1 Samuele 18 - Bibilia Buk na Ŋun nagon koti luŋu a

Yonatana a tunyekin milye ko Dawidi

¹ A ko gwe sona nagon nye aje tutuŋ gö jambu ko Saula nu, a töili lo Yonatana iŋge mora ko töili lo Dawidi, a Yonatana nyaŋi lepeŋ gwoso mugun nanyit.

² A i ŋilu lor a Saula joŋgi Dawidi a tine ’bön kölöddu lepeŋ i yitö ko monye mede.

³ A Yonatana ko Dawidi tunyeki milye, kogwon lepeŋ nyanyar nye gwoso mugun nanyit.

⁴ A Yonatana rusuŋdye boŋgo nanyit a tiŋdi Dawidi, ko jupisi kanyit gayesi köti, ma ’di baŋdu lonyit möriet ko daŋ nanyit se ko gom nanyit.

⁵ A Dawidi iti kaŋo a te ’yi te ’ya i piritön liŋ nagon Saula a soŋdi nye kunu; nyena a Saula tiŋdi lepeŋ a duma lo kamörök. A ŋina metani a na ’but ko ŋutu liŋ se ko köliŋönök ti Saula köti.

Saula a yulön ko Dawidi

⁶ A na poŋdi se mede i diŋit nagon Dawidi aje yitwe i rembu na ŋutu ti Pelesete nu, a ŋutu wate lupöni kaŋo i köjinö liŋ ti Yisaraele i rum ko mor Saula, yuyulwe, ko gwogwouŋdya ko tiŋgiliet ko kölisi lyöŋesi, ko julesi ka ’de ka ’de.

⁷ a na luŋgi ŋutu wate kunu, a kunie kase yulukiŋdye kunie kune adi, Saula a tatuja kanyit a aliŋan aliŋan, A Dawidi iŋge tatuja kanyit a aliŋan puök puök.

⁸ A Saula wore woran parik, a kilo kulyaesi todelyaji lepeŋ. A nye kulyani adi, Se aje kenakiŋdya Dawidi aliŋan puök puök, ama a se keŋdi kwe a alipan alipan ka ’de; a nye de wuji nyo lwölwöŋ tumatyan nio?

⁹ A Saula meddi Dawidi ko konyen lorok suluja i ŋilu lor tojo ko ŋerot.

¹⁰ A i ko ’bure a Mulökötyo lio lo sunyun ŋun lo morgi Saula ko riŋit, a nye jambi a mamala kanyit kadi, a Dawidi gwe i ju ’yö na tom gwoso na perok liŋ na. A Saula gwe ko gor kanyit i könin;

¹¹ a Saula remoddi gor, kogwon nye yeyeju adi nye de ririmikin Dawidi i gorom. Ama a Dawidi iŋge giran ko Saula i komor daŋin murek.

¹² A Saula kujönöni Dawidi, kogwon MATAT aje kölökiŋdyö nye a gwe ko Dawidi.

¹³ A Saula joŋgi Dawidi kaŋo kanyit i komor, a tiŋdi lepeŋ a duma lo kamörök kanyit aliŋ geleŋ; a nye gwe a kanyömönit lo ŋutu i tu nase kaŋo ko i yitwe nase.

¹⁴ A Dawidi gwe a lokoŋ i ŋo liŋ nagon nye kökon kune, kogwon MATAT gwon ko lepeŋ.

¹⁵ A Saula ko meddi adi lepeŋ a lokoŋ parik, a nye kujönöni kujönö lepeŋ.

¹⁶ Ama a ŋutu liŋ ti Yisaraele ko ti Yuda nyaŋi Dawidi; kogwon nye a kanyömönit lose i tu nase kaŋo i mörö.

¹⁷ A Saula kulyani ko Dawidi adi, Mana Meraba ŋuro nio kayu. Nan de tiŋdu do nye a narakwan inot; ama tuŋ ti do gwe a purutat i kulya kwe, ko möröni mörö goro ti MATAT. Kogwon Saula a yeyeju adi nye ti ’bulukiŋdyö könin lonyit ko lepeŋ loki, ama ti ŋutu ti Pelesete lo tatuje lepeŋ.

¹⁸ A Dawidi pije Saula adi, Nan a ŋa, ko karu kwe a ko ŋa, ko kötumit na baba a nyo i kiden na ŋutu ti Yisaraele, anyen nan ködyö gwon a komonit lo mor le?

¹⁹ Ama a ko gwe sona i diŋit nagon Meraba ŋuro na Saula ködyö nyömökine Dawidi nu, a nye kölumbö nyömökine Adriele ŋuto lo Mekola a narakwan nanyit.

²⁰ Ama a Mikala ŋuro na Saula nyaŋi Dawidi; a kine kulya iŋge nyönyököki Saula, a iŋge tulyoŋgu lepeŋ.

²¹ A Saula kulyani adi, Nan de tiŋdu lepeŋ ŋuro na anyen nye böpö gwon a kalokanit na lepeŋ, anyen nye bubulö tatua i mörö ko ŋutu ti Pelesete. Nyenagon a Saula kulyani ko Dawidi daŋ tomurek adi, Do soŋinana de gwe a komonit liŋ.

²² a Saula kulyani ko köliŋönök kanyit kulo adi, Tambi ta ko Dawidi a lwön adi, Meddi, mor a lyöŋön ko do, a köliŋönök kanyit liŋ nyaŋi do; nyena soŋinana ti do gwe a komonit lo mor.

²³ A köliŋönök ti Saula nyönyöggi kine kulya a Dawidi yiyiŋga. A Dawidi pije adi, ’Diri meta a ŋo na ’dit kasu le i gwon a komonit lo mor, kogwon nan a ŋuto logon a lomeri logon ’bak ’bulit?

²⁴ A köliŋönök ti Saula kulo nyönyökökiŋdye lepeŋ adi, Dawidi a jambu kulya gwoso kune.

²⁵ A Saula kulyani adi, Nyönyö-köki ta Dawidi sona adi, Mor ti ’deggi toro ’bo yemesi asut, ka ’de nye ’de ’de-kan ka ’bi ’binyalan mia geleŋ ti ŋutu ti Pelesete, anyen mor böŋö ropuŋdya mugun ko merok kanyit. Ama Saula a yeyeju i tatuja na Dawidi ko könisi ti ŋutu ti Pelesete.

²⁶ A nagon köliŋönök kanyit aje nyönyökökiŋdyö Dawidi kilo kulyaesi nu, a Dawidi lyöŋi lyöŋön parik i gwon a komonit lo mor. A i ŋerot nagon perok a ko nyuŋ tutuŋgö nu,

²⁷ A Dawidi ko ŋutu kanyit ŋine ŋien a iti tu, a tatuje ŋutu ti Pelesete gwoso miajin murek; a Dawidi joŋdi ka ’bi ’binyalan kase, a tiŋdi mor jore parik, anyen nye bubulö gwon a komonit lo mor. A Saula tiŋdi nye ŋuro nanyit Mikala a narakwan.

²⁸ Ama a Saula ko meddi a kuruŋdye adi MATAT gwon ko Dawidi; a Mikala ŋuro na Saula nyaŋi lepeŋ.

²⁹ A Saula nyuŋ gwe i kujönö Dawidi parik, a Saula tirikuni Dawidi a miriku lonyit i diŋitan liŋ.

³⁰ A dumalak ti kamörök ti Pelesete poŋdi kaŋo i mörö, ama temba i diŋitan nagon se pöri kaŋo nu, a Dawidi gwe a lokoŋ i mörö lwölwöŋ köliŋönök ti Saula; nyena a karin kanyit bulani bula parik.