1 Samuele 25 - Bibilia Buk na Ŋun nagon koti luŋu a

Dawidi ko Abigaila

¹ A Samuele twane twan i nu diŋit; a ŋutu liŋ ti Yisaraele momoruŋdye i pirit na geleŋ a se gwine lepeŋ, a se nuŋge lepeŋ kanyit i ’baŋ Rama yu. A Dawidi ŋine ŋien a iti i yöbu na Paran.

² A lele ŋuto gwe kata Maon, logon ko toro ’bo kanyit Karmela yu, ŋilo ŋuto a kwörinit parik; lepeŋ gwon ko köbilu aliŋan musala ko melon aliŋ geleŋ. A lepeŋ gwe i ’ba ’bariŋdu nakupir ti köbilu kanyit Karmela yu.

³ A karin ti ŋilu ŋuto gwe a Nabala, a karin ti narakwan nanyit gwe a Abigaila. A ŋinu ŋuto gwe a nakoŋ ko a nakwe-kwelen, ama a ŋilu ŋuto gwe a kaŋa ko gwiliŋit lonyit a loron; lepeŋ a ŋuto lo Kaleba.

⁴ a Dawidi yiŋge i yöbu yu adi Nabala lu ’bariŋdu yidin.

⁵ a Dawidi sonyoddi teton puök ko Nabala yu; a Dawidi kulyani ko teton kulo adi, Iti ta Karmela ko Nabala yu, ko taki ta lepeŋ adi nan a roman ko nye.

⁶ A ta de rome ko lepeŋ adi, Ti taliŋ gwe ko do, ko ti taliŋ gwe ko mede inot köti, ko ti taliŋ gwe ko ŋo liŋ nagon a kunök kine.

⁷ Nan a yiŋ adi do ko ka ’barinuk ti yidin konut ŋini. Ama kayukuk kulök ti yidin köju yuggu koyi i pirit na geleŋ, ama yi a ko konakiŋdya se arabat, lepeŋat a ko tolikiŋdyö nene ŋo i nu diŋit liŋ na gwoŋdi se Karmela nu.

⁸ Ti do böŋo pije teton kulok kilo, se de tatakin do sona. Nyenagon won konyen ko kilo teton kwe; kogwon yi a ’durökin i lor lo rorwe. Böŋö ti do tiŋdi kilo köliŋönök kulök se ko nan ŋuro ilot Dawidi ŋo nagon kata konut i könin kine.

⁹ A ŋutu teton ti Dawidi kulo ko ’dure, a se nyönyökökiŋdye Nabala kine kulya liŋ i karin ti Dawidi; a se möŋdi möŋdu.

¹⁰ A Nabala nyobbi köliŋönök ti Dawidi kulo adi, Dawidi a ŋa? ŋa logon a ŋuro lo Yisai? Köliŋönök jore kata i na diŋit logon wöwöki kaŋo ko komonye kase.

¹¹ Ada lolor nagon nan ’dumuŋdya kinyo liŋ, ko pioŋ kwe, ko lokore nio nagon nan a ’duŋökin kakitak kwe ka ’barinuk ti yidin, anyen nan tikin i ŋutu logon nan ti den ko po ya?

¹² A teton ti Dawidi kulo morgi kiko lose, a yitöni bot, a nyönyökökiŋdye lepeŋ kine kulya liŋ.

¹³ A Dawidi kulyani ko ŋutu kanyit kulo adi, Ti ŋutu liŋ torakiŋdye baŋdujin kase i mukökö! A ŋutu liŋ torakiŋdye torakiŋdya; a Dawidi köti torakiŋdye baŋdu lonyit kanyit i mukök; a ŋutu gwoso miajin iŋwan kepoddi Dawidi, a ŋutu miajin murek möŋdi i tiju na toro ’bo.

¹⁴ Ama a lele ŋuto titinti nyönyökökiŋdye Abigaila narakwan na Nabala adi, Mete, Dawidi a sunyuŋdyö ŋutu i yöbu yu i roman ko monye likaŋ; a lepeŋ kölum gwe a kaŋa ko se.

¹⁵ Ama kilo ŋutu köju a lo ’but parik koyi, a se gwe a ko konakin yi nene ŋo naron, a yi gwe a ko tolikiŋdyö nene ŋo na si ’dari yi i yöbu nu, temba i wörö nikaŋ ko se.

