1 Samuele 19 - Bibilia Buk na Ŋun nagon koti luŋu a

Saula ga ’yu tatuja Dawidi

¹ A Saula kulyani ko ŋuro lonyit Yonatana se ko köliŋönök kanyit liŋ adi ti se tatune tatu Dawidi. Ama a Yonatana ŋuro lo Saula nyaŋi Dawidi parik.

² A Yonatana a takiŋdye Dawidi adi, Baba Saula lo ga ’yu tatuja do; nyenagon de ko ’bure kunyar mugun, möŋdi i nene pirit nagon a lwön ko ’danani ’dana nyu;

³ a nan de iti kaŋo a gwo ’de ko baba nyona i pirit na mu ’diŋ na gwoŋdi do nu, a nan de jambi ko baba i kulya kunök; ama ko nan a yiŋuŋdya nene ŋo a nan de takiŋdye do.

⁴ A Yonatana jamakiŋö-ye Saula monye lonyit kulya na ’but ti Dawidi, adi, Ti do mor gwe ti konakin-dya köliŋönit ilot Dawidi ŋo naron; kogwon lepeŋ a ko konakiŋdya do ŋo naron, köti kitajin nagon nye a konakin do kine a na ’but parik;

⁵ kogwon nye a pakiŋdya mugun i tatuja na Pelesetetyo lo, a MATAT iŋge konakiŋdya Yisaraele liŋ lwökit duma. A do iŋge met kine ŋo a lyöŋi lyöŋön. Nyo nagon do maŋgi rima ti Dawidi i tatuja na lepeŋ ’bak kwe na kulya?

⁶ A Saula yiŋge jamesi ti Yonatana; a Saula milyeji milyeju adi, ’Diri gwak gwoso na gwoŋdi MATAT na, nye de tine tatua.

⁷ A Yonatana luŋgi Dawidi, a nyönyökökiŋdye lepeŋ kine ŋo liŋ. A Yonatana joŋdi Dawidi ko Saula ni, a nye gwe kanyit i komor gwoso na ’beron nu.

⁸ A gor köti lo nyöggi; a Dawidi iti kaŋo a möröni ko ŋutu ti Pelesete, a iŋge tatuja se jore parik, a se wöki wökön kanyit i komor.

⁹ A Mulökötyo loron lo sunyun MATAT lo poki ko Saula i mugun, na gwoŋdi nye i si ’da kanyit kadi ko gor kanyit i könin nu; a Dawidi gwe i ju ’yö na tom.

¹⁰ A Saula ’deke rimikiŋdyö Dawidi i gorom ko ŋina gor; ama a nye iŋge girakin kak ko Saula i komor, nyena a gor na rembi gorom. A Dawidi wöki wökön.

¹¹ A i ŋilu tukwaje a Saula sonyoddi luyökie ko Dawidi kadi i tiju na lepeŋ anyen nye ködyö tatuja lepeŋ i diŋit na ko ’bure. Ama a Mikala narakwan na Dawidi takiŋdye lepeŋ adi, Ko do a ko lwöggu mugun i lo tukwaje, a de ko ’bure do tatatua.

¹² Nyena a Mikala kölöddi Dawidi kak i kulupit; a nye wöki wökön a lwököddi mugun.

¹³ A Mikala ’dumuŋdye nyömue nene a topiriki-ŋdye nye i dotoet, a tiŋdi tiket logon gwon a kupir ti yidin, i kwe nanyit, a muŋge muggo ko boŋgwat.

¹⁴ A nagon Saula soŋdi luyökie i morga na Dawidi nu, a Mikala kulyani adi, Lepeŋ a gilö.

¹⁵ A Saula köti sonyoddi luyökie kulo i meddya na Dawidi, a jamakiŋdye se adi, Joŋdi ta lepeŋ köyö ni i dotoet loki anyen nan ko tatatu lepeŋ.

¹⁶ A nagon luyökie kulo aje lupö lukata nu, mete, a nyömue gwe i dotoet loki ko tiket kanyit i kwe logon a kupir ti yidin.

¹⁷ A Saula pije Mikala adi, Nyo do aje mumulugga nan sona i kölöddu na miriku liŋ anyen lwököddu mugun? A Mikala ruŋge Saula adi, Lepeŋ a kulya ko nan adi ti nan kölöddi nye, kogwon nye ti ’bön tatuja nan.

¹⁸ Nyena a Dawidi wöki wökön a lwököddi mugun, a ’dure ko Samuele Rama yu, a nyönyökökiŋdye nye ŋo liŋ nagon Saula aje konakin nye kune. A lepeŋ ko Samuele iti i si ’da Nayot.

¹⁹ A kine kulya jamakine Saula adi, Mete, Dawidi lu Nayot na Rama.

²⁰ A kirut Saula sonyoddi luyökie i morga na Dawidi; a nagon se a meddya teŋ na nebijin i keju ko Samuele gwogwo ’dan a kanyömönit lose nu, a Mulökötyo lo ŋun poki ko luyökie ti Saula kulo i mugunya, a se köti keŋ keju.

²¹ A kine kulya ko jamakine Saula, a nye soŋdi kulye luyökie köti, a se köti keŋ keju. A Saula soŋdi kulye luyökie köti daŋ tomusala, a se köti keŋ keju.

²² A kirut Saula ko mugun lo iti Rama yu, a ’dure i kidi duma lo gwon Seku; a nye pije adi, Kuliya ko Samuele ko Dawidi? A lele ŋuto nyobbi adi, Mete, lepeŋat kulu Nayot na Rama.

²³ A nye ŋiörö ŋiörö a iti Nayot na Rama; a Mulökötyo lo ŋun köti poki ko lepeŋ i mugun, a nye keyoddi keyoddu tojo ko ’dur nanyit Nayot na Rama.

²⁴ A nye köti rusuŋdye boŋgwat kanyit kune kaŋo, a nye köti keŋ keju ko Samuele i komor, a nye ’dorone kak a limu kana i ŋilu tuparan ko i ŋilu tukwaje liŋ. Ko ŋina kwe a ŋutu pije adi. Saula köti a lele lo nebijin le?