1 Samuele 27 - Bibilia Buk na Ŋun nagon koti luŋu a

Dawidi si ’da i pirit na geleŋ ko ŋutu ti Pelesete

¹ A Dawidi yeyeji kanyit i töili adi, Lor lele Saula mo ko tatatu nan; nene ŋo na ’but ’bayin köyö lwölwöŋ wökön nio i jur lo Pelesete; a Saula mo gwe ’bak yenet i ga ’yu na nan i lukata na jur lo Yisaraele, a nan mo lwököddi mugun kaŋo kanyit i könin.

² A Dawidi ŋine ŋien, a lwöŋöddi lwöpöddu, se ko ŋutu kanyit miajin buker lo gwon ko lepeŋ kulo, a iti ko Akisa ŋuro lo Maok yu, moi lo Gata.

³ A Dawidi si ’dani ko Akisa Gata yu, se ko ŋutu kanyit kulo, ŋutu liŋ ko kötumitön kase. A Dawidi ko wate kanyit murek kune, ko Akinoma na Yejerele, ko Abigaila na Karmela nagon köju a karu ’be na Nabala na köti si ’dani nyu.

⁴ A kine kulya iŋge taki Saula adi Dawidi aje wökön Gata, a nye tine ga ’yu lepeŋ köti asut.

⁵ Nyena a Dawidi kulyani ko Akisa adi, Ko do ködyö wowon konyen ko nan, ti nene pirit tikine nan i lele tur lo kaŋo, anyen nan böŋö si ’da nyu; ko nyo köliŋönit ilot ködyö si ’da ko do i köji na mor?

⁶ a kirut Akisa tiŋdi lepeŋ Sikelaga i ŋilu lor; nyenagon a Sikelaga gwe a na moran ti Yuda tojo ko lo lor.

⁷ A perok logon Dawidi a si ’dari i jur lo Pelesete kulo iŋge kena a kiŋa geleŋ ko yapala iŋwan.

⁸ Nyena a Dawidi se ko ŋutu kanyit kulo yeŋe wörö i mörö ko ŋutu ti Gesur ko ti Giriji se ko ŋutu ti Amalek, kogwon kulu ŋutu ’beron si ’da i ŋilu jur tojo ko Sur tojo ko jur lo Ejipeto.

⁹ Temba i diŋitan liŋ a Dawidi ŋupi gwe i mörö ko ŋutu ti ŋilu jur, a tine pituŋdyö ŋuto lalet kode ŋuto nanakwan i gwon jörun, ama a joŋgi yidin, ko dwönin, ko kaineki, ko kamilojin, ko boŋgwat, a yitöni ko Akisa yu.

¹⁰ A nagon Akisa pije adi, Do a tu da i mörö i lo lor? A Dawidi ŋupi nyobbi adi, Nan a tu i mörö i swöt lo loki na Yuda, kode luŋa i mörö i swöt lo loki na ŋutu ti Yerakmela, kode luŋa i mörö i swöt lo loki na ŋutu ti Keni.

¹¹ A Dawidi tine pituŋdyö lele ŋuto kode nene ŋuto i gwon jörun an joŋdya lore Gata, adi, Dawidi a koŋdya sona, a ŋilo gwe a gwiliŋit lonyit i nu diŋit liŋ na si ’dari nye i jur lo Pelesete nu.

¹² A Akisa yinikiŋdye Dawidi, yeyeju adi, Nye aje tiŋdu mugun i mana asut ko ŋutu kanyit Yisaraele; nyenagon a nye mo gwe a köliŋönit liŋ ŋupi ŋupi.