1 Samuele 17 - Bibilia Buk na Ŋun nagon koti luŋu a

Dawidi a tatuja Goloyota

¹ A ŋutu ti Pelesete momori teŋon kase i mörö; a se momo-ruŋdye Soko nagon a na Yuda, a ’beggi mera nase i kiden na Soko ko Ajeka Epese-damim yu.

² A Saula ko ŋutu ti Yisaraele köti momori i pirit na geleŋ, a ’beggi mera nase i loro lo Ela, a se ’dakaki i mörö ko ŋutu ti Pelesete.

³ A ŋutu ti Pelesete gwo ’de i mere ki i lele swöt, a ŋutu ti Yisaraele gwo ’de i mere ki i lele swöt, a loro lo gwe kase kiden.

⁴ A lele ŋuto logon a wa lo poŋdi kaŋo i kiden na mera na ŋutu ti Pelesete, karin kanyit a Goloyota ŋuto lo Gata. Jolan nanyit a lokiliŋan buker ko kwake geleŋ na ’dapanit na könin.

⁵ A terebuk lonyit gwe a mölwö, a nye muŋge kido nanyit ko gayet nagon a mölwö na ’di ’dilu nagon temuŋdya a sekelejin aliŋan mukanat.

⁶ A mukesi ti koroko-lon kanyit gwe a mölwö, ko gor na ’dit nagon a mölwö a liliki kanyit i ki ’diŋ.

⁷ A kito lo gor nanyit gwe gwoso gwu-luŋi lo kagweyanit lo boŋgwat, a gor nanyit temuŋdye a sekelejin miajin buker ti witi; a ka ’dokonit lo ’buku gayet nanyit wöröjine kanyit ŋerot.

⁸ A nye gwo ’de gwo ’dan, a woŋoro ki ko teŋon ti kamörök ti Yisaraele adi, Nyo nagon ta a po kaŋo a ’dokiŋ i mörö? Nan a leŋe Pelesetetyo le, ta ’bayin a ’dupi ti Saula le? Wulun-dye ta ŋuto losu ko ti nye poŋdi kak köyö ni.

⁹ Ko nye bubulö morö ko nan a tatuje nan, a yi de gwe a ’dupi kasu; ama ko nan lo te ’ya lepeŋ a iŋge tatu lepeŋ, a ta de gwe a ’dupi kao, a kitakiŋdye yi.

¹⁰ A Pelesetetyo lo kulyani adi, Nan aje lu teŋon ti kamörök ti Yisaraele i lo lor; jaki ta nan ŋuto, anyen yi tutumör i pirit na geleŋ.

¹¹ A nagon Saula ko Yisaraele liŋ ko yiŋge kilo kulyaesi ti Pelesetetyo lo, a se wiwi-nyani wiwinya, a kujönöni kujönö parik.

¹² A Dawidi gwe a ŋuro lo Yisai Eparatatyo lo Beteleme na Yuda. Yisai gwon ko ŋwajik lyan budök. A i kilo perok ti Saula a Yisai ’beron gwe a modoŋ ko kiŋajin jore.

¹³ A ŋwajik temejik musala ti Yisai aje kepöddu Saula i gor; a karin ti kilo ŋwajik kanyit musala logon a tu i gor kulo gwe a ko Eliaba logon a ŋuro kayu, ko Abinadaba a loponi, ko tomusala a Sama.

¹⁴ A Dawidi gwe a lo ’dutet; a ŋwajik musala ti kokwe kulo aje kepöddu Saula,

¹⁵ ama a Dawidi yeŋe wörö ko Saula yu ko i yitwe Beteleme i yuggu na yidin ti monye lonyit.

¹⁶ A Pelesetetyo lo miju nyona, a kwekiŋdye mugun i ŋutu ti Yisaraele temba i ko ’bure ko i kotiri ko perok merya iŋwan.

