1 Samuele 26 - Bibilia Buk na Ŋun nagon koti luŋu a

Dawidi a pitokin Saula Jipi yu

¹ A ŋutu ti Jipi poŋdi Gibea ko Saula ni, a kulyani adi, Dawidi lu ’de ’ya mugun i mere Kakila logon gwon i swöt lo ’yure lo Yesimon.

² Nyena a Saula ŋine ŋien a dudulara kak i yöbu na Jipi, se ko ŋutu aliŋan musala ti Yisaraele logon a wulwe, i ga ’yu na Dawidi i yöbu na Jipi.

³ A Saula ’beggi mera nanyit i mere Kakila, logon nyona ko kiko lo tu i swöt lo ’yure lo Yesimon. Ama a Dawidi si ’dani i yöbu; a nye ko kuruŋdye adi Saula ’dek kipuŋdyö nye tojo ko mu ’diŋ,

⁴ a Dawidi soŋdi kawi-rak i denuŋdya kode Saula ’diri aje po.

⁵ A Dawidi ŋine ŋien a poŋdi i pirit nagon Saula a ’beggi mera na; a Dawidi meddi pirit nagon Saula dodotori kase Abiner ŋuro lo Ner, logon a duma lo kamörök kanyit. Saula a piriki i kiden na mera, a kurumi na kamörök iŋge lopakin lepeŋ kiden.

⁶ A kirut Dawidi pije Akimelek ŋuto lo Kiti, ko Abisai luŋaser Yöaba, ŋuro lo Seruya, adi, ŋa logon ruruk moraddu ko nan i mera na Saula? A Abisai waddi adi, Nan de lo moraddu ko do.

⁷ A Dawidi ko Abisai iti i kurumi na kamörök i diŋit na tukwaje; a Saula gwe i doto nyu i mera lukata, ko gor nanyit na a rimiki kak nyona ko kwe nanyit; a Abiner ko kamörök iŋge peron kak lopakiŋdya lepeŋ kiden.

⁸ A Abisai kulyani ko Dawidi adi, ŋun aje wukiŋdya miriku ilot konut i könin i lo lor; böŋö ti nan rimiki lepeŋ kak adi mit, a nan tine nyöggu rembu lepeŋ asut.

⁹ Ama a Dawidi kulyani ko Abisai adi, An do ko tukaŋu lepeŋ; kogwon ŋa logon bubulö ’bulukiŋdyo könin ko ŋuto logon MATAT a welakin a mor lo a gwe ’bak toron?

¹⁰ A Dawidi kulyani adi, ’Diri gwak gwoso na gwoŋdi MATAT na, MATAT mo lo riŋga lepeŋ, kode nye mo ko twan i lor lonyit, kode nye tu i mörö a tatuani tatua.

¹¹ Ti MATAT teŋgi nan an nan ’bulukiŋdyö könin liŋ ko ŋuto logon MATAT a welakin a mor lo; ama böŋö joŋgi gor nagon a rimiki kak nyona ko kwe nanyit ŋina, ko kere lo pioŋ, ko ti yi iti tu.

¹² Nyena a Dawidi ’dumaddi gor ko kere lo pioŋ lo gwon nyona ko kwe na Saula kulo; a se iti tu. A lele ŋuto gwe ’bayin logon a met kine ŋo kode a den, a lele gwe ’bayin logon a purwe; kogwon se liŋ aje monyota ko doto; kogwon doto duma parik nagon MATAT lo sunyuŋdyö aje mok lepeŋat.

¹³ A kirut Dawidi laŋaddi i lele swöt, a gwo ’de pajo i kwe na mere, a kwake duma gwe kase kiden;

¹⁴ a Dawidi laŋe kurumi na kamörök ko Abiner ŋuro lo Ner adi, Abiner! Ko nyo do ’bayin i ruggö? A kirut Abiner ruŋge adi, Do ŋilo a ŋa logon laŋa mor lo?

¹⁵ A Dawidi pije Abiner adi, Do ’bayin a wa le? ŋa logon gwoso do i Yisaraele? Nyo nagon do a ko tiju duma ilot logon a mor? Kogwon lele ŋuto a ’dur ŋini i tukaŋu na duma ilot logon a mor.

¹⁶ Ŋina ŋo na kon do ŋina ti gwon a na ’but. ’Diri gwak gwoso na gwoŋdi MATAT na, do agu kodyö tatatua, kogwon do a ko tiju duma ilot logon MATAT a welakin a mor lo. Soŋinana meddi, niya gor na mor, ko kere lonyit lo pioŋ lo gwon nyona ko kwe nanyit lo?

¹⁷ A Saula iŋge timun gworo lo Dawidi, a pije adi, Dawidi ŋuro liŋ, ŋilo a do lo jambu le? A Dawidi ruŋge adi, Ee, lo a nan lo jambu pon mor duma liŋ.

¹⁸ A nye pije adi, Nyo nagon do duma liŋ gwon i kekebbu na nan? Nan ŋona a koŋdya nyo? Toron a nyo nagon kata köyö i könisi?

¹⁹ Nyenagon böŋö pon mor duma liŋ, yiŋge kulyaesi kwe nan köliŋönit ilot. Ko kodyö MATAT lo toŋ ŋu do ki i ŋisa ko nan, a ti nye wuji rubaŋga; ama ko a ŋutu lo toŋu do, a ti se lömöni lömö ko MATAT i komor, kogwon lepeŋat aje riköddu nan kaŋo i lo lor, anyen nan gwon ti parundya i lomoriot ti MATAT, kulya adi, Iŋgo, ti kitakiŋdye kulye ŋunyen.

²⁰ Nyenagon an rima kwe ’buköŋ kak pajo ko MATAT i komor; kogwon mor lo Yisaraele a poŋdya i ga ’yu na nan gwoso katogoranit lo kiliŋ giryekan i merya.

²¹ A kirut Saula waddi adi, Dawidi ŋuro liŋ, nan a koŋdya arabat; yitwene bot, kogwon nan mo ti konakiŋdya do arabat koti, kogwon i lo lor do a met ru nio a ŋo nagon ko ’bulit konut; mete, nan a koŋdya a lu ’böŋ, nan aje giran parik.

²² A Dawidi ruŋge adi, Pon mor, mana gor na! Ti lele titinti lapuŋdye ni i dokuŋdya na lepeŋ.

²³ MATAT ŋupi roropakiŋdya ŋutu liŋ kogwon kitaesi kase na rigwo ko to ’diri nase; kogwon MATAT a wukiŋdya do köyö i könin i lo lor, a nan tine ’bon ’bulukiŋdyo könin liŋ i tatuja na do logon MATAT a welakin a mor lo.

²⁴ Meddi, gwoso nagon ru inot a duma köyö i metet i lo lor na, nyena ti ru nio böŋö gwe a duma ko MATAT i metet, ko ti nye böŋö lwökuŋdye nan kaŋo i ŋisesi liŋ.

²⁵ a kirut Saula waddi Dawidi adi, Pon Dawidi ŋuro liŋ, ti do ’boriani ’boria. Do mo kökon ŋo jore a mo te ’yi te ’ya i se. Nyena a Dawidi morgi kiko lonyit, a Saula yitöni kanyit i pirit.