1 Samuele 28 - Bibilia Buk na Ŋun nagon koti luŋu a

¹ A ko gwe sona i kilu perok, a ŋutu ti Pelesete momoruŋdye teŋon kase i gor, anyen ko mörö ko ŋutu ti Yisaraele. A Akisa kulyani ko Dawidi adi, Dene den adi do ko ŋutu kulök de moraddu ko nan ko teŋon i mörö.

² A Dawidi waddi Akisa adi, A na ’but, do de deden ko nan köliŋönit ilot de kokoŋdya nyo. A Akisa kulyani ko Dawidi adi, A na ’but, nan titin do i gwon a katiyunit liŋ ŋupi.

Saula se ko ŋuto na do ’ya ko kwen ti mulökö Ene-dor yu

³ A Samuele aje twan, a ŋutu liŋ ti Yisaraele iŋge gwien lepeŋ ko a nugga lepeŋ Rama yu i köji nanyit gwak. A Saula iŋge riggö ŋutu kaŋo i jur logon do ’ya ko kwen ti mulökö se ko kawanak.

⁴ A ŋutu ti Pelesete momori momora, a poŋdi po a ’beggi mera nase Sunem; a Saula momori ŋutu liŋ ti Yisaraele, a se ’beggi mera nase Giliboa.

⁵ A Saula ko meddi teŋon ti kamörök ti Pelesete, a nye kujönöni kujönö, a töili lonyit boŋdi böŋdu parik.

⁶ A Saula ko momo ’yi MATAT, a MATAT tine ruggö nye ma ’di i rudweesi, kode ko ’duŋet na Urim, kode ko nebijin i kutusen.

⁷ A Saula kulyani ko köliŋönök kanyit kulo adi, Galaki ta nan ŋuto nagon do ’ya ko kwen ti mulökö, anyen nan böŋö ko tu i pija na lepeŋ. A köliŋönök kanyit kulo takiŋdye lepeŋ adi, Mete, nene ŋuto kata Ene-dor nagon do ’ya ko kwen ti mulökö.

⁸ A Saula löpuŋge mugun, a jupu-kiŋdye kuniŋ boŋgwat, a iti se ko kulye ŋutu murek i pirit na geleŋ, a se ’dure ko ŋinu ŋuto yu kwaje. A nye kulyani adi, Böŋö dolaki nan ko paret na mian kulök, ko luŋuki nan ŋuto logon nan a ’diŋdya karin kanyit lo.

⁹ A nu ŋuto waddi adi, Do a den ŋo nagon Saula a kon: lepeŋ aje riggö ŋutu kaŋo i jur logon do ’ya ko kwen ti mulökö se ko kawanak. Nyena ko nyo do a loka-kiŋdya nan loket i tiŋdu na nan i tatua?

¹⁰ Ama a Saula milyeji ko lepeŋ i karin ti MATAT adi, ’Diri gwak gwoso na gwoŋdi MATAT na, do mo ti ŋöki asut i kine kulya.

¹¹ A nu ŋuto pije adi, Do ’dek nan topikiŋdya do ŋa i pirit na mulökö? A nye waddi adi, Topikiŋdye nan Samuele.

¹² A ŋuto na ko meddi Samuele, a luluje lulujö. A ŋuto na kulyani ko Saula adi, Nyo nagon do a mumulugga nan? Do a Saula.

¹³ A mor kulyani adi, Ko kujönö; ama do a meddya nyo? A ŋina ŋuto waddi Saula adi, Nan a meddya gwoso lele ŋun lo ŋiun kaŋo i kak.

¹⁴ A nye pije nu ŋuto adi, Lepeŋ meta ada? A nye ruŋge adi, Lepeŋ meta gwoso lele modoŋ lo ŋiun ki; mugun nanyit a mukö ko boŋgo najo. A Saula aje timun adi ŋilo a Samuele, a nye dulakiŋdye komor nanyit kak, a twoji twöju.

¹⁵ A Samuele kulyani ko Saula adi, Nyo nagon do kaka ’yu nan i topiuŋdya na nan ki i pirit na mulokö? A Saula nyobbi adi, Nan gwon ko delya a duma; kogwon ŋutu ti Pelesete ’dek mörö ko nan, a köti ŋun aje kö ’yu nan a tine wat nan asut, ma ’di ko nebijin i kutusen kode i rudweesi; nyenagon a nan luŋgi do anyen do böŋö lo tokurukiŋdyö nan ko nan ködyö koŋdya nyo.

¹⁶ A Samuele kulyani adi, Ko MATAT aje kölökiŋdyö do ko aje wora a miriku ilot, a ko nyo nagon do pije nan?

¹⁷ MATAT aje konakin do gwoso na kulyari lepeŋ köyö i kutuk na; kogwon MATAT aje pisuŋdya tumatyan kaŋo konut i könin, a tiŋdi nye ko marate ilot logon a Dawidi.

¹⁸ Nyenagon MATAT aje konakiŋdya do kine kulya i lo lor, kogwon do a ko yiŋga gworo lo MATAT, a tine koŋdya woran nanyit na pape i mörö ko ŋutu ti Amalek.

¹⁹ MATAT köti de papakin ŋutu ti Yisaraele mora ko do i könisi ti ŋutu ti Pelesete; a ko ’bure a do se ko ŋwajik kulök de gwe ko nan i pirit na geleŋ; a MATAT köti mo pakiŋdye teŋon ti kamörök ti Yisaraele ko ŋutu ti Pelesete i könisi.

²⁰ A kirut ’de ’de kijek a Saula ’dorone kak ko mugun nanyit liŋ. a gwe ko kujönö a duma kogwon kulyaesi ti Samuele; a nye gwe a lomunyan kogwon nye a ko nyesu nene ŋo i ŋilu tuparan ko i ŋilu tukwaje liŋ.

²¹ A ŋuto na poŋdi ko Saula ni, a nagon nye aje meddya adi lepeŋ gwe ko kujönö a duma nu, a nye kulyani ko lepeŋ adi, Meddi, nan köliŋönit inot gwon i yiŋga na do; nan aje pakiŋdya mugun i yiŋga na ŋo nagon do aje jamakin nan kune.

²² Nyenagon ti do ruddye yiŋga gworo lo köliŋönit inot anyen nan bubulö jakiŋdya do kinyotot a na ’dit, anyen do nyönyö, kirut a do de gwe ko riŋit nagon do titiri i kiko ilot.

²³ A nye renyani renya adi, Nan ti nyesu asut. Ama a köliŋönök kanyit mora ko na ŋuto ri ’deŋ lepeŋ; a nye yiŋge gworolo kase. A kirut nye ŋiu ki i ŋutut, a si ’dakine i dotoet loki.

²⁴ A nu ŋuto gwe ko tagwok napir kanyit kadi, a nye nyoŋgi ’duŋgö lepeŋ, a ’dumuŋdye ’bolot a nuddi nuddu, a deruŋdye ambata nagon ’bak kape i kine ’bolot,

²⁵ a nye tiŋdi ko Saula i komor ko köliŋönök kanyit, a se nyesi nyesu. A kirut se ŋine ŋien a iti tu i ŋilu tukwaje.