1 Yoane 4 - Bibilia Buk na Ŋun nagon koti luŋu a

Kulya ti gwulu ’yu na Mulokotyo lo ŋun se ko mulöko logon ’bayin a ti Ŋun

¹ Ta lo nyanyara kilo, an ta ko yubbo ta muloko liŋ, ama teme ta tem muloko, anyen ta deden ko se a ti Ŋun kode a lepelok, kogwon nebijin ’buronok jore aje rekin i na kak.

² I ŋina ta bubulö gwulu ’yu Mulokotyo lo ŋun; kweja adi, muloko liŋ logon tuggo adi Yesu a Masia logon a po i na kak a ŋuto kilo, se a ti Ŋun,

³ ama muloko liŋ logon ti bulo tuggo sona i kulya ti Yesu, kilo muloko ’bayin a ti Ŋun. Kilo muloko a ti Miriku lo Kristo, kogwon ta aje yiŋ adi ŋilo Miriku lo popo, iŋkoi, soŋinana lo gwe kata i kak ni.

⁴ Ŋwajik kwe, ta a ti Ŋun, ta aje te ’ya nebijin ’buronok, kogwon Ŋun logon gwon kasu i mugunya lo a duma lwölwöŋ Miriku lo Kristo logon gwon i na kak lo.

⁵ Nebijin ’burönok a ti na kak, a se jambi gwoso na jambi ŋutu ti na kak na, a ŋutu ti na kak yiŋge lepeŋat.

⁶ Yi a ti Ŋun; ŋuto logon deden Ŋun lo yiyiŋ kulya kaŋ, a nye logon ’bayin a lo Ŋun lo tine ’bon yiŋga kulya kaŋ. I ŋina a yi buloni bulo gwulu ’yu ko mulokotyo lo to ’diri se ko mulokotyo lo lyapan.

Ŋun lo gwon a nyaŋu

⁷ Ta lo nyanyara kilo, ti yi tunyare ta tunyar ko ’börik, kogwon nyaŋu po ko Ŋun yu. Nye logon nyanyaŋu lo a ŋuro lo Ŋun, a deŋdi Ŋun.

⁸ Ŋuto logon ti nyaŋu lo a ko den Ŋun, kogwon Ŋun lo gwon a nyaŋu.

⁹ I ŋina Ŋun a kweja nyaŋu nanyit kayaŋ i mugunya, a nye sunyukiŋdye yi pilili lonyit lo ŋuro i na kak, anyen yi böpö gwon jörun kogwon lepeŋ.

¹⁰ Nyaŋu gwon sona adi, ti gwon adi yi lo nyaŋu Ŋun, ama Ŋun lo nyaŋu yi, a sunyuŋdye ŋuro lonyit a tokelet lo toronjin kaŋ.

¹¹ Ta lo nyanyara kilo, ko Ŋun nyanyar yi sona, yi köti ködyö agu tutunyar ko ’börik.

¹² Lele ŋuto ’bayin kwöŋ logon aje met Ŋun; ama koyi tutunyar ko ’börik, a Ŋun gwolope kayaŋ i mugunya, a nyaŋu nanyit temakiŋdye kayaŋ i mugunya.

¹³ I Ŋina yi deden adi yi gwolor kanyit i mugun, a nye gwolope kayaŋ i mugunya, kogwon nye a tikin yi i paruŋdya na Mulökötyo lonyit.

¹⁴ A yi iŋge met a yi iŋge tokoŋu adi, Ŋun Monye a sunyuŋdyö Ŋuro lonyit anyen gwon a Kalwökönit lo ŋutu ti na kak.

¹⁵ Ko ŋuto logon tuggö adi Yesu a Ŋuro lo Ŋun, Ŋun gwolor kanyit i mugun a nye gwolore ko Ŋun i mugun.

¹⁶ Nyena yi deden ko a yuŋ nyaŋu nagon Ŋun nyaŋi yi na. Ŋun lo gwon a nyaŋu, nye logon gwolor i nyaŋu lo, lepeŋ gwolor ko Ŋun i mugun, a Ŋun gwolore kanyit i mugun.

¹⁷ Ko nyaŋu a temakiŋdya kayaŋ i töilyet, a yi böŋö gwe ko topurwan i lor ’duŋet lo putet, kogwon gwolor nikaŋ i na kak ni gwon jojo ko na Kristo.

¹⁸ Kujönö ti si ’da i pirit na geleŋ ko nyaŋu, ama nyaŋu na tetemakiŋdya na rikörö kujönö kaŋo. Ŋuto logon a kujönit lo a ko nyuŋ temakiŋdya i nyaŋu, kogwon kujönö si ’da i pirit na geleŋ ko riŋet.

¹⁹ Yi nyanyaŋu, kogwon a kokwe Ŋun a nyaŋu yi.

²⁰ Ko ŋuto logon kulya adi, Nan nyanyar Ŋun, kudyakan a maŋdi luŋaser, lepeŋ a ’burönit; kogwon nye logon ti nyar luŋaser logon nye aje met lo, ŋilo ŋuto ti bulö nyaŋu Ŋun logon nye a ko met lo.

²¹ Lo a saret logon yi a wu ko Kristo lo adi, ŋuto logon nyanyar Ŋun lo, ŋilo ŋuto agu ködyö nyanyar luŋaser köti.