1 Samuele 21 - Bibilia Buk na Ŋun nagon koti luŋu a

Dawidi a wökön kaŋo ko Saula i komor

¹ A kirut Dawidi ’dure Noba ko A koane Akimelek yu; a Akimelek poŋdi i rum ko Dawidi böböpuŋdyö, a pije lepeŋ adi, Nyo nagon do poŋdya geleŋ ’bak lele ŋuto?

² A Dawidi waddi koane Akimelek adi, Mor aje yökijönan ko kune kulya, lepeŋ a kunyaŋu nan adi, ti lele ŋuto gwe ti den kune kulya na sunyuŋdye nye nan kata kune, kweja adi ŋo nagon nye a yökije nan kune. Nan aje tetenakin teton kulu nene pirit anyen möŋdu nan kata.

³ Kinyotot a nyo logon kata konut? Böŋö tiki nan ambatajin mukanat, kode luŋa nene ŋo nagon kata ni.

⁴ A koane lo waddi Dawidi adi, Nan gwon ko ambatajin na rurwan ka ’de, nan ’bak kunie; ta bubulö nyesu se ko ködyö kilu teton a teŋgu ’börik ko ŋutu wate.

⁵ A Dawidi waddi koane lo adi, ’Diri yi a teŋgu ’börik ko ŋutu wate, gwoso i diŋitan liŋ na tiri nan kaŋo kunu. Mugunya ti teton gwon a nake ma ’di koyi a jölö kana, nyena i lo lor mugunya kase a nake bia parik kogwon yi tu i nene kita duma. ’Bayin sona le?

⁶ Nyena a koane lo tiŋdi lepeŋ ambatajin na rurwan kune; kogwon ambata ’bayin nyu ama ka ’de ambatajin na peta ko ŋun i komor, nagon a wusa ko MATAT i komor a löpuköni ko kunie nagon nyuŋ pape i lor logon joŋari kaŋo lu.

⁷ A lele ŋuto lo köliŋönök ti Saula gwe nyu i ŋilu lor, logon a saraki i möŋdu ko MATAT i komor; karin kanyit a Doega ŋuto lo Edom, duma lo katiyuk ti toro ’bo ti Saula.

⁸ A Dawidi pije Akimelek adi, Gor kode baŋdu ŋona ’bayin konut ni le? Kogwon nan a ko joŋdya ma ’di baŋdu kode luŋa tito kwe möriesi, kogwon kita na mor ’de ’dekarikin i ruruma.

⁹ A koane kulyani adi, Ka ’de baŋdu

¹⁰ Goloyota Pelesetetyo logon do lo tatuja i loro lo Ela lo, meddi, lepeŋ lo ni i ki ’diŋ na epoda a mu ’duta ko boŋgo. Ko do ’de ’deggi joŋga nye, a do joŋgi joŋga, kogwon lele ’bayin ni ama lepeŋ geleŋ. A Dawidi kulyani adi, Lele ’bayin gwoso lepeŋ, kölum tiŋdi nan nye.

¹¹ A Dawidi ŋine ŋien a iti kaŋo ko Saula i komor i ŋilu lor, a iti ko Akisa mor lo Gata yu. A köliŋönök ti Akisa pije lepeŋ adi, ŋilo a leŋe Dawidi le, mor lo lu jur? Lepeŋat ŋona a ko yulukin nye köli i gwoja nase nu le adi, Saula a tatuja kanyit a aliŋan aliŋan, A Dawidi iŋge tatuja kanyit a aliŋan puök puök?

¹² A Dawidi ’delakiŋdye kilo kulyaesi kanyit i töili, a kujönöni Akisa mor lo Gata parik parik.

¹³ Nyena a nye löpu-ŋge gwiliŋit lonyit kase i komor, a koŋdi mugun a mamala kase i könisi, a wuwuŋe kunie kweyesi i kötumitön ti pirit lupet, a kölökiŋdye kamulak i lelerun kanyit i kupir ti nyekem.

¹⁴ A kirut Akisa pije köliŋönök kanyit adi, Meddi ta, ta a met ŋilo ŋuto a mamala, ko nyo nagon ta a joŋdya lepeŋ köyö ni?

¹⁵ Nan ’bak ŋuto lo mamala ni le, anyen ta joŋdi ŋilo ŋuto lo mamala i birye köyö i komor ni na? ŋilo ŋuto jujukin po köyö kadi le?