¹⁷ A Yisai kulyani ko ŋuro lonyit Dawidi adi, Taki luŋösurök wuyit nagon a epa geleŋ na kilo ’bolot lo kelo, ko kunie ambatajin puök, ko nyoŋaki luŋösurök ’de ’de i mera yu;

¹⁸ köti jaki duma lose lo kamörök aliŋ geleŋ ŋina gwoŋali nagon a tetena gwoso ambatajin puök na. Mete met ko luŋösurök gwon ada, ko jaki nan nene kweyet kase.

¹⁹ A Saula se ko luŋasirik ti Dawidi ko ŋutu liŋ ti Yisaraele gwe i loro lo Ela mömörö ko ŋutu ti Pelesete.

²⁰ A Dawidi ŋine ŋien ko ’bure kobubut, a kölökiŋdye yidin kune ko lele kayuku-nit, a ’dumuŋdye kinyo lo a iti tu gwoso na saŋi Yisai lepeŋ nu, a nye ’dure i mera i diŋit nagon kamörök tiri kaŋo i pirit na gor nu, a se gwe i siraji i möro.

²¹ A teŋon ti kamörök ti Yisaraele ko ti kamörök ti Pelesete teteŋdi ’börik a ’dokiŋ i mörö.

²² A Dawidi kölökiŋdye tito kune ko kati-yunit lo toro ’bo, a wöki i teŋon ti ŋutu, a iti i roman ko luŋasirik kanyit kulo.

²³ A nagon nye nyuŋ jajambu ko se nu, mete, a ŋilu wa Pelesetetyo lo Gata, logon karin kanyit a Goloyota, poŋdi kaŋo i teŋon ti ŋutu ti Pelesete, a jambi kulyaesi gwoso ti kokwe kulu. A Dawidi yiŋge lepeŋ.

²⁴ A ŋutu liŋ ti Yisaraele ko meddi ŋilo ŋuto, a wöki wökön ko lepeŋ, a iŋge kujönö parik.

²⁵ A ŋutu ti Yisaraele kulyani adi, Ta a met ŋilo ŋuto logon a pukun lo le? ’Diri nye a poŋdyai lauŋdya na Yisaraele; ama ko lele ŋuto a tatuja lepeŋ, a mor mo tukwörieŋdi lepeŋ ko tukwörien duma, a mo tiŋdi lepeŋ ŋuro nanyit a narakwan, a tiŋdi kötumit na monye lonyit i gwon a luitöt i Yisaraele.

²⁶ A Dawidi pije ŋutu lo gwo ’dan kanyit nyona kulo adi, Nyo mo na konaki i ŋuto logon a tatuja ŋilo Pelesetetyo, anyen joŋga yu na kwe kaŋo i Yisaraele? Kogwon ŋilo Pelesetetyo logon a ko tawero lo, lepeŋ a ŋa logon woro i lauŋdya na teŋon ti ŋun lo gwon jörun lo?

²⁷ A ŋutu ruŋge lepeŋ sona köti adi, ŋuto lo tatuja lepeŋ lo mo kokonaki sona.

²⁸ A Eliaba, luŋaser lonyit lo kokwe lo, ko yiŋge lepeŋ nagon nye nyuŋ gwon i jambu ko kilu ŋutu nu, a nye wore woran ko Dawidi, a kulyani adi, Ko nyo nagon do a po ni? Do a kölökin pitönö ti yidin kunu ko ŋa i könin i yöbu yu? Nan a den bu ’ya inot na kwe, ko toron na töili ilot; kogwon do a poŋdya kak ni anyen ko meddya lo gor.

²⁹ A Dawidi pije adi, Nan soŋinana a koŋdya nyo? Nan ’bayin pija piyet le?

³⁰ A nye löpuköjine kaŋo ko lepeŋ a kulyani ko lele ŋuto gwoso na kokwe nu; a kilo ŋutu nyopakiŋdye lepeŋ koti gwoso na diŋit na kokwe nu.

