1 Samuele 14 - Bibilia Buk na Ŋun nagon koti luŋu a

¹ A gwe sona i lele lor, a Yonatana ŋuro lo Saula kulyani ko titinti ka ’dokonit lo tito möriesi kanyit lo adi, Po, ti yi iti i mera na ŋutu ti Pelesete lo gwon i nu pele kulu. Ama nye a ko takin monye lonyit.

² A Saula si ’dani i ’dutet na Gibea i mukök na ködini lo ruman lo gwon Migron; a ŋutu logon gwon ko lepeŋ kulo gwe gwoso miajin buker,

³ se ko Akiya, ŋuro lo Akituba, luŋaser Ikaboda, ŋuro lo Pinasa, ŋuro lo Eli koane lo MATAT Silo yu. A Akiya jupuni epoda. A ŋutu gwe a ko den adi Yonatana a tu kaŋo.

⁴ A i pirit lupet na gwon i merya yu nagon Yonatana möŋi laŋaddu tojo i mera na ŋutu ti Pelesete nu, a ŋurupit lurutat lopi gwe i lele swöt ko lele i lu swöt köti; lele karin kanyit a Bosese, a lele luŋuni a Sene.

⁵ A lele lurutat iŋge ’dopara mugun ki i swöt lo lobot i komor na Mikemasa, a lele gwe i swöt lo loki i komor na Geba.

⁶ A Yonatana kulyani ko titinti ka ’dokonit lo tito möriesi kanyit lo adi, Po, ti yi laŋaddi i mera na kilu ŋutu logon a ko tawero kulu, kode ŋona MATAT bubulö parakiŋdya yi; kogwon nene teŋet gwe ’bayin ko MATAT i lwökuŋdyö ma ’di ko könisi ti ŋutu jore kode ku ’dik.

⁷ A ka ’dokonit lo tito möriesi kanyit lo kulyani ko lepeŋ adi, Koŋdi ŋo liŋ gwoso na ’deggi do na; iti, nan lo gwon ko do gwoso na ’deggi do na.

⁸ A Yonatana kulyani adi, Mete, yi de laŋaddu ko kilu ŋutu yu, a yi de kwekiŋdye ’börik i meta ko merok.

⁹ A ko se a kulya adi, Möŋdi ta tojo yi a tu kasu ŋini, a yi de gwo ’de gwo ’dan kayaŋ i pirit, a yi de tine tu kase yu. m

¹⁰ Ama ko se a kulya adi, Kiyuŋdye ta ki kayaŋ ni, a kirut a yi de iti tu kogwon MATAT aje wukiŋdya lepeŋat kayaŋ i könisi. A ŋina de gwe a kweyet kayaŋ.

¹¹ A se murek liŋ kwekiŋdye ’börik i meta ko ŋutu ti mera na Pelesete; a ŋutu ti Pelesete kulyani adi, Meddi ta kulo Ebere a po kaŋo i diliö nagon se ’da ’danari kune.

¹² A ŋutu ti nu mera nyobbi Yonatana ko ka ’dokonit lo tito kanyit möriesi lo adi, Kiyuŋdye ta ki kayaŋ ni, yi de kwekwekin ta nene ŋo. A Yonatana kulyani ko ka ’dokonit lo tito kanyit möriesi lo adi, Kipuŋdye nan kogwon MATAT aje tiŋdu se i könisi ti ŋutu ti Yisaraele.

¹³ A Yonatana kije kija gwögwöŋörö ko könisi ko kuŋwat kanyit, a ka ’dokonit lo tito kanyit lo kepoddi lepeŋ. A Yonatana remoddi se kak, a ka ’dokonit lo tito möriesi rembi se lo po kanyit i ki ’diŋ kulo.

¹⁴ A Yonatana ko ka ’dokonit lo tito lo iŋge tatuja ŋutu gwoso merya murek i ŋinu tatuet togeleŋ i pirit nagon gwoso gera na lor geleŋ.

¹⁵ A kujönö iŋge mok ŋutu lo gwon i mera ko i yöbu kulo, a iŋge rekin i kiden na ŋutu liŋ; a kamörök logon a katiyuk ko se logon a karyakak köti böŋdi böŋdu; a kak böŋdi böŋdu, a kujönö gwe a duma parik.

¹⁶ A katiyuk ti Saula lo gwon Gibea na Benyamina kulo ko meddi, mete, a lodir lo ŋutu reki rekin.

¹⁷ A Saula kulyani ko ŋutu lo gwon ko nye kulo adi, Kene ta ken, ko galu ta kaŋo ko ŋa logon a tu kaŋo kayaŋ kata. A se ko keŋdi, mete, a Yonatana ko ka ’dokonit lo tito möriesi lo gwe ’bayin nyu.