¹⁶ I diŋitan liŋ na gwoŋdi yi kase yu i yuggu na yidin nu, lepeŋat köju lo gwon a mariŋ nikaŋ gayet i tukwaje ko i tuparan.

¹⁷ Nyenagon soŋinana ti do dene den kine kulya, ko ti do yeyeji yeyeju ko do de koŋdya nyo; kogwon kulu ŋutu de kökonakin monye likaŋ nene ŋo naron ko mede nanyit liŋ, ama lepeŋ a lele ŋuto logon; lele ŋuto ti jukin jambu ko nye.

¹⁸ A kirut Abigaila nyoŋgi ’de ’de, a ’dumuŋdye ambatajin miajin murek, ko jurakan gobero murek logon a tojore ’i ko binyo, ko yidin mukanat logon aje dera ajo, ko lojiesi mukanat ti ’bolot lo kelo, ko kusik mia geleŋ ti ludweki ti binyo logon a teteyok, ko ki ’biet lo nunutu gwoso ambatajin miajin murek, a sopakiŋdye se ko kaineki loki.

¹⁹ A nye kulyani ko ŋutu kanyit teton kulo adi, Iti ta köyö ŋerot; nan de tutu kasu i mukök. Ama lepeŋ a ko takin Nabala lalet lonyit kine kulya.

²⁰ A na tiri nye ko kaine nanyit nu, anyen ködyö lulurara kak i mukök na mere, mete, a Dawidi ko ŋutu kanyit kulo luluru kak kanyit ni; a nye rume ko se.

²¹ A Dawidi aje kulya adi, Nan ’diri aje tiju toro ’bo liŋ ti ŋilo ŋuto ko kana i yöbu yu, a nene ŋo gwe ’bayin nagon a likin i toro ’bo kanyit liŋ; a nye kölumbö nyökökiŋdye nan toron i kulya na ’but.

²² Ti ŋun konakiŋdye nan sona ko lwölwöŋ kine köti, ko nan ködyö a kölökiŋdyö tojo ko ko ’bure ma ’di ŋuto lalet geleŋ i ŋutu ti Nabala liŋ.

²³ A nagon Abigaila ko meddi Dawidi, a lepeŋ rume rum, a labu kak i kaine loki, a ’dorone kak ko Dawidi i komor rupu.

²⁴ Iŋkoi, nye a ’doro kanyit i mokosi kulya adi, Ti toron gwe a nio pon duma liŋ, böŋö ti gwe a nio gwak. Ti nan köliŋönit inot böŋö jamakiŋdye do, ko ti do yiŋge kulyaesi kwe nan köliŋönit inot.

²⁵ Ti do duma liŋ gwe ti yeyeju kulya ti lu ŋuto logon Nabala; kogwon nye gwon gwoso karin kanyit. Karin kanyit ’beron nyönyökö adi Lu ’böŋ, a tu ’böŋön gwe ko lepeŋ. Ama nan nagon a köliŋönit inot na, nan a ko met ŋutu teton ti duma liŋ logon do a son kulo.

²⁶ Nyenagon pon duma liŋ, ’diri gwak gwoso na gwoŋdi MATAT na, ko gwoso na gwoŋdi do na, ti merok kulök ko kilo logon ga ’yu konakiŋdya do duma liŋ arabat kilo, ti se gwe gwoso Nabala, kogwon MATAT aje göja do i ’buköddu na rima, ko i ropakiŋdya na toron ko könin ilot.

²⁷ Nyena ti na ’doket nagon nan a jakin do na pon duma liŋ, ti böŋö tikine kilo teton logon kebbu do duma liŋ kilo.

²⁸ Böŋö pitökiŋdye lyaŋet nio nan köliŋönit inot; kogwon MATAT ’diri mo teteŋdya do duma liŋ a kötumit nagon a gwak, kogwon do duma liŋ gwon i mörö na goro ti MATAT; a ŋo naron mo tine rye konut ko do nyuŋ gwon jörun.

²⁹ A ko ŋuto kepöddu do anyen ga ’yu tatuja do, a ti ru inot, pon duma liŋ, tiyuni tiyu go i pirit na geleŋ ko ŋo liŋ na gwon jörun ko MATAT ŋun ilot i könin kune; a nye mo wisaddiru na merok kulök kaŋo gwoso se gwon i lukata na lowiset.

