1 Samuele 15 - Bibilia Buk na Ŋun nagon koti luŋu a

Saula a lauŋdya a ŋun renyani lepeŋ

¹ A Samuele kulyani ko Saula adi, MATAT lo sunyuŋdyö nan i welakiŋdya na do a mor lo ŋutu kanyit Yisaraele; nyenagon yiŋge kulyaesi ti MATAT.

² MATAT lo kurumi lo kulya adi, Nan de ririŋ ŋutu ti Amalek i ŋo nagon se a konakin ŋutu ti Yisaraele i gokiŋdya na se kiko na yuöddi lepeŋat kaŋo Ejipeto yu nu.

³ Nyenagon iti i rembu na ŋutu ti Amalek, ko tutuŋge asut po liŋ na gwon kase kunu; an do ko pitökin se kwöŋ, ama tatuje ko lyan ko wate, ko ŋwajik ko lupudiet lo nönöggu, ko dwönin ko yidin ko kamilojin ko kaineki.

⁴ A Saula lupundye ŋutu a keŋdi keŋdya se Telaim yu, gwoso ŋutu aliŋan miajin murek logon wörö ko mok, se ko ŋutu aliŋan puök ti Yuda.

⁵ A Saula ko ’dure i köji na Amalek, a nye dombi domba i pirit na ’dir.

⁶ A Saula kulyani ko ŋutu ti Keni adi, iŋgo ta, ŋidrö ta ka-ŋo, iti ta kaŋo i kiden na ŋutu ti Amalek, an nan de tukaŋu ta ko se i pirit na geleŋ; kogwon ta aje kwekiŋdya ’busan i ŋutu ti Yisaraele liŋ na pöri se kaŋo i Ejipeto nu. Nyena a ŋutu ti Keni iti kaŋo i kiden na ŋutu ti Amalek.

⁷ A Saula te ’yi te ’ya ŋutu ti Amalek suluja Kawila tojo Sur na gwon i swöt lo ’yure lo Ejipeto.

⁸ A nye morgi Agaga jörun logon a mor lo Amalek, a nye togirö-kiŋdye ŋutu liŋ ko baŋdujin adi sit.

⁹ Ama a Saula ko kilu ŋutu pituŋdye Agaga, se ko ŋo na ’but i kiden na köbilu ko na dwönin ko na kolojik ko na yisi ko ŋo liŋ nagon a na ’but, a tine tutuŋgö se asut; a se tukaŋi asut po liŋ nagon a narok ko nagon ’bak ’bulit.

¹⁰ A kirut kulyaet lo MATAT poki ko Samuele adi,

¹¹ Nan a delya i tiŋdu na Saula a mor; kogwon nye aje kukut bot I kebbu na nan, a tine koŋdya saresi kwe. A Samuele wore woran; a nye gwiki ko MATAT tukwaje liŋ.

¹² A Samuele ŋine ’beron i rum ko Saula i ko ’bure; a lore iŋge taki Samuele adi, Saula a tu köji na Karmela, mete, a nye iŋge togwi ’dikiŋdya lele ŋurupit a toye-yeet lo mugun nanyit, a löpuköni löpukö, a lwöŋöddi kak tojo ko Giligala.

¹³ A na ’durökiŋdye Samuele ko Saula yu nu, a Saula kulyani ko lepeŋ adi, Ti MATAT ’boroji do; nan aje koŋdya saret lo MATAT.

¹⁴ A Samuele pije adi, ŋinu woŋon a nyo na po köyö i swö gwoso na köbilu ko gwugga na dwönin logon nan yiyio kilo?

¹⁵ A Saula waddi adi, Kinu ŋo a ryakwe ko ŋutu ti Amalek i könisi; kogwon ŋutu kaŋ a pituŋdyö köbilu ko dwönin lo ’but, anyen ko ’duŋökin MATAT ŋun ilot a rubaŋga; ama ŋo kunie liŋ yi aje tukar asut.

¹⁶ A kirut Samuele kulyani ko Saula adi, Yiŋe! anyen nan de nyönyökökin do ŋo nagon MATAT a jamakin nan i lo tukwaje kune. A Saula kulyani ko lepeŋ adi, Tambi koi.

¹⁷ A Samuele kulyani adi, Ma ’di nagon do memet mugun a lo ’dit, do ti gwon a kwe na kötumitön ti Yisaraele le? MATAT aje welakiŋdya do a mor lo Yisaraele.