³¹ A nagon kulyaesi lo jam Dawidi kulo ko yiŋani, a se nyönyökökiŋdye Saula kilo kulyaesi, a nye luŋgi lepeŋ.

³² A Dawidi kulyani ko Saula adi, Ti töili lo lele ŋuto gwe ti lwö ’yu i kulya ti lu ŋuto. Nan köliŋönit ilot de tutu i mörö ko ŋilu Pelesetetyo.

³³ a Saula kulyani ko Dawidi adi, Do ti bulö tu i mörö ko ŋilu Pelesetetyo; kogwon do nyuŋ a titinti, ama lepeŋ a kamörönit suluja i toteton nanyit.

³⁴ Ama a Dawidi kulyani ko Saula adi, Nan köliŋönit ilot ’beron a kayukunit lo yidin ti monye liŋ pon mor; a ko kömiru a po, kode lele gworoŋ, i morga na lele kilolor i teŋ,

³⁵ a nan riköddi lepeŋ, a gwuddye lepeŋ, a lwökuŋdye kilolor kanyit i kutuk; a ko lepeŋ ŋiki köyö ki, a nan morgi lepeŋ kanyit i gworo, a gwuddye lepeŋ, a tatuje lepeŋ.

³⁶ Nan köliŋönit ilot aje tatuja kömiruöt ko kulye gwuruŋin; a ŋilo Pelesetetyo logon a ko tawero ŋilo de gwe gwoso lele lose, kogwon nye a lauŋdya teŋon ti ŋun lo gwon jörun.

³⁷ A Dawidi kulyani adi, ŋilo MATAT logon a lwökuŋdyö nan i morin ti kömiruöt ko ti kulye gwuruŋin lo de lwölwök nan köti i könisi ti ŋilo Pelesetetyo. A Saula kulyani ko Dawidi adi, A na ’but, iti, ko ti MATAT gwe ko do.

³⁸ A Saula tojubbi Dawidi ko tito kanyit möriesi; a tiŋdi terebuk logon a mölwö kanyit i kwe, a tojubbi lepeŋ ko gayet nagon a mölwö na ’di ’dilu.

³⁹ A Dawidi pitakiŋdye baŋdu lonyit lo i loki na jupisi ti gor, a nye möŋi tu, ama nye a ko diniki se. A Dawidi kulyani ko Saula adi, Nan ti bulö tu ko kune tito kogwon nan a ko diniki se. A Dawidi rusuŋdye se kaŋo.

⁴⁰ A nye ’dumuŋdye ture lonyit kanyit i könin, a nyumuŋdye ŋurupö loliliŋök mukanat i tudöm na loro, a sutakiŋdye se i jurak lonyit logon a lo kayukunit lo; ko lowiset kanyit i könin, a nye mijörö nyona ko Pelesetetyo lo yu.

⁴¹ A Pelesetetyo lo poŋdi po a miju nyona ko Dawidi ni, a ka ’dokonit lonyit lo ’buku gayet lo gwe kanyit ŋerot.

⁴² a Pelesetetyo lo ko boŋgi, a meddi Dawidi, a lauŋdye lepeŋ; kogwon nye nyuŋ gwon a titinti, a loliyuk, ko mugun nanyit a nake parik.

⁴³ a Pelesetetyo lo pije Dawidi adi, Nan lolor a ’dioŋ le na pöri do köyö ni ko turya na? A Pelesetetyo lo momoroji Dawidi ’diŋdya karin ti ŋunyen kanyit.

⁴⁴ A Pelesetetyo lo kulyani ko Dawidi adi, Po köyö ni, a nan de tiŋdi öpu inot i nyei ko kwen ko gwuruŋin ti mu ’diŋ.

⁴⁵ a Dawidi kulyani ko Pelesetetyo lo adi, Do po köyö ni ko baŋdu, ko gor, ko gor na ’dit; ama nan lo a po konut ni i karin ti MATAT lo kurumi, logon a ŋun lo teŋon ti Yisaraele, logon do a lu lepeŋ lo.

