1 Yoane 2 - Bibilia Buk na Ŋun nagon koti luŋu a

Kristo gwo ’dan i kulya kaŋ ko Ŋun i komor

¹ Ŋwajik kwe, nan wurökiŋdyo ta kine kulya anyen ta böŋo gwon ti toroŋdya. Ama ko ködyö lele ŋuto a toroŋdya, yi kata ko ŋuto logon gwo ’dan i kulya kaŋ ko Ŋun Monye i komor, ŋilo ŋuto a Yesu Kristo logon a lo rigwo lo.

² Lepeŋ a tokelet lo toronjin kaŋ, ’bayin toke ’ya toronjin kaŋ ka ’de ama köti toke ’ya toronjin ti ŋutu ti na kak ’bukuluŋ.

³ I ŋina yi a den adi yi deden lepeŋ, ko ködyö yi ’de ’dep saresi kanyit.

⁴ Ŋuto logon kulya adi, Nan deden lepeŋ, ama ti ’debba saresi kanyit lo, lepeŋ a ’burönit, a kulya ti to ’diri gwe ’bayin ko lepeŋ i töili.

⁵ Ama ko ŋuto logon a ’debba kulyaet lonyit, ’diri nyaŋu na Ŋun a temakiŋdya kanyit i töili. I ŋina yi deden adi yi gwon ko lepeŋ i mugun, adi,

⁶ ŋuto logon kulya adi nye gwon ko Ŋun i mugun lo a ti nye ködyö wöröni gwoso na wöröri Kristo na.

Saret ludukötyo

⁷ Ta lo nyanyara kilo, nan ’bayin wurökiŋdyö ta saret ludukötyo, ama lo a saret lo ’berori logon ta gwon ko nye i suluwa lo. Ŋilo saret lo ’beron a kulyaet logon ta aje yiŋ lo.

⁸ Kölumbö nan wurökiŋdyö ta saret ludukötyo. Ŋilo saret a gwak ko Kristo i mugun ko kasu i mugunya, kogwon mudwe ’bakani ’baka, a parara nagon a ’diri gwe i pararaju.

⁹ Ŋuto logon kulya adi nye gwon i parara ama a maŋdi luŋaser, lepeŋ nyuŋ gwon i mudwe.

¹⁰ Ŋuto logon nyanyar luŋaser lo, lepeŋ yeŋon gwon i parara, a nene ŋo gwe ’bayin nagon tiŋdu lepeŋ i ’doro.

¹¹ Ama ŋuto logon maman luŋaser lo, lepeŋ gwon i mudwe, a wöröni i mudwe, a tine den ko nye tu da, kogwon mudwe aje tomuseju konyen kanyit.

¹² Ŋwajik kwe, nan wurökiŋdyö ta kine kulya kogwon ta aje pitöki i toronjin kasu kogwon karin ti Kristo.

¹³ Ta komonye, nan wurökiŋdyö ta kine kulya kogwon ta deden nye logon kata suluja i siiluet lo. Ta teton, nan wurökiŋdyö ta kine kulya kogwon ta aje te ’ya Ŋilo Loron lo.

¹⁴ Ta ŋwajik, nan aje wurökin ta kine kulya kogwon ta deden Ŋun Monye. Ta komonye, nan aje wurökin ta kine kulya kogwon ta deden nye logon kata suluja i suluet lo. Ta teton, nan aje wurökin ta kine kulya kogwon ta a iŋgo, a kulyaet lo Ŋun gwe kasu i töilyet, a ta iŋge te ’ya Ŋilo Loron lo.

¹⁵ Ko nyaŋu ta na kak kode ŋo nagon gwon i na kak kune, a ko lele ŋuto nyanyar na kak, a nyaŋu na Ŋun Monye gwe ’bayin kanyit i toili.

¹⁶ Kogwon po lio nagon gwon i na kak kune, kweja adi, ’dekesi narok ti mugun, ko belesi narok, se ko toro ’bo ti na kak nagon ŋutu bu ’ya ’borik ko se kune, kine ŋo li po ko nun Monye yu, ama a ti na kak.

¹⁷ Na kak se ko ŋo nagon ŋutu ’de ’dekan kata kune ’ba ’baka, ama nuto logon kökon po nagon Ŋun ’de ’dekan kune, lepeŋ yeyeŋon Ŋupi.

Miriku lo Kristo

¹⁸ ŋwajik kwe, na gwe a diŋit na ’dutet! Ta aje yiŋ adi Miriku lo Kristo ŋilo popo, soŋinana merok jore ti Kristo aje po. I ŋina yi deden adi na gwe a diŋit na ’dutet.

¹⁹ Kilo ŋutu a geladdu ’borik kaŋo kayaŋ kata, ama se ’bayin a ti teŋ nikari, kogwon ko se ködyo a ti teŋ nikaŋ, a se yeŋe gwon koyi. Ama se a geladdu ’borik kaŋo anyen boŋö kweki köke adi, lele lose ’bayin a lo teŋ nikaŋ.

²⁰ Ama ta a ŋutu logon Ŋilo Loke aje we ’ya, a ta liŋ dene den kulya.

²¹ Nan aje wurökin ta, ama ’bayin adi kogwon ta ti den kulya ti to ’diri, ama kogwon ta deden kulya kanyit, koti ta deden adi ’burönö ’bayin na lupuŋdyo kaŋo i kulya ti to ’diri.

²² Ŋa logon a ’burönit? ŋona a nye lo renya adi Yesu ti gwon a Masia lo le? Lepeŋ a miriku lo Kristo, kogwon nye a renya Ŋun Monye se ko Ŋuro lonyit.

²³ Ŋuto lo renya Ŋuro lo Ŋun lo ’bak Ŋun Monye. Ŋuto lo ruggo Ŋuro lo Ŋun lo lepeŋ koti gwon ko Ŋun Monye.

²⁴ Nyena ti Ŋo nagon ta a yiŋ i suluwa kine gwolore kasu i toilyet. A ko po nagon ta a yiŋ i suluwa kine gwolor kasu i toilyet, a ta koti gwolore ko ŋuro lo Ŋun i mugun ko ko Ŋun Monye i mugun.

²⁵ Ŋo nagon lepeŋ a milyekin tiŋdu yi na a ru na yen nyin.

²⁶ Nan wurokiŋdyo ta kine kulya i kulya ti ŋutu logon ’dek togiŋa ta.

²⁷ A ko gwe gwoso ta, welet nagon nye a we ’yi ta na gwolor kasu i mugunya, a lele ŋuto gwe ’bayin logon ’de ’dekarikin anyen todiŋdyo ta. Welet nagon nye a we ’yi ta na nye na todiŋdyo ta kulya liŋ. Ŋina wela nasu a gwak ’bayin a ’buröno. Nyena gwoso nagon nye aje todiŋdyo ta nu, gwolore ta kanyit i mugun.

²⁸ Nyena ŋwajik kwe, gwolope ta ko Kristo i mugun, anyen ko lepeŋ mo a pukun a yi boŋo gwe a purwat, a gwe ’bak yu na kwe i po nanyit.

²⁹ Ko ta deden adi lepeŋ a lo rigwo, ta agu kodyo kukurun adi, ŋutu liŋ lo koŋdya ’bura kilo a ŋwajik ti Ŋun.