1 Samuele 13 - Bibilia Buk na Ŋun nagon koti luŋu a

Ŋutu ti Yisaraele a mörö ko ŋutu ti Pelesete

¹ A Saula gwe ko kiŋajin merya iŋwan na suluje nye saŋu nu; a nye saŋi Yisaraele yu ko kiŋajin jore.

² Saula wulökiŋdye mugun ŋutu ti Yisaraele aliŋan musala; a aliŋan murek gwe ko Saula Mikemasa i jur lo merya ti Betele, a aliŋ geleŋ gwe ko Yonatana Gibea na Benyamina; a nye soŋdi ŋutu lo pituŋdyö kulo mede, se liŋ geleŋ geleŋ kase i midijik.

³ a Yonatana te ’yi mera na ŋutu ti Pelesete na gwon Geba nu, a ŋutu ti Pelesete iŋge yiŋ kine ŋo. A Saula kuddye tore i swötön liŋ ti lu jur, a kulyani adi ti ŋutu ti Ebere yiŋge yiŋga.

⁴ A ŋutu liŋ ti Yisaraele iŋge yiŋ adi Saula aje te ’ya mera na ŋutu ti Pelesete, ko köti adi ŋutu ti Pelesete maman se parik. A ŋutu liŋ iŋge luŋu anyen moraddu ko Saula Giligala yu.

⁵ A ŋutu ti Pelesete momori ’borik i mörö ko ŋutu ti Yisaraele gwoso arabiajin lo jirikö aliŋan musala, ko ŋutu kajoŋak ti kusanjin aliŋan buker ko kamörök jore gwoso sese na kijit na tör; a se poŋdi po a ’beggi mera nase Mikemasa i swöt lo ’yure lo Bet-awen.

⁶ A ŋutu ti Yisaraele ko meddi adi se gwon i nagusu, (kogwon se gwe nyona ko tela), a se ’de ’yi ’börik i kuggiet ko i rudwö ko i merya ko i dilyö ko i kidya,

⁷ kode a lodaddi i nu pele na kare Yardene tojo i jur lo Gada ko lo Gilada. A Saula nyuŋ gwe Giligala, a ŋutu liŋ kepoddi lepeŋ böbönöddu.

⁸ A nye möŋdi möŋdu perok buryo, gwoso diŋit nagon Samuele a teteŋdi na; ama a Samuele tine ’dur Giligala, a ŋutu reara reara kaŋo ko Saula.

⁹ A Saula kulyani adi, Joŋdi ta rubaŋga lo ’yu ’yura ’buluŋ köyö ni, se ko rubaŋgajin ti taliŋ. A nye wukiŋdye rubaŋga lo ’yu ’yura ’buluŋ.

¹⁰ A gwe sona ’de ’de nagon nye aje tutuŋgö wukiŋdya rubaŋga lo ’yu ’yura ’buluŋ nu, mete, a Samuele lo ’duröki; a Saula iti i rum ko lepeŋ anyen roman ko lepeŋ.

¹¹ A Samuele pije adi, Do a koŋdya nyo? A Saula waddi adi, I diŋit nagon nan aje met adi ŋutu rereara kaŋo köyö, köti do a ko ’dur i perok logon a wulwe kulo, köti ŋutu ti Pelesete aje momora Mikemasa nu,

¹² a nan kulyani adi, Soŋinana ŋutu ti Pelesete de lulurun kak köyö ni Giligala, a nan a ko nyuŋ muluŋdyö ’busan ko MATAT; nyena a nan ri ’dikiŋdye mugun i wukiŋdya na rubaŋga lo ’yu ’yura ’buluŋ.

¹³ A Samuele kulyani ko Saula adi, Do a koŋdya gwoso mök; do a ko ’debba saret lo MATAT Ŋun ilot logon nye a sarakin do ŋilo; kogwon soŋinana MATAT ködyö aje togwi ’dikiŋdya tuma-tyan inot i Yisaraele ŋupi.

¹⁴ Ama soŋinana tumatyan inot tine yeŋon; MATAT aje galuŋdya kaŋo ŋuto logon töili lonyit a ’deggi lo, MATAT aje wulökiŋdyö lepeŋ a kasaranit lo ŋutu kanyit, kogwon do a ko ’debba ŋo nagon MATAT a sarakin do kine.

¹⁵ A Samuele ŋidrö kaŋo Giligala yu a iti tojo Gibea na Benyamina.

¹⁶ A Saula keŋdi ŋutu lo gwon ko nye kulo gwoso ŋutu aliŋan buker. a Saula ko ŋuro lonyit Yonatana si ’dani Geba i jur lo Benyamina, ko ŋutu lo gwon ko se kulo; ama a ŋutu ti Pelesete gwe kase i mera Mikemasa yu.

¹⁷ A karyakak lupene kaŋo i mera na ŋutu ti Pelesete a teŋon musala, a nene teŋ geleŋ girara i kiko lo Opera tojo i jur lo Swala,

¹⁸ a nene teŋ girara i kiko lo Bete-koron, a nene teŋ girara i loköko-rit logon diraddu i pirit na ’dir na Seboim i swöt lo yöbu.

¹⁹ A tumunit tine bulo rye i jur lo Yisaraele liŋ; kogwon ŋutu ti Pelesete aje kulya adi an ŋutu ti Ebere nitökin-dyö ’börik baŋdujin kode goro;

²⁰ ama a ŋutu liŋ ti Yisaraele ŋadi geleŋ iti i ŋuto lo Pelesete i jujö na kole nanyit duma kurit, ko ’boket lonyit, ko tulu lonyit ko seresere lonyit.

²¹ A swötön murek ti tomusala na sekele gwe a ropet tetenet na kole kurit kode na ’boket, a swöt geleŋ na tomusala na sekele gwe a juwet na tulu kode na bidi.

²² Nyena a gwe sona i perok ti gor, a lele ŋuto lo Saula ko Yonatana gwe ’bayin logon ko baŋdu kode ko gor kanyit i könin, ama a Saula ko ŋuro lonyit Yonatana ka ’de lo gwe ko se.

²³ A ŋutu ti Pelesete logon a kamörök iti i tiju na pirit lupet na Mikemasa.