⁴⁶ A MATAT de wukiŋdye do köyö i könin i lo lor, a nan de gwutökiŋdye do kak, a ’duŋöddi kwe inot kaŋo; a nan de tiŋdi öpuö ti kurumi na ŋutu ti Pelesete i lo lor i nyei ko kwen se ko gwuruŋin; anyen kak liŋ böŋö deden adi ŋun kata i Yisaraele,

⁴⁷ köti anyen ŋutu liŋ logon a momoruŋdya kilo böŋö deden adi MATAT ti lwöggu ŋutu kanyit ko baŋdu kode ko gor; kogwon na mörö a na MATAT, a nye de wukiŋdye ta kayaŋ i könisi.

⁴⁸ A gwe sona na ŋe Pelesetetyo lo nu, a iti kak, a miju nyona i rum ko Dawidi, a Dawidi wöki wökön ’de ’de i pirit möriet i torumbö ko Pelesetetyo lo.

⁴⁹ A Dawidi sööddi könin lonyit i jurak, a ’dumuŋdye ŋurupit, a tiŋdi kanyit i lowiset, a widdye widdyö, a gubaddi gubaddu, a keggi Pelesetetyo lo i komor; a ŋurupit iŋge lupö kanyit i kwe lukata, a nye ’dorone kak rupu.

⁵⁰ Nyena a Dawidi te ’yi Pelesetetyo lo ko lowiset se ko ŋurupit, a iŋge gumba Pelesetetyo lo a tatuje lepeŋ; ama a baŋdu möriet gwe ’bayin ko Dawidi i könin.

⁵¹ a Dawidi wöki wökön, a gwi ’diki ko Pelesetetyo lo loki, a morgi baŋdu lonyit möriet lo, a ’dutuŋdye kaŋo kanyit i soko ’bo, a tatuje lepeŋ, a ’duŋuŋdye kwe nanyit kaŋo ko ŋilu baŋdu. A nagon ŋutu ti Pelesete ko meddi adi wa lose aje tatua nu, a lepeŋat wöki wökön.

⁵² A ŋutu ti Yisaraele ko ti Yuda ŋine ki, a sirani sira, a riköddi ŋutu ti Pelesete tojo ko Gata, tojo ko kötumi-tön ti mariŋ na köji na Ekron. A ŋutu ti Pelesete logon a böböŋöji kulo ’do ’done i kiko a twatwa, suluja Sarayim tojo Gata ko Ekron.

⁵³ a ŋutu ti Yisaraele yitöni bot i riköddu na ŋutu ti Pelesete, a se ryaggi mera nase.

⁵⁴ A Dawidi ’dumuŋdye kwe na Pelesetetyo lo, a joŋgi lepeŋ Yerusalema; ama a nye tiŋdi tito kanyit möriesi kulo i lukata na kemia nanyit.

⁵⁵ A nagon Saula ko meddi Dawidi i tu ŋerot i mörö ko Pelesetetyo lo nu, a nye pije Abiner duma lo. kamörök adi, Abiner, ŋilo titinti a ŋuro liŋ a? A Abiner renyani adi, Pon mor, ’diri gwak gwoso na gwoŋdi do na, nan ti den.

⁵⁶ A mor kulyani adi, Galu kaŋo ko ŋilu titinti a ŋuro liŋ a.

⁵⁷ a nagon Dawidi aje yitwe i tatuja na Pelesetetyo nu, a Abiner morgi lepeŋ a joŋgi lepeŋ ko Saula i komor ko kwe na Pelesetetyo lo kanyit i könin.

⁵⁸ a Saula pije lepeŋ adi, Do ŋilo titinti, do a ŋuro liŋ a? A Dawidi ruŋge adi, Nan a ŋuro lo köliŋönit ilot Yisai ŋuto lo Beteleme.