³⁰ A ko MATAT mo a konakiŋdya do pon duma liŋ, gwoso i ŋo liŋ na ’but nagon nye a jam i kulya kunök, ko a tiŋdu do i gwon a mor lo Yisaraele,

³¹ a do duma liŋ mo gwe ’bak delya kode tömiesi ti töili denet, adi do aje ’buköddu rima ko kana kode do a ropakiŋdya toron ko mugun inot, pon duma liŋ. A ko MATAT a konakiŋdya do ’bura, pon duma liŋ, a ti do yeyene yeye nan köliŋönit inot.

³² A kirut Dawidi kulyani ko Abigaila adi, Ti MATAT ŋun lo Yisaraele purani ŋura logon a sunyuŋdyö do i rum ko nan i lo lor lo!

³³ Ti do ’boriani kogwon koŋon inot, ko ti do ’boriani kogwon do a teŋgu nan i lo lor i ’bukuŋdyö na rima ko i ropakiŋdya na mugun ko könin liŋ!

³⁴ Kogwon ’diri gwak gwoso na gwoŋdi MATAT ŋun lo Yisaraele, logon a teŋgu nan i konakiŋdya na do arabat, ko ködyö do a ko nyoŋga ’de ’de i rum ko nan, ’diri ’diri Nabala ko ’bure ködyö ti kölöki ma ’di ŋuto lalet geleŋ.

³⁵ A kirut Dawidi wuji wuju kanyit i könin ŋo nagon Abigaila a jakin lepeŋ kune; a nye kulyani ko nu ŋuto adi, Iti ’bura konut mede ko taliŋ; meddi, nan aje yiŋ gworo ilot, a nan iŋge ruk do ko molesi kulök.

³⁶ A Abigaila yitöni ko Nabala yu; mete, kudyakan nye gwon ko rorwe kanyit midi, gwoso rorwe lo mor. A Nabala lyöŋi lyöŋön kogwon nye a meran parik; nyena a Abigaila tine nyönyökökin lepeŋ nene ŋo asut tojo ko waran na kak.

³⁷ A i ko ’bure nagon yawa aje yukörö kaŋo ko Nabala i kwe nu, a narakwan nanyit nyönyökökiŋdye nye kine ŋo, a töili lonyit ’doŋgi ’doŋga, a nye metani gwoso ŋurupit.

³⁸ a i mukök na perok gwoso puök, a MATAT riŋge Nabala; a nye twane twan.

³⁹ A Dawidi ko yiŋge adi Nabala aje twan, a nye kulyani adi, Ti MATAT purani ŋura logon a ropakiŋdya moresi nagon Nabala mori nan kune, a iŋge tiŋikiŋdyö nan köliŋönit lonyit i koŋdya na toron. MATAT aje nyökökiŋdyö konesi narok ti Nabala kanyit i kwe. A Dawidi sonyoddi ŋutu i yoyoja na Abigaila, ko i joŋdya na lepeŋ a narakwan nanyit.

⁴⁰ a nagon köliŋönök ti Dawidi aje ’durökin ko Abigaila Kar-mela yu nu, a se nyönyökökiŋdye lepeŋ adi, Dawidi lo sunyuŋdyö yi konut ni, i nyömöddu na do kanyit yu a narakwan nanyit.

⁴¹ a nye ŋine ŋien, a ’dorone kak rupu i twöju, kulya adi, Meddi, nan a ’dupiet kalalaanit na mokosi ti ’dupi ti duma liŋ.

⁴² a Abigaila nyoŋgi ’de ’de, a ŋine ŋien, a kije i kaine loki, ko kö ’disi kanyit mukanat nagon kepöddu lepeŋ kune; a nye kepoddi luyökie ti Dawidi kulo, a nye gwe a narakwan nanyit.

⁴³ A Dawidi köti joŋgi Akinoma na Yejerele; a se murek liŋ gwe a wate kanyit.

⁴⁴ Kudyakan Saula aje tiŋdu Palati ŋuro lo Laisa, ŋuto lo Galim ŋuro nanyit Mikala, nagon a nakwan na Dawidi na.