1 Samuele 31 - Bibilia Buk na Ŋun nagon koti luŋu a

Tatua na Saula se ko ŋwajik kanyit

¹ A ko gwe sona, a ŋutu ti A Pelesete möröni ko jur lo Yisa­raele; a ŋutu ti Yisaraele wöki wökön ko ŋutu ti Pelesete i komor, a ’do ’done a twatwa i mere Giliboa.

² A ŋutu ti Pelesete tirikuni i rikoddu na Saula ko ŋwajik kanyit; a ŋutu ti Pelesete tatuje ŋwajik ti Saula logon a ko Yonatana, ko Abinadaba, ko Malekisuwa.

³ A mörö gwe pape ko Saula, a kaŋorok ku­lo keggi lepeŋ; a nye iŋge böŋöji parik.

⁴ A Saula kulyani ko ka ’dokonit lonyit lo tito möriesi lo adi, ’Ŋutuŋdye baŋdu ilot, ko soji nan, an kilo ŋutu logon a ko tawero kilo ko po i söju na nan, an ko biryeri nan. Ama a ka ’dokonit lonyit lo tito lo tine ’bon, kogwon lepeŋ kukujönö parik. Nyenagon a Saula ’dumuŋdye baŋdu lonyit lo, a ’dorone kanyit i baŋdu.

⁵ A nagon ka ’dokonit lonyit lo tito lo ko meddi adi Saula aje twan, a nye koti ’dorone kanyit i baŋdu, a twane twan ko nye i pirit na geleŋ.

⁶ Nyena a twan na Saula gwe sona se ko ŋwajik kanyit musala kulo, ko ka ’dokonit lonyit lo tito moriesi lo, se ko ŋutu kanyit liŋ i pirit na geleŋ i lor geleŋ.

⁷ A ŋutu ti Yisaraele logon gwon i nu pele na pirit na ’dir, ko se logon gwon i nu pele na Yardene kulo ko meddi adi ŋutu kase aje wokon, ko Saula ko ŋwajik kanyit aje tatua nu, a se kö ’yi köjino kase a wöki wökön; a ŋutu ti Pelesete ruddye piriton kase.

⁸ A ko gwe sona, i ko ’bure nagon ŋutu ti Pelesete poŋdi i roggu na tito ti ŋutu lo tatua kulo kaŋo nu, a lepeŋat ryeji Saula ko ŋwajik kanyit musala kulo aje twatwa i mere Giliboa.

⁹ A se ’duŋoddi kwe nanyit kaŋo, a rokoddi tito kanyit moriesi, a sonyoddi luyökie i jur lo Pelesete liŋ, i torekiŋdya na liŋio lo ’but i kadijik ti nyomuejin kase ko i ŋutu kase.

¹⁰ A se tiŋdi tito kanyit moriesi kulo i kadi na ŋun nase nagon a Asatarot; a se ’bikikiŋdye mugun nanyit i gorom nagon a mariŋ na Betesan.

¹¹ Ama a ŋutu ti Yabesa-gilada ko yiŋge ŋo nagon ŋutu ti Pelesete aje konakin Saula na,

¹² a ŋutu liŋ logon a walan ŋine ŋien, a woroni woro tukwaje liŋ, a ’dumaddi öpu na Saula ko opuo ti ŋwajik kanyit kulo i gorom nagon a mariŋ na Betesan; a se ’dure Yabesa a ’yuŋe se nyu.

¹³ A se joŋgi kuyu kase a nuŋge se i mukök na kite lo gwon Yabesa yu, a miŋdye miŋdya perok buryo.