1 Samuele 20 - Bibilia Buk na Ŋun nagon koti luŋu a

Töjulin nase Dawidi ko Yonatana

¹ A Dawidi wöki kaŋo Nayot na Rama a ’duröki ko Yonatana i komor, a pije adi, Nan a koŋdya nyo? Lyaŋan nio a nyo? Ko toron nio ’beron a nyo ko munyi i komor, nagon nye ga ’yu tatuja nan na?

² A Yonatana nyobbi lepeŋ adi, Ti kine kulya gwe pajo konut! Do de ti tatua. Mete, baba ti koŋdya nene ŋo, kode duma kode na ’dit ko lepeŋ a ko kwekiŋdya nan; a nyo lolor nagon baba ’de ’ya kine kulya ko nan? Ti gwon sona asut.

³ Ama a Dawidi renyani renya adi, Munyi a den ’bura adi, nan a ryeju ’busan konut i komor; a lepeŋ yeyeji adi, Ti Yonatana gwe ti den kune kulya, an ko delya. Ama ’diri gwak gwoso na gwoŋdi MATAT, ko gwoso na gwoŋdi do na, tuŋ nan pituŋdye a na ’dit i kutuk na dili.

⁴ A Yonatana kulyani ko Dawidi adi, Nan de kökonakin do ŋo liŋ nagon do a kulyari kine.

⁵ A Dawidi kulyani ko Yonatana adi, Mete, ko ’bure yapa wilo de memeta, a nan ködyö tine jaran nyesu ko mor i misa; ama kölörö nan, anyen nan ’de ’ya mugun mu ’dio tojo i sömukö na lor tomusala lonyit.

⁶ Ko munyi a ga ’yu nan, a do kulyani adi, Dawidi a mo ’yu nan parik adi ti nan rukörö nye i wökön Beteleme kase köji; kogwon temba i kiŋa rorwe lo mede nase liŋ kata nyu.

⁷ A ko lepeŋ de kulya adi, A na ’but! a mo gwe a na ’but ko nan köliŋönit ilot; ama ko lepeŋ a woran, a do kuruŋdye adi lepeŋ titiriku ŋo naron.

⁸ Nyenagon konaki nan köliŋönit ilot ’bura, kogwon do aje nyökiŋdyö nan köliŋönit ilot milye lo MATAT. Ama ko toron kata köyö, a ti do ko mugun inot tatuje nan; kogwon nyo nagon do ködyo joŋga nan ko munyi yu?

⁹ A Yonatana waddi adi, Ti kine kulya gwe pajo konut! Ko kodyö nan a den adi baba titiriku konakiŋdya do ŋo naron, nan ködyö ti bulö takiŋdya do le?

¹⁰ A Dawidi pije Yonatana adi, ŋa de lo takiŋdya nan ko munyi a nyobba do ko tupape na töili?

¹¹ A Yonatana kulyani ko Dawidi adi, Po, yi a tu mu ’diŋ. A se murek liŋ iti mu ’diŋ.

¹² A Yonatana kulyani ko Dawidi adi, Ti MATAT ŋun lo Yisaraele lo gwe a katokoronit likaŋ, de ko ’bure kode luŋa i lor tomusala lonyit, gwoso i na diŋit na, ko nan aje galun kaŋo yeyeesi ti baba, meddi, ko se a na ’but konut, a nan mo sunyukiŋdye do lore i tukö-kiŋdyö na do, ’bayin sona le?

¹³ Ama ko ködyö baba a wakun konakiŋdya do arabat, a ti MATAT konakiŋdye nan nene ŋo ko lwölwöŋ kine köti ko nan mo ti tukökiŋdyö do i soŋdu na do kaŋo ko taliŋ. Ti MATAT gwe ko do, gwoso na gwoŋdi nye ko baba köju nu.

¹⁴ Nyena ko nan nyuŋ gwon jörun, a ti do nyaŋi nan ko nyaŋu na MATAT; a ko nan ködyö a twan,

¹⁵ ti do gwe ti kö ’yu nyaŋu kötumit nio ŋupi. A ko MATAT mo a tukaŋu merok ti Dawidi liŋ i na kak,

¹⁶ a ti karin ti Yonatana gwe ti seyaji kaŋo i kötumit na Dawidi. Ko ti MATAT ropakiŋdye merok ti Dawidi.

¹⁷ A Yonatana köti tiŋdi Dawidi i milyeju i nyaŋu nanyit na lepeŋ; kogwon Yonatana nyanyar Dawidi parik gwoso na nyaŋi nye mugun nanyit na.

¹⁸ A Yonatana kulyani ko lepeŋ adi, Ko ’bure de yapa wilo memeta; a do de metani gwe ’bayin, kogwon si ’daet inot gwon kana.

¹⁹ A i lor tomusala lonyit a do mo ’diri metani gwe ’bayin; a kirut ti do iti tojo i nu pirit na ’de ’yi do mugun i lor lo kenari kine kulya nu, ko möŋdi i ŋilu ’dome lo ŋurupö nyona.

²⁰ A nan mo ŋoroddi loya musala i lele swöt lonyit, gwoso nagon nan jujumbu poŋu biso na.

²¹ Nyena mete, a nan mo soŋdi ŋuro, adi, Iti i ga ’yu na loya kulo. A ko nan a kulya ko ŋuro lo adi, Mete, loya kilo konut i lu swöt, ’dumuŋdye se, a kirut ti do poŋdi, kogwon ’diri gwak gwoso na gwoŋdi MATAT na, a do gwe ’bura, nene ŋo naron ’bayin.