¹⁸ A MATAT aje yököŋ do i jölö, a kulyani adi, Iti ko tukare asut ŋutu ti Amalek logon a katoronyak kulu, ko möröni ko se, tojo se a tutuŋö.

¹⁹ Nyo nagon do a ko yiŋ gworo lo MATAT? Nyo nagon do ’doro i ryaggu na ŋo a koŋdi ŋo naron ko MATAT i komor?

²⁰ A Saula kulyani ko Samuele adi, Nan aje yiŋ gworo lo MATAT, a nan iŋge tu i jölö nagon MATAT a yökije nan na, a nan iŋge joŋdya Agaga mor lo Amalek, nan aje tukar ŋutu ti Amalek asut.

²¹ Ama a ŋutu kulo ’dumuŋdye i ŋo na ryakwe kune köbilu ko dwönin logon a lo ’but i kiden na ŋo na gelwe i tukara kune, anyen ko ’duŋgo se a rubaŋga lo MATAT ŋun ilot Giligala ni.

²² A Samuele pije adi, MATAT ŋona bubulö lyöŋön ko rubaŋgajin lo ’yu ’yura ’buluŋ ko lo ’du ’duŋö kilo kwölwöŋ lyöŋön nanyit ko ŋutu a twöju gworo lonyit le? Mete, twöju a na ’but lwölwöŋ rubaŋgajin, yiŋga a na ’but lwölwöŋ welet na lopoŋoki.

²³ Kogwon rerenya gwon gwoso toron na to ’bunun, a töili iŋgo gwe gwoso twöju na nyömue. Nyena MATAT aje renya do i gwon a mor kogwon do a renya kulyaet lonyit.

²⁴ A Saula kulyani ko Samuele adi, Nan aje toroŋdya; kogwon nan a laŋgu saret lo MATAT se ko kulyaesi kulök, kogwon nan a kujönö ŋutu kulo a yiŋge gworolo kase.

²⁵ Nyenagon nan momo ’yu do, pitöki nan i toron nio, ko ti do moraddi bot ko nan, anyen nan bubulö kwakwaddu MATAT.

²⁶ A Samuele kulyani ko Saula adi, Nan ti bulö moraddu ko do, kogwon do aje renya kulyaet lo MATAT, a MATAT iŋge renya do i gwon a mor lo Yisaraele.

²⁷ A nagon Samuele wöriŋöni wöriŋö anyen ködyö tutu nu, a Saula morgi kume lo boŋgo nanyit muit, a nu boŋgo kerenyani kerenya.

²⁸ a Samuele kulya ni ko Saula adi, I lo lor MATAT aje kerenyaddu tumatyan na Yisaraele kaŋo konut, ko aje tiŋdu ko lele lo diŋö ko do, logon a lo ’but lwölwöŋ do.

²⁹ Nyena köti ŋun logon ŋutu ti Yisaraele bubu lo ti jambu ’burönö kode lölöpuggö, kogwon nye ’bayin a ŋuto anyen lölöpuggö.

³⁰ A kirut Saula kulyani adi, Nan aje toroŋdya; ama bu ’ye nan soŋinana i komor na temejik ti ŋutu kwe ko i komor na ŋutu ti Yisaraele, ko moraddi bot ko nan i pirit na geleŋ, anyen nan bubulö kwakwaddu MATAT ŋun ilot.

³¹ Nyena a Samuele wöriŋöni wöriŋö a kepoddi Saula; a Saula kwakwaddi MATAT.

³² A Samuele kulyani adi, Taki nan ni Agaga mor lo ŋutu ti Amalek, a Agaga poŋdi ko lepeŋ ni ko yeyeet. A Agaga kulyani adi, ŋona delya na twan aje lwöŋgu köyö.

³³ a Samuele kulyani adi, Gwoso nagon baŋdu ilot aje tolikiseŋdu wate jore nu, nyena köti a ŋuti de gwe a likiso ko wate kiden. A Samuele totoggi Agaga ka ’de ka ’de ko MATAT i komor Giligala yu.

³⁴ A Samuele iti Rama, a Saula iti kanyit mede Gibea na luŋu a na Saula.

³⁵ A Samuele köti gwe a ko met Saula tojo ko lor lonyit twaet, ama a Samuele iŋge delya Saula. A MATAT delyani delya kogwon nye a tiŋdu Saula a mor lo Yisaraele.