2 Dekat 2 - Bibilia Buk na Ŋun nagon koti luŋu a

Solomona a torukökin ko mor Kuram

¹ Nyena a Solomona yöŋöni ’duggökadi a na karin ti MATAT ko kadi nanyit na mor.

² A Solomona wuluŋdye ŋutu alipan merya buryo logon a ka ’dokök, ko ŋutu alipan merya budök logon a katuturuk ti ŋurupö i jur lo merya, ko ŋutu alipan musala ko miajin buker logon meddya lepeŋat.

³ A Solomona sunyukiŋdye Kuram mor lo Turo lore adi, Do köju a parakiŋdya Dawidi monye liŋ i sunyukiŋdyo na lepeŋ kaden logon gwoso tika anyen ’dukokiŋdye mugun kadi nagon nye sisi ’dari na, nyena köti böŋö konakiŋdye nan sona.

⁴ Mete, nan ’dek ’duggo kadi a na karin ti MATAT ŋun liŋ. A nan mo ’borokiŋdye nu kadi a nanyit anyen bökur logon a welesi na mon paleleŋ ’yura kanyit i komor, ko anyen ambatajin peta nyu perok liŋ ko ŋun i komor, ko anyen rubaŋgajin lo ’yu ’yura ’buluŋ wuki lepeŋ nyu temba i ko ’bure ko i sömukö i ’doro na kolor ko i sabatajin, ko i wilun na yapala, ko i roriot logon a wulwe a ti MATAT ŋun likaŋ, gwoso na saraki’e Yisaraele ŋupi.

⁵ A kadi nagon nan ’du ’duk na mo gwe a duma, kogwon ŋun likaŋ a duma Iwolwoŋ ŋunyen liŋ,

⁶ Ama ŋa logon bubulö ’dukokiŋdyo lepeŋ kadi, a ma’di ki ko wi nanyit ti jukin lepeŋ? Nan a ŋa anyen ’dukokiŋdyo lepeŋ kadi ka’de tuŋ ko a pirit ’yuret na bökur kanyit i komor?

⁷ Nyenagon soŋinana sunyuki nan tumunit kanitonit lo dakap, ko podo, ko mölwö se ko witiot, ko a bodo kagweyanit lo waro na’bule, ko nator, ko naŋem, logon köti a lokoŋ i giŋu; anyen ŋilo ŋuto kodyo ko mora ko bodwat kakitak logon gwon koyo ni Yuda ko Yeru­salema, logon Dawidi monye liŋ aje wulun kulo,

⁸ Nyena köti sunyuki nan kaden logon gwoso tika, ko berosa, ko alamuga konut ŋini Libanon, kogwon nan a den adi koliponok kulok deden toggu kaden ti Libanon. A koliponok kwe mo mori ko kulok,

⁹ anyen tetenakiŋdya nan kaden jore, kogwon kadi nagon nan ’du ’duk na mo gwe a duma ko a sorit.

¹⁰ A nan mo tiŋdi koliponok kulok katokok ti kaden kulo, koresi alipan merya murek ti ’bolot lo rayaka, ko koresi alipan merya murek ti ’bolot saora, ko sapya alipan merya murek ti binyo se ko sapya alipan merya murek ti welet.

¹¹ A kirut Kuram mor lo Turo sunyu­kiŋdye Solomona waraga a ruket na kinu kulya adi, Kogwon MATAT nyanyar ŋutu kanyit a nye aje tiŋdu do a mor lose.

¹² A Kuram köti kulyani i ŋinu waraga adi, Ti MATAT Ŋun lo Yisaraele Kagweyanit lo ki ko kak purani pura, kogwon nye a tikiŋdya mor Dawidi ŋuro lokoŋ logon a jore ko totolok ko kuruŋdyo, logon mo ’dukokiŋdyo MATAT kadi a ’dukokiŋdye mugun nanyit na mor.

¹³ Nyenagon nan ŋilo aje sunyukin do ŋuto logon a bodo lo diniki, karin kanyit a Kuram-abi

¹⁴ ŋuro lo nene ŋuto na kotumit na Dan, monye lonyit a ŋuto lo Turo. Lepeŋ a todino kita na dakap, ko na podo, ko na mölwö, ko na witiot, ko na ŋurupö, ko na kaden, ko na waro nagon a na ’bule, ko naŋem, ko nator, ko boŋgo na waratat naparere, ko i gigiŋu na minyo ka ’de ka ’de, ko i kebbu na nene miret nagon a wuloki lepeŋ. Nye mo kita ko bodwat kulok logon köju a ti duma liŋ Dawidi logon a munyi.

¹⁵ Nyenagon gwoso na kulyari do pon duma liŋ, ti do sunyukiŋdye yi koliponok kulok ’bolot, ko ’bolot saora, ko welet, ko binyo;

¹⁶ a yi mo toggi kaden Libanon ni gwoso nagon do ’de ’deggi, a jakiŋdye do a kusik ti kaden na ’doko ko tor tojo Yaŋo, a do mo lo joŋgi se tojo Yerusalema.

¹⁷ A kirut Solomona keŋdi ŋutu liŋ lo mo monuŋdyo i jur lo Yisaraele, gwoso na keŋdi monye lonyit Dawidi köju nu; a lepeŋat iŋge rye a ŋutu alipan mia geleŋ ko merya mukanat wot musala ko miajin buker.

¹⁸ A nye wuluŋdye ŋutu alipan merya buryo anyen gwon a ka ’dokök, ko ŋutu alipan merya budök logon a katuturuk ti ŋurupö i jur lo merya, ko ŋutu alipan musala ko miajin buker logon a kamemetak anyen tokitaju lepeŋat.