²² Ama ko nan a kulya ko ŋuro lo adi, Mete, loya kulu konut ŋerot, a kirut ti do wöki wökön; kogwon MATAT aje soŋdu do kaŋo.

²³ Ama i kulya nagon yi aje tujamakin ko do kine, mete, MATAT ŋilo kata i kiden nikaŋ ko do ŋupi ŋupi.

²⁴ Nyena a Dawidi ’danani ’dana mu ’diŋ; a nagon yapa wilo aje meta nu, a mor si ’dakine kak i nyesu na kinyo.

²⁵ A mor si ’dakine i si ’daet na diŋö ko gorom gwoso i kunie diŋitan kune; a Yonatana si ’dakine komorga lepeŋ, a Abiner si ’dakine i lele swöt lo Saula, ama pirit na Dawidi gwon kana.

²⁶ Ama Saula a ko kulya nene ŋo i ŋilu lor; kogwon lepeŋ yeyeju adi, ŋona Dawidi a toluddya mugun i kulya ti keri, nye ’bayin a loke.

²⁷ Ama i lor tomurek lo rorwe kweja adi i mukök na wilun na yapa i kotumalu nanyit, puja pirit na Dawidi gwon kana. A Saula pije ŋuro lonyit Yonatana adi, Nyo nagon ŋuro lo Yisai a ko poŋdya i nyesu kaje ko i lo lor?

²⁸ a Yonatana waddi Saula adi, Dawidi a mo ’yu nan parik i ruköddu na nye i tu Beteleme;

²⁹ lepeŋ a kulya adi, Kölörö nan i tu kogwon mede nikaŋ koŋdya rubaŋga i nu köji, luŋaser liŋ a saŋu nan adi ti nan gwe nyu. Nyena soŋinana, ko ködyö do wowon konyen ko nan, kölöddi nan i meddya na luŋasirik kwe. Nyena kogwon ŋina kwe nye a ko po i nyesu i misa inot pon mor.

³⁰ A kirut woran na Saula tuleki ko Yonatana. A nye kulyani ko Yonatana adi, Do ŋuro lo karenyanit ’burönit! Nan a den adi töjulin inot ko ŋuro lo Yisai mo na tiŋdu do yu na kwe ko tubaman na ŋuti na yupuŋdyö do na.

³¹ Kogwon temba i gwon na ŋuro lo Yisai jörun i na kak nu, do kode tumatyan inot mo ti gwo ’dan go kwöŋ. Nyenagon sonyoddi lele ŋuto i joŋdya na lepeŋ köyö ni, kogwon nye ’diri agu ködyö tatatua.

³² A kirut Yonatana pije monye lonyit Saula adi, Nyo nagon lepeŋ tatatua? Lepeŋ a koŋdya nyo?

³³ Ama a Saula rembi lepeŋ ko gor nanyit anyen ködyö tatuja lepeŋ; a Yonatana kirut kuruŋdye adi monye titiriku tatuja Dawidi.

³⁴ a Yonatana ŋine ŋien i misa yu ko woran a duma parik, a tine nyesu kinyo i lor tomurek lo ŋilu yapa, kogwon lepeŋ dedelya i kulya ti Dawidi, kogwon monye lonyit aje lu nye.

³⁵ A gwe sona i kotumalu, a Yonatana iti mu ’diŋ i pirit na wulun Dawidi nu, baraddu ŋuro lo ’dit.

³⁶ a nye kulyani ko ŋuro lo adi, Wöki i ga ’yu na loya lo pororo nan kilu. A nagon ŋuro lo nyuŋ wöwökön nu, a nye ŋoroddi lele lowe ko lepeŋ ŋerot.

³⁷ a nagon ŋilo ŋuro aje ’dur i pirit nagon Yonatana a ŋoroddi loya nu, a Yonatana luŋgi ŋuro lo a pije adi, Lowe lo ’bayin konut ŋerot le?

³⁸ A Yonatana luŋgi ŋuro lo adi, Rumu rumun ’de ’de, ko nyuŋ möŋdu. A ŋuro lo Yonatana lo ’du ’dumbe loya kulo, a poŋdi ko duma lonyit ni.

³⁹ Ama ŋilo ŋuro a ko den nene ŋo asut; tuŋ Yonatana ko Dawidi lo deŋdya kulya kase.

⁴⁰ A Yonatana tiŋdi ŋilu ŋuro tito kanyit möriesi, a takiŋdye lepeŋ adi, Iti, joŋe se köji.

⁴¹ A ’de ’de nagon ŋuro lo aje tu nu, a Dawidi ŋine ki nyona ko ’dome lo ŋurupö, a ’dorone kak rupu, a dulakine kak daŋin musala; a se ’biyuŋdye ’börik, a gwine gwien ko ’börik tojo ko Dawidi a gwien parik parik.

⁴² A Yonatana kulyani ko Dawidi adi, Iti ’bura, gwoso nagon yi aje nyekiŋdye ’börik milye i karin ti MATAT nu adi, MATAT mo lo gwon i kiden nikaŋ ko do, ko i kiden na nyakwariat kwe ko na nyakwariat kulök ŋupi ŋupi. A Dawidi ŋine ŋien, a iti tu; a Yonatana yitöni köji.