1 Samuele 24 - Bibilia Buk na Ŋun nagon koti luŋu a

Dawidi a pitökin Saula En-gedi yu

¹ A gwe sona nagon Saula aje yitwe i kepöddu na ŋutu ti Pelesete nu, a lepeŋ iŋge taki adi, Mete, Dawidi lu yu i yöbu na En-gedi.

² A Saula kirut ’dumuŋdye ŋutu aliŋan musala lo wulwe i kiden na ŋutu liŋ ti Yisaraele, a iti i ga ’yu na Dawidi ko ŋutu kanyit kulo i swöt lo ’yure lo merya ti yidin ti mu ’diŋ.

³ A nye ’duröki i gorwat ti yidin nyona ko kiko, nene kuggi gwon nyu; a Saula girara kaŋo tu i lukata nanyit. Kudyakan Dawidi ko ŋutu kulo gwon i si ’da i gulume lo ŋinu kuggi.

⁴ A ŋutu kanyit kulo takiŋdye Dawidi adi, Malo lor logon MATAT a kulyari ko do adi, Meddi, nan mo wuwukin miriku ilot konut i könin, a do mo konakiŋdye lepeŋ gwoso nagon do a met a na ’but konut na. A kirut Dawidi ŋine ŋien a lwön a ’duŋuŋdye kume lo boŋgo na Saula.

⁵ A gwe sona i mukök na kine kulya, a töili lo Dawidi lwö ’yi lwö ’yu, kogwon nye aje ’duŋun-dyö kume lo boŋgo na Saula.

⁶ A nye kulyani ko ŋutu kanyit kulo adi, Agu ti MATAT teŋgi nan i konakiŋdya na duma liŋ logon MATAT a welakin a mor lo nene ŋo gwoso ŋina, an nan ’bo ’yu lepeŋ, kogwon ŋilo a ŋuto logon MATAT a welakin a mor.

⁷ Nyenagon a Dawidi iŋge teŋgu ŋutu kanyit kulo sona ko kilo kulyaesi, a tine rukökin se i ŋikin ko Saula loki. A Saula ŋine ki a lupöni kaŋo i kuggi, a iti tu.

⁸ A i mukök na kine kulya a Dawidi köti lo ŋine, a lupöni kaŋo i kuggi, a woŋoro ko Saula i mukök adi, Pon duma liŋ mor! A Saula ko boŋgi bot, a Dawidi dulakiŋdye komor nanyit kak, a twöji lepeŋ.

⁹ A Dawidi pije Saula adi, Nyo nagon do yiŋga kulyaesi ti ŋutu lo kulya adi, Mete, Dawidi lo ga ’yu koŋdya do arabat?

¹⁰ Meddi, do aje met i lo lor MATAT aje wukiŋdya do köyö i könin i kuggi lukata yu i lo tuparan; a kulye aje takiŋdya nan adi ti nan tatuje do, ama konyen kwe wowon do. Ama a nan kulyani adi, Nan ti bulö ’bulukiŋdyö könin liŋ ko duma liŋ ki; kogwon MATAT a welakin lepeŋ a mor.

¹¹ Meddi pon baba, do a met kume lo boŋgo inot mana köyö i könin. Kogwon ŋina ’diri a gwak adi nan a ’dupuŋdyö kume lo boŋgo inot kaŋo, a nan gwe a ko tatuja do, böŋö dene den ko mete met adi toron kode mwönyit ’bayin köyö i könisi. Nan a ko konakiŋdya do arabat ma ’di nagon do a togoŋa nan anyen ködyö tatuja nan.

¹² Ti MATAT gwe a kaliliyanit i kiden nikaŋ ko do; ti MATAT lo ropakiŋdye nan do; ama könin liŋ ti ’bo ’yu do.

¹³ Köju ’beron ŋutu a jambu lilim lose adi, Toron lupuŋdyö i ŋuto loron, ama könin liŋ ti ’bo ’yu do.

¹⁴ Do mor lo Yisaraele galuŋdya ŋa? Do a kipuŋdyö ŋa? Do a kipuŋdyö ’dioŋ kana, kode lugwake le?

¹⁵ Nyenagon ti MATAT gwe a kaliliyanit likaŋ, anyen ’duŋöki-ŋdyö kine kulya i kiden nikaŋ ko do. Ti nye meddi ko ti tokurukiŋdye kulya kwe, i ’buruŋdya na nan kaŋo konut i könin.

¹⁶ A ko gwe sona nagon Dawidi aje tutuŋgö jamakiŋdya Saula kilo kulyaesi nu, a Saula kulyani adi, Dawidi ŋuro liŋ, ŋilo a do lo jambu le? A Saula poki i gwien.

¹⁷ A nye kulyani ko Dawidi adi, Do a lo ’but lwölwöŋ nan; kogwon do aje ropakiŋdya nan ko ’busan a nan kölumbö aje ropakiŋdya do ko toron.

¹⁸ I lo lor do aje tokurukiŋdyö nan adi do aje konakin nan ’bura, kogwon do a ko tatuja nan i diŋit nagon MATAT aje wukiŋdya nan konut i könisi nu.

¹⁹ Ko ködyö lele ŋuto a ryeju miriku lonyit, nye ŋona bubulö kölöddu lepeŋ a loke le? ’Nyenagon ti MATAT ropakiŋdye do ’busan kogwon ŋo nagon do a konakin nan i lo lor na.

²⁰ Nyena soŋinana nan a den adi do ’diri mo gwon a mor, köti adi tumatyan na Yisaraele mo gwigwi ’dikin konut i könin.

²¹ Nyenagon nyeki nan milye i karin ti MATAT adi do mo ti ’duŋörö nyakwariat kwe kaŋo lo pukun köyö i mukök, a do mo tine seyara karin kwe kaŋo i kötumit na baba.

²² A Dawidi nyekiŋdye Saula milye. A Saula iti kanyit mede; ama a Dawidi ko ŋutu kanyit kulo iti i pirit ’danaet nago.