1 Samuele 22 - Bibilia Buk na Ŋun nagon koti luŋu a

¹ A Dawidi ŋine ŋien yu a lwököddi mugun i kuggi na Adulam; a nagon luŋasirik kanyit ko karu liŋ ti monye lonyit ko yiŋge sona nu, a se iti ko lepeŋ yu.

² A ŋutu geleŋ geleŋ logon gwon ko sasanyesi kase, ko se liŋ logon pipikö ko möriöt, se ko kulye liŋ logon a ko lyöŋön ko gwiliŋit lose kulo momoraddi ko lepeŋ yu, gwoso ŋutu miajin iŋwan. A nye gwe a duma lose.

³ A Dawidi ŋiörö tojo Misepa na Moaba; a nye kulyani ko mor lo Moaba adi, Nan böŋö mo ’yu do ko do bubulö rukökiŋdyö baba ko mama i si ’da konut ni, tojo ko nan a den ko ŋun de konakiŋdya nan nyo.

⁴ A nye kölökiŋdye se ko mor lo Moaba yu, a se si ’dani ko lepeŋ yu i nu diŋit liŋ nagon Dawidi gwon i pirit ’danaet nago nu.

⁵ A nebi Gada kulyani ko Dawidi adi, Ko nyuŋ si ’da i pirit ’danaet, ŋine ŋien ko iti i jur lo Yuda. A Dawidi ŋine ŋien a iti i yöbu na Keret.

Saula a tatuja koanejin ti Noba

⁶ A Saula iŋge yiŋ adi Dawidi se ko ŋutu logon gwon ko lepeŋ kulo aje rye. A Saula gwe i si ’da Gibea yu i kite mukök i ko ’du na mere, a nye gwe ko gor kanyit i könin, a köliŋönök kanyit gwo ’de ko lepeŋ nyona.

⁷ A Saula kulyani ko köliŋönök kanyit lo gwo ’dan kanyit nyona kulo adi, Ta ŋutu ti Benyamina, yiŋge ta nan; ta yeyeju adi ŋuro lo Yisai bubulö kokorakiŋdya ta liŋ meleseno geleŋ geleŋ mora ko luköbiöt ti kaden ti binyo le? Nye bubulö tiŋdu ta liŋ a temejik ti aliŋan, ko a temejik ti miajin le?

⁸ Kogwon a ko sona, ŋina ŋona a kwe nagon ta liŋ a momora a lwön i mwön ko nan? A lele ŋuto gwe ’bayin logon a tukökiŋdyö nan diŋit nagon ŋuro liŋ a teteŋdya tomoret ko ŋuro lo Yisai, a lele lose gwe ’bayin logon a won konyen ko nan kode tukökiŋdyö nan adi ŋuro liŋ a toŋu köliŋönit liŋ i domba na nan, gwoso i lo lor na.

⁹ A kirut Doega ŋuto lo Edom logon gwo ’dan ko köliŋönök ti Saula nyona lo waddi adi, Nan a meddya ŋuro lo Yisai a ’durökin Noba Akimelek ŋuro lo Akituba yu,

¹⁰ a nye mo ’yi MATAT kogwon kulya kanyit, a tiŋdi lepeŋ kinyojin ko a tiŋdi lepeŋ baŋdu lo Goloyota Pelesetetyo lo.

¹¹ A kirut mor sonyoddi ŋuto i luŋgu na koane Akimelek ŋuro lo Akituba, ko karu liŋ ti monye lonyit, logon a koanejin ti Noba kulo; a se liŋ poŋdi ko mor ni.

¹² A Saula kulyani adi, Do ŋuro lo Akituba, yiŋge nan. A nye waddi adi, Nan malo, pon duma liŋ.

¹³ A Saula pije lepeŋ adi, Nyo nagon do se ko ŋuro lo Yisai a momora a lwön i mwön ko nan, nagon do a tiŋdu lepeŋ ambata ko baŋdu, a do iŋge mo ’yu ŋun kogwon kulya kanyit, anyen lepeŋ ŋien i mörö ko nan, i domba gwoso na lo lor na?

¹⁴ A Akimelek waddi pija mor adi, Lele ŋuto a ŋa logon yiyiniki i kita gwoso Dawidi i kiden na köliŋönök kulök liŋ? Kogwon nye a komonit lo mor ko a duma lo katiyuk kulök, lepeŋ bubula konut i ’baŋ.

¹⁵ Na a daŋ togeleŋ le nagon nan a mo ’yu ŋun i kulya kanyit? ’Bayin asut! Ti mor gwe ti kena-kiŋdya nan köliŋönit lonyit nene ŋo naron kode i ŋutu liŋ ti mede na baba; kogwon köliŋönit ilot a ko den nene ŋo asut i kine kulya liŋ na jore kode na ku ’dik.

¹⁶ A mor kulyani adi, Akimelek, do de ’diri tatatua, mora ko ŋutu liŋ ti mede na munyi.

¹⁷ A mor kulyani ko katiyuk kanyit logon gwo ’dan ko lepeŋ nyona kulo adi, Iŋgo, tatune ta kilo koanejin ti MATAT; kogwon könisi kase gwon ko Dawidi köti; se aje den wökön nanyit, a tine tukökiŋdyö nan. Ama a köliŋönök ti mor tine ’bön ’bulukiŋdyö könisi kase i tatuja na koanejin ti MATAT.

¹⁸ A mor kulyani ko Doega adi, Iŋgo, tatune kilo koanejin. A Doega ŋuto lo Edom lo miju ŋun a tatuje koanejin kulo i ŋilu lor gwoso ŋutu merya budök wot mukanat logon a jupu epoda nagon a boŋgo naparere.

¹⁹ Kweja adi lepeŋ a tatuja ko baŋdu koanejin ti köji nagon a Noba, mora ko ŋutu lyan ko nawate, ko ŋwajik ko lupudiet lo nönöggu, ko dwönin, ko kaineki, ko yidin.

²⁰ Ama a lele lo ŋwajik ti Akimelek, ŋuro lo Akituba, karin kanyit a Abyatar iŋge lwöggu mugun, a wöki ko Dawidi yu.

²¹ A Abyatar nyönyökökiŋdye Dawidi adi, Saula aje tatuja koanejin ti MATAT.

²² A Dawidi kulyani ko Abyatar adi, Nan a den i ŋilu lor logon Doega ŋuto lo Edom gwoŋdi nyu lu, adi lepeŋ ’diri mo tutukökiŋdyö Saula. Ŋutu liŋ ti mede na munyi aje tatua i kulya kwe.

²³ Nyena si ’dani köyö ni, an do ko kujönö; kogwon nye logon ga ’yu tatuja nan lo ga ’yu tatuja do köti; do de sisi ’da ’bura köyö ni.