1 Samuele 29 - Bibilia Buk na Ŋun nagon koti luŋu a

Ŋutu ti Pelesete ti yinikin Dawidi

¹ A ŋutu ti Pelesete momori teŋon kase liŋ ti kamörök Apek yu; a ŋutu ti Yisaraele ’beggi mera nase i loro lo gwon Yejerele yu lu.

² A nagon kimak ti Pelesete gwon i tu ŋerot a ’dokiŋ ti miajin ko ti aliŋan nu, a Dawidi ko ŋutu kanyit kulo kepoddi se ko Akisa i pirit na geleŋ,

³ a kanyö-mök ti kamörök ti Pelesete pije adi, Kilo ŋutu ti Ebere koŋdya nyo ŋini? A Akisa waddi kanyömök ti kamörök ti Pelesete kulo adi, Lo ’bayin a Dawidi le, köliŋönit lo Saula mor lo Yisaraele, logon aje si ’da ko nan perok jore lo? Nan a ko ryeŋdu nene ŋo naron ko lepeŋ suluja i wökun nanyit tojo ko lo lor.

⁴ Ama a kanyömök ti kamörök ti Pelesete wore woran ko lepeŋ; a se kulyani ko lepeŋ adi, Sonyoro ŋilo ŋuto bot, anyen nye yitö i pirit nagon do a wulökin nye nu; nye ti bulö moraddu koyi i gor, kode ŋona i gor yu a nye de ti löpuŋge a miriku likaŋ. Kogwon ŋilo ŋuto bubulö mora ko duma lonyit ada? Ti gwon a tatua nikaŋ ŋona de na tomor a lepeŋ ko duma lonyit le?

⁵ Ŋilo ’bayin a Dawidi le, logon lepeŋat a yulukin köli i gwoja nase nu adi, Saula a tatuja kanyit a aliŋan aliŋan, A Dawidi iŋge tatuja kanyit a aliŋan puök puök?

⁶ A kirut Akisa lupundye Dawi kulyani ko lepeŋ adi, ’Diri gwak gwoso na gwoŋdi MATAT na, do a gwon gwogwo, a nan iŋge yeyeju adi tu inot kaŋo i gor ko yitwe inot ko nan i pirit na geleŋ gwon a na ’but; kogwon nan a ko ryö nene toron konut suluja i lor lo pöri do köyö ni lu tojo ko lo lor. Ama kimak ti ’bön do.

⁷ Nyena yitöni bot, ko iti ’bura, an do ko tiŋdu kimak ti Pelesete i woran ko do.

⁸ A Dawidi pije Akisa adi, Nan a koŋdya nyo? ŋo a nyo nagon do a ryö köyö nan köliŋo-nit ilot suluja i diŋit na kitari nan konut tojo ko lo lor, nagon adi nan ti bulö tu i mörö ko merok kulök pon mor duma liŋ?

⁹ A Akisa waddi Dawidi adi, Nan agu a den adi do ’bak kulya i metet nio gwoso malaikatat lo ŋun, ama kanyömök ti kamörök ti Pelesete aje kulya adi do ti moraddu ko se i gor.

¹⁰ Nyena ŋine ta ’beron kobubut ko köliŋönök ti duma ilot logon a poŋdya ko do kulo; a ko ta aje ŋien ko ’bure kobubut, a ti ta nyoŋgi wörö ’de ’de i waran na kak.

¹¹ A Dawidi ŋine ŋien ko ’bure kobubut ko ŋutu kanyit kulo, a yitöni i jur lo Pelesete. Ama a ŋutu ti Pelesete iti tojo Yejerele.