1 Yoane 5 - Bibilia Buk na Ŋun nagon koti luŋu a

Yubbö nikaŋ gwon a telet nagon yi te ’yi na kak

¹ Ŋutu liŋ logon yubbö adi Yesu a Masia kilo a ŋwajik ti Ŋun. Ŋuto logon nyanyar monye ŋwajik lepeŋ nyanyar ŋwajik kanyit köti.

² i ŋina yi deden adi yi nyanyar ŋwajik ti Ŋun, kweja adi yi nyanyar Ŋun a yi ’debbi saresi kanyit.

³ Kogwon nyaŋu nikaŋ na Ŋun gwon sona adi, yi ’de ’dep saresi kanyit, a saresi kanyit tine ri ’dikiŋdya yi go.

⁴ Kogwon ŋutu liŋ logon Ŋun lo yupuŋdyö kilo a te ’ya na kak, a yubbö nikaŋ gwe a telet nagon yi te ’yi na kak na.

⁵ Ŋa logon a katelanit lo na kak? Nye ŋona ti gwon a ŋuto lo yubbö adi Yesu a Ŋuro lo Ŋun lo le?

Mulökötyo Loke a katokoronit i kulya ti Kristo

⁶ Yesu Kristo a nye logon a po ko pioŋ se ko rima; lepeŋ a ko po ko pioŋ ka ’de ama a po ko pioŋ se ko rima. Ŋilo a Mulökötyo Loke lo tokoŋu, kogwon ŋilo Mulökötyo a lo to ’diri.

⁷ Kogwon katökorok kata musala,

⁸ kweja adi Mulökötyo Loke, ko pioŋ. se ko rima; lepeŋat liŋ musala a tuggö ŋo geleŋ.

⁹ Yi ruggo kulya na tokor ŋutu kune, a kulya na tokor Ŋun kune lwöŋi lwöŋ kine. Kogwon Ŋun a tokoŋu kulya ti Ŋuro lonyit.

¹⁰ Nye logon a yubbö Ŋuro lo Ŋun lo, lepeŋ gwon ko kulya na tokoro kune kanyit i mugun. Nye logon ti yubbö Ŋun lo, lepeŋ aje kon Ŋun a ’burönit, kogwon lepeŋ a ko yubbo kulya na tokor Ŋun i kulya ti Ŋuro lonyit kune.

¹¹ Kulya na tokor Ŋun kune gwon sona adi, nye a tiŋdu yi ru na yeŋ nyin, a ŋina ru gwe ko Ŋuro lonyit i mugun.

¹² Ŋuto logon gwon ko ŋilo Ŋuro, lepeŋ gwon ko ŋina ru. Nye logon ’bak Ŋuro lo Ŋun lo, lepeŋ ’bak ŋina ru.

Ru na yeŋ nyin

¹³ Nan wurökiŋdyö ta logon a yubbö karin ti Ŋuro lo Ŋun kilo kine kulya, anyen ta böŋö deden adi ta gwon ko ru na yeŋ nyin.

¹⁴ Yi gwon ko topurwan ko Ŋun i komor, kogwon koyi a pija nene ŋo gwoso na ’deggi nye na, lepeŋ yiyiŋ yi.

¹⁵ A koyi deden adi nye yiyiŋ yi i ŋo liŋ nagon yi a piyun kune, yi deden adi yi wuwu ŋo nagon yi a piyun kanyit kune.

¹⁶ Ko ŋuto logon a meddya luŋaser i koŋdya na toron nagon ’bayin a twayet, lepeŋ ködyö kwakwaddu Ŋun kogwon kulya ti ŋilo luŋaser, a Ŋun mo tiŋdi ŋilo ŋuto ru. Kwakwasesi gwoso kine a ti ŋutu logon ti koŋdya toron nagon a twayet. Toron kata nagon a twayet, ama nan a ko kulya adi lepeŋ ködyö kwakwaddu kogwon kulya ti ŋina toron.

¹⁷ Kulya narok liŋ a toron, ama toron kata nagon ’bayin a twayet.

¹⁸ Yi deden adi ŋuto logon Ŋun lo yupuŋdyö lo ti yeŋon koŋdya toron, ama a Ŋuro lo Ŋun lo tiji lepeŋ, a Ŋilo Loron tine ’bo ’yu lepeŋ.

¹⁹ Yi deden adi yi a ti Ŋun, a kak ’bukuluŋ gwe ko Ŋilo Loron i riŋit.

²⁰ Yi deden adi Ŋuro lo Ŋun aje po. Lepeŋ aje tiŋdu yi kuruŋdyö na kulya anyen yi deden nye logon a gwak lo. Yi gwon ko lepeŋ logon a gwak lo i mugun, kogwon yi gwon ko Yesu Kristo Ŋuro lonyit i mugun. Ŋilo a Ŋun ’diri; ŋina a ru na yeŋ nyin.

²¹ Ŋwajik kwe, tini ta ti ’börik i ŋunyen logon a ’burönök kilo.