1 Samuele 6 - Bibilia Buk na Ŋun nagon koti luŋu a

Ŋutu ti Pelesete a nyokoro saŋduk bot

¹ A saŋduk na MATAT iŋge gwon i jur lo Pelesete ko yapala buryo.

² A ŋutu ti Pelesete luŋgi koanejin ko ’bunuk, a pije adi, Yi koŋdya nyo ko saŋduk na MATAT? Tuköki ta yi koyi son lepeŋ kanyit i pirit ko kunen ’dokesi?

³ A lepeŋat kulyani adi, Ko ta soŋdu saŋduk na ŋun lo Yisaraele, an ta ko son ta kana, ama kegga nyökö-di ta lepeŋ ko ’doket nagon a ropet na toron. A kirut ta de tokelani tokela, a ta de kuruŋdye ko nyo nagon nye a ko joŋga könin lonyit kaŋo kasu.

⁴ A ŋutu ti Pelesete pije adi, ’Doket nagon a ropet na toron na a nyo nagon yi ködyö nyököddi lepeŋ? A se waddi adi, Dakap mukanat nagon a tetena gwoso köruru, ko dakap mukanat nagon a tetena gwoso mijok, gwoso na kenari kimak ti Pelesete; kogwon ŋina tomiet na geleŋ gwon kasu loki liŋ ko i kimak kasu köti.

⁵ Nyena ta agu ködyö teteŋdya nyömuejin kasu ti köruru, ko nyömuejin kasu ti mijok logon köŋu jur, a ta bu ’ye ŋun lo Yisaraele, kode ŋona lepeŋ mo ’dumaddu könin lonyit kaŋo kasu loki ko i ŋunyen kasu ko i jur losu.

⁶ Ko nyo nagon ta a togo ’yu töilyet kasu? Köju ŋutu ti Ejipeto se ko Paro a togo ’yu töilyet kase, ama ŋun a koŋdya ŋo sörösi kase kiden, a kirut a se iŋge kölörö ŋutu ti Yisaraele i tu.

⁷ Nyenagon ’dumuŋdye ta ko teteŋdi ta par jiket ludukötyo ko kisuk murek nagon a kuöweki nagon a ko nyuŋ toraki gwuluŋi, a ta torakiŋdye gwuluŋi logon jikörikin par lo ko kisuk i muru-to, ama joŋe ta kolojik kine tojo mede pajo ko lepeŋat.

⁸ Ko ’dumuŋdye ta saŋduk na MATAT ko tiŋdi ta i loki na par. Ko tiŋdi ta nyömuejin ti dakap kine, nagon ta nyököddi lepeŋ gwoso ’doket ropet na toronjin. Tiŋdi ta se i nene saŋduk na ’dit nagon diŋö ko lepeŋ. A kirut sonyoddi ta lepeŋ kaŋo, ko ti lepeŋ iti kanyit i kiko.

⁹ Ko meddi ta lepeŋ go; ko nye kebbu kiko lo tu i koresi kase tojo ko Bete-semese, a ŋina de kwekiŋdye adi ŋilo a MATAT logon aje konakiŋdya yi ŋina tomiet duma; ama ko ’bayin, a yi de kuruŋdye adi, a leŋe könin lonyit lo gwuddyö yi, tuŋ ŋina a pokin kayaŋ a komor naron.

¹⁰ A ŋutu kulo koŋdi sona, a ’dumuŋdye kisuk murek nagon a kudweki, a torakiŋdye gwuluŋi jiket lo par kase i murutö, a kinikiŋdye kolojik kune kadi.

¹¹ A se tiŋdi saŋduk na MATAT i par loki, ko saŋduk na ’dit nagon ko dakap na tetena gwoso mijok ko nyömuejin ti köruru kase na.

¹² A kisuk kune iti gwogwo i swöt lo Bete-semese, kebbu kiko duma ko wowoŋoro i tu nase; lepeŋat a ko girara i swöt lo lutaten kode i swöt lo kadoŋe. A kimak ti Pelesete kepoddi se tojo ko koret na Bete-semese.

¹³ a ŋutu ti Bete-semese gwe i ŋepa na ’bolot kase i pirit na ’dir; a se ko ’bi ’yi kusik kase ki a meddi saŋduk na, a se lyöŋi lyöŋön i meddya na lepeŋ.

¹⁴ A par na jijikö na ’dure i melesen na Yosua lo Bete-semese, a gwo ’de nyu. A ŋurupit duma gwe kata nyu, a se ki ’ye kaden ti par a se ’duŋge kisuk kune a ’yuŋe se ’buluŋ a rubaŋga lo MATAT.

¹⁵ Kogwon Lewijin aje ’doko-ddu saŋduk na MATAT kaŋo, ko nu saŋduk na ’dit nagon diŋö ko lepeŋ nagon gwon ko nyömuejin ti dakap nu, a se aje tiŋdu se i loki na ŋurupit duma. A ŋutu ti Bete-semese ’duŋge rubaŋga-jin a wukiŋdye MATAT rubaŋgajin lo ’yu ’yura ’buluŋ i ŋilu lor.

¹⁶ a nagon kimak mukanat ti Pelesete aje met ŋinu ŋo nu, a se yitöni Ekron i ŋilu lor.

¹⁷ Nyena kune a dakap nagon a tetena gwoso köruru, nagon ŋutu ti Pelesete a nyokokin MATAT gwoso ’doket ropet na toron; nene a na Asedoda, ko nene a na Gaja, ko nene a na Asekelon, ko nene a na Gata, ko nene a na Ekron;

¹⁸ koti dakap nagon a tetena gwoso mijok, gwoso i kenet na köjinö liŋ ti ŋutu ti Pelesete nagon a ti kimak mukanat. Kunie ti kine köjinö gwon ko mariŋan ama kulye a turön logon ’bak mariŋan. A ŋilo ŋurupit duma logon se a tiŋdu saŋduk na MATAT nyona lo nyuŋ yeyeŋon a kweyet i melesen na Yosua lo Bete-semese tojo ko lo lor.

¹⁹ A nye iŋge tatu kulye ŋutu ti Bete-semese, kogwon lepeŋat a ku ’di ’yö saŋduk na MATAT; lepeŋ a tatuja ŋutu merya buryo kase, a ŋutu poki i delya kogwon MATAT aje tatuja ŋutu tatuet duma.

²⁰ A kirut ŋutu ti Bete-semese kulyani adi, ŋa logon bubulö gwo ’dan ko MATAT i komor nye ŋun loke? Nye bubulö sonyo kaŋo kayaŋ tojo ko kulon ŋutu?

²¹ A se sonyoddi liŋio i ŋutu ti Kiryat-yarim adi, ŋutu ti Pelesete aje nyökuŋdyö saŋduk na MATAT. Po ta i joŋga na lepeŋ kasu ŋini.