¹⁸ A Saula kulyani ko Akiya adi, Joŋdi ni saŋduk na ŋun. Kogwon i nu diŋit ŋutu ti Yisaraele wörö ko saŋduk na ŋun i pirit na geleŋ.

¹⁹ A gwe sona na jambi Saula ko koane nu, a woŋon na gwon i mera na ŋutu ti Pelesete nu ŋiörö ki parik; a Saula kulyani ko koane lo adi, Möŋdi möŋdu kiyaŋ.

²⁰ A Saula ko ŋutu liŋ lo gwon ko lepeŋ kulo momori momora a rurumaddi i mörö; nyena mete, a ŋutu ti Pelesete gwe i torem ko ’börik, a dwadwanyet gwe a duma parik kase kiden.

²¹ A ŋutu ti Ebere logon si ’da ko ŋutu ti Pelesete teŋ ko ŋinu diŋit, ko a moraddu ko se tojo i mera kulo löpukuŋdye ’börik ko ŋutu ti Yisaraele logon gwon ko Saula ko Yonatana kulo.

²² Köti a ŋutu liŋ ti Yisaraele logon a ’de ’ya ’börik i jur lo merya ti Epuraima ko yiŋge adi ŋutu ti Pelesete aje wökön nu, a se köti rurumaddi i gor i riköddu na se.

²³ Nyena a MATAT lwökuŋdye ŋutu ti Yisaraele i ŋilu lor; a mörö iŋge lwö-ŋöddu i lu swöt lo Bet-awen.

²⁴ A ŋutu ti Yisaraele gwe i dara i ŋilu lor; kogwon Saula a milyekiŋdyö ŋutu adi, Ti ŋuto logon a nyesu kinyo i ŋerot na sömukö tojo ko nan a ropun-dya mugun ko merok kwe lo, ti nye lömöni lömö. Nyenagon a lele ŋuto gwe ’bayin logon a ’de ’deŋdya kinyo i ŋilu lor.

²⁵ A ŋutu liŋ ti jur iti mu ’diŋ; a ryeŋdi siwatat gwe kak.

²⁶ A nagon ŋutu aje lupö mu ’diŋ kata nu, mete, a siwatat na ’done kak, ama a lele ŋuto gwe ’bayin logon a meloddu lepeŋ kanyit i kutuk; kogwon ŋutu a kujönö ŋilu milye.

²⁷ Ama Yonatana a ko yiŋ monye lonyit i milyekiŋdyö na ŋutu ŋilu milye, nyena a lepeŋ riöddi ture lo gwon kanyit i könin lo, a kurutuŋdye kele lo siwatat ko kutuk na ŋilu ture a me ’yi me ’yu; a konyen kanyit ŋaji ŋaju.

²⁸ A lele lo kilu ŋutu kulyani adi, Munyi a milyekiŋdyö yi milye iŋgo adi ko ŋuto logon a nyesu kinyo i lo lor ti nye lömöni lömö. Ama a ŋutu aje doddya parik.

²⁹ A Yonatana kulyani adi, Baba aje yöyöŋgu jur; mete, konyen kwe aje ŋaju kogwon nan a ’de ’deŋdya ŋina siwatat a na ’dit.

³⁰ Ködyö bia a na ’but i lo lor ko ŋutu a nyesu abur ŋo nagon se a ryakun ko merok kase nagon se a ryöun kune; a se ködyö gwe ko riŋit tatuet na ŋutu jore ti Pelesete.

³¹ A se rembi ŋutu ti Pelesete kak i ŋilu lor suluja Mikemasa tojo Ayalon. A ŋutu aje doddya parik.

³² a ŋutu ’dorone i ŋo ryakat, a ryakaddi köbilu ko dwönin ko kolojik, a rembi se kak; a se nyesi lepeŋat nagon rima a ko nyuŋ won kaŋo nu.

³³ Nyena a se takiŋdye Saula adi, Mete, ŋutu aje toroŋdya MATAT i nyesu na lokore nagon rima a ko nyuŋ won kaŋo. A nye kulyani adi, Ta aje ’beleŋgu saret ko konesi kasu; iŋgo gwulupundye ta ŋurupit duma köyö ni.

³⁴ A Saula kulyani adi, Toreki ta ’börik ko ŋutu kiden, ko jamaki ta se adi, ti ŋutu liŋ geleŋ geleŋ ŋadi joŋdi dwöt lonyit kode köbilityo ko ti ’duŋge ni, a nyesi nyesu; ko ti ta gwe ti toroŋdya MATAT i nyesu ko rima liŋ. Nyena a ŋutu liŋ geleŋ geleŋ joŋdi dwönin i ŋilu tukwaje, a ’duŋge se nyu.

³⁵ a Saula dipakiŋdye MATAT pirit ’yuret na rubaŋgajin; a ŋina gwe a pirit togeleŋ ’yuret na rubaŋgajin nagon nye a dipakin MATAT na.

