Yerusalema i mere Moria, i pirit na pukokiŋdye MATAT ko Dawidi monye lonyit i komor nu. Ŋinu a pirit gwutet na ’bolot na Oman lo Yebusi nagon Dawidi köju a wulun anyen ’dukorikin kadi na MATAT.

² A Solomona suluje ’duggo i yapa tomurek lo kiŋa toiŋwan lo tumatyan nanyit.

³ A kine gwe a temesi pipilesi ti kadi na Ŋun nagon Solomona ’du ’duk na; a tojolan nanyit gwe a lokiliŋan merya buker, a tugalaŋ nanyit gwe a lokiliŋan merya murek gwoso temesi ti ’beron.

⁴ A kadi na ŋun gwe ko kadi najo, a ŋina kadi najo gwe ko baraŋöa, a tojolan na ŋina baraŋöa gwe jojo ko tugalaŋ na kadi nagon a lokiliŋan merya murek; a tojolan nanyit ki gwe a lokili ŋan mia geleŋ ko merya murek. A nye muluje lukata nanyit ko dakap nake.

⁵ A nye muŋge goroma ti lukata na ŋinu kadi najo ko kaden berosa, a muluani mulua ko dakap naliliŋ, a gigiŋi ŋojino ti kaden ti tomur ko minyo ti toriot.

⁶ A nye tokweleŋdi nu kadi ko ŋurupö tokwelenyesi na gworo go. A dakap kune gwe a dakap na jwe Patawaim.

⁷ a nye muluje lukata na kadi liŋ ko dakap, kweja adi kaden ti lo ’dek ko ti kotumiton, ko goroma ko kotumiton kanyit. A nye gigiŋi goroma ko ŋojino ti kerubajin.

⁸ A nye teteŋdi pirit nake na rurwan na totopuŋdya; a tojolan nanyit gwe jojo ko tugalaŋ na kadi nagon a lokiliŋan merya murek, a tugalaŋ nanyit gwe a lokiliŋan merya murek. A nye muluje lepeŋ ko dakap naliliŋ nagon temuŋdya a talentajin miajin buker.

⁹ A temet na musumaran gwe a dakap nagon temuŋdya a sekelejin merya mukanat. A nye köti muluje koŋiloreki ko dakap.

¹⁰ A i pirit nake na rurwan na totopuŋdya a nye teteŋdi kerubajin murek ko kaden a muluje se ko dakap.

¹¹ A kopukon ti kilu kerubajin i pirit na geleŋ riöddi a lokiliŋan merya murek; a kopukonit na lele keruba geleŋ nagon tojolan nanyit a lokiliŋan mukanat na ’bo ’yi gorom na kadi, a kopukonit nanyit tomurek nagon tojolan nanyit a lokiliŋan mukanat na ’bo ’yi kopukonit na lele keruba lo;

¹² a kopukonit na keruba tomurek nagon tojolan nanyit a lokiliŋan mukanat na ’bo ’yi gorom na kadi, köti a nene kopukonit nagon tojolan nanyit a lokiliŋan mukanat na iŋge to ’bo ko kopukonit na keruba togeleŋ na.

¹³ A kopukon ti kilo kerubajin riöddi a lokiliŋan merya murek; a se gwo ’de gwo ’dan ko mokosi kase ’bo ’yu kak komorga kadi najo.

¹⁴ A nye teteŋdi boŋgo koret ko waro naŋem, ko na ’bule, ko nator, ko waratat naparere, a ribbe ŋojino ti kerubajin i loki na ŋina boŋgo.

Kuram kita a bodo i kadi na MATAT

¹⁵ A nye teteŋdi togwi’diesi murek i komor na kadi logon tojolan nase ki a lokiliŋan merya musala wot mukanat, a togwi ’diet geleŋ gwe ko muket nanyit nagon tojolan nanyit a lokiliŋan muka­nat.

¹⁶ A nye duduluje toŋot gwoso re ti murut, a tiŋdi se i kusik ti kilu togwi ’diesi; a nye teteŋdi ŋo gwoso ludweki ti ruman mia geleŋ a tiŋdi se i loki na kilu toŋot.

¹⁷ A nye togwi ’dikin­dye togwi’diesi kulu i komor na kadi na MATAT, lele i swot lo lutaten ko lele i swot lo kadoŋe. A nye gwije lo gwon i swot lo lutaten lo a Yakin, a gweŋ lo gwon i swot lo kadoŋe lo a Boaja.