³⁶ A Saula kulyani adi, Ti yi iti i kepöddu na ŋutu ti Pelesete i tukwaje anyen yöyöŋgu se tojo ko waran na kak, ti yi gwe ti kölökiŋdyö ŋuto lele lose. A se kulyani adi, Koŋdi ŋo nagon do a met a na ’but konut. Ama a koane kulyani adi, Ti yi miju nyona ko ŋun i pija na lepeŋ.

³⁷ a Saula piyuŋdye ko ŋun adi, Nan ŋona bubulö tu i kepöddu na ŋutu ti Pelesete le? Do de wuwukin se i könisi ti ŋutu ti Yisaraele le? Ama MATAT a ko ruk lepeŋ i ŋilu lor.

³⁸ a Saula kulyani adi, Ta temejik liŋ ti ŋutu, poŋdi ta ni i deŋdya ko i meddya ko nyo na toron ŋona a pukun i lo lor.

³⁹ Kogwon ’diri gwak gwoso na gwoŋdi MATAT logon a kalwökönit lo Yisaraele lo, ma ’di ködyö toron a rye ko ŋuro liŋ Yonatana, a lepeŋ gwak de tatatua. Ama a lele ŋuto gwe ’bayin i kiden na ŋutu liŋ logon a ruggö lepeŋ.

⁴⁰ a lepeŋ kulyani ko ŋutu liŋ ti Yisaraele adi, Gwo ’de ta i swöt geleŋ a nan ko ŋuro liŋ Yonatana de gwo ’de i lele swöt. A ŋutu kulo kulyani ko Saula adi, Koŋdi ŋo nagon do a met a na ’but konut.

⁴¹ Nyenagon a Saula mo ’yi adi, Pon MATAT ŋun lo Yisaraele, nyo nagon do tine ruggö köliŋönit ilot i lo lio? Pon MATAT ŋun lo Yisaraele, ko ködyö na toron gwon köyö kode ko ŋuro liŋ Yonatana, a ti do tiŋdi gura nagon a Urim; ama ko ködyö na toron gwon ko ŋutu kulök Yisaraele, a ti do tiŋdi gura nagon a Tumim. A Yonatana se ko Saula lo wulöjine, ama a ŋutu kulo ryeni a loke.

⁴² a Saula kulyani adi, Ti guralan gubani i kiden nikao ko Yonatana. A kirut Yonatana lo wulöjine.

⁴³ A Saula kulyani ko Yonatana adi, Tuköki nan ŋo nagon do a kon. A Yonatana kulyani adi, Nan ’diri a ’de ’deŋdya siwatat a na ’dit ko kutuk na ture lo gwon köyö i könin lo; nan malo, ti nan tatuani.

⁴⁴ a Saula milyeji adi, Ti Ŋun konakiŋdye nan sona ko lwölwöŋ kine; do Yonatana ’diri de tatatua.

⁴⁵ a ŋutu kulo pije Saula adi, Yonatana ’diri de tatatua logon a katelanit duma i Yisaraele lo le? ’Bayin kwoŋ. ’Diri gwak gwoso na gwoŋdi MATAT na, ti nene ŋo gwe ti ’bo ’yu lepeŋ asut, ma ’di a na ’dit; kogwon nye a kita ko Ŋun i lo lor. A se lwökuŋdye Yonatana a gwe a ko tatua.

⁴⁶ a Saula yitöni i riköddu na ŋutu ti Pelesete; a ŋutu ti Pelesete yitöni kase i pirit.

⁴⁷ A nagon Saula aje morga tumatyan na Yisaraele nu, a möröni ko merok kanyit liŋ ti swötön ka ’de ka ’de, kweja adi a mörö ko ŋutu ti Moaba, ko ti Amon, ko ti Edom, ko moran ti Soba se ko ŋutu ti Pelesete; a nye te ’yi te ’ya se i swötön liŋ lo tiri nye kulu.

⁴⁸ A nye gwe a wa, a rembi ŋutu ti Amalek, a lwokuŋdye ŋutu ti Yisaraele i könisi ti karyakak kase.

⁴⁹ A ŋwajik ti Saula gwe a ko Yonatana ko Yisewi ko Malekisuwa; a karin ti ŋwajik kanyit murek nawate sekine: karin ti kayu na a Meraba, a ti ŋuro loponi na gwe a Mikala;

⁵⁰ karin ti nakwan na Saula nagon a Akinoma ŋuro na Akimasa. A karin ti duma lo kamörök kanyit gwe a Abiner ŋuro lo Ner luŋaser monye Saula; a monye Saula gwe a Kisi,

⁵¹ a monye Abiner gwe a Ner ŋuro lo Abiele.

⁵² A mörö gwe pape ko ŋutu ti Pelesete i perok liŋ ti Saula; a ko Saula a meddya lele ŋuto iŋgo kode lele logon a wa a nye joŋgi lepeŋ